បាបកម្មពីរប្រភេទដែលបុគ្គលគួរវៀរគឺ ការប្រព្រឹត្តខុសក្នុងកាម១(ល្បែងស្រី) និងអំពើពាលាល្បែងភ្នាល់ ១ អំពើអាក្រក់ពីរប្រការនេះបើបុគ្គលណាឈានជើងចូលទៅប្រព្រឹត្តមែនៗហើយ បុគ្គលនោះកម្រគេចផុតពីក្តីអន្តរាយបានណាស់ ពោលគឺ បើជាអ្នកមានទ្រព្យរមែងអស់ទ្រព្យ បើជាមនុស្សមានយសស័ក្តិ បុណ្យស័ក្តិនោះរមែងសាបសូន្យទៅ និងរស់នៅក្នុងសភាពក្រលំបាក អាប់ឱនកិត្តិយស និងមានវិប្បដិសារីអស់មួយជាតិ ។
នៅក្នុងគម្ពីធម្មវិភាគលោកបានពន្យល់ថា ស្ត្រីក្នុងទីនេះចែកចេញជាពីរប្រភេទ គឺស្រីធម្មតា១ និងស្រីផ្កាមាស១។ បើបុរសណាជាប់ជំពាក់ក្នុងស្ត្រីទាំង២ប្រភេទនេះ ទោះជាប្រភេទមួយណាក៏ដោយ ងប់ងុលត្បុរចូលមិនមានពេលលះបង់ ងងឹតមុខដិតអារម្មណ៍ជាប់រហូតមិនភ្លឺស្វាង បុរសនោះឈ្មោះថា ជាអ្នកលេងស្រី (ឥត្ថីធុត្តោ) ជាហេតុនាំមកនូវក្តីវិនាស ។
ចំណែកអ្នកលេងល្បែងភ្នាល់បានដល់អំពើពាលា ឬលេងល្បែងស៊ីសង(អក្ខធុត្តោ) មានសេចក្តីសម្គាល់ថា ល្បែងទាំងនោះមានច្រើនប្រភេទណាស់ដូចជា បៀ អាប៉ោង ចាក់កន្ទុយលេខ ភ្នាល់បាល់ បញ្ជល់មាន់ជាដើម ទាំងអស់នេះចាត់ថាជាការភ្នាល់ ។
បុគ្គលណាចាប់យកអាជីពល្បែងទាំងនេះជាត្រីមុខ ព្យាយាមលេងមែនៗ បុគ្គលនោះឈ្មោះថាជាអ្នកបង់យស កេរ្តិ៍ឈ្មោះផ្សាយទៅមិនពីរោះពិសា និងមិនជាទីពេញចិត្តចំពោះអ្នកផងទាំងពួង តែងរង្កៀសចិត្តអ្នកដទៃ។ ជនទាំងអស់នោះហើយជាមុខសញ្ញាចោរលួច ចោរប្លន់ ឬជាអ្នកធ្វើសកម្មភាពប្រព្រឹត្តបទល្មើសផ្សេងៗទៀត ។
បុគ្គលណាប្រកបដោយទោសទាំងពីរប្រការដូចបានពោលមកនេះ ឈ្មោះថាជាមនុស្សអាក្រក់ បើហ៊ានសេពគប់យកមកធ្វើជាមិត្តសម្លាញ់ ប្រៀបបានយកថ្នាំពិសមកទុកក្នុងផ្ទះរបស់ខ្លួននឹងមានគ្រោះថ្នាក់នៅថ្ងៃណាមួយមិនខាន។
ចែករំលែកព័តមាននេះ