សូមសាធុជនកុំបណ្តោយឱ្យភ្លើងទោសៈឆេះឡើងឱ្យសោះ ព្រោះវាប្រឈមនឹងគ្រោះថ្នាក់ខ្លាំងណាស់ តែបើកាលណាឆេះឡើងហើយ ចង់បញ្ឈប់ភ្លើងកំហឹងនោះឱ្យរលត់ទៅវិញក៏មិនមែនជារឿងងាយ តែក៏មិនមែនដល់ទៅពិបាករហូតរំលត់ភ្លើងទោសៈមិនបាននោះដែរ សំខាន់គឺនៅត្រង់ថា យើងត្រូវតាំងចិត្តបញ្ឈប់ចិត្តខឹងឱ្យបានតែប៉ុណ្ណោះ ។
លោកអ្នកអាចសាកល្បងវិធីរំលត់ភ្លើងទោសៈមួយចំនួនខាងក្រោមនេះលមើលនឹងអាចមានប្រសិទ្ធភាពច្រើនគឺៈ
១-យល់ឃើញត្រូវ គឺចិត្តសស្អាត ពិចារណាឱ្យឃើញទោសនៃទោសៈ និងផលអាក្រក់ដែលកើតពីទោសៈ ឬពិចារណាតាមពុទ្ធឱវាទផ្សេងៗទៀតឱ្យបានច្បាស់ រហូតដល់យល់ថា ទោសៈនេះមានទោសអាក្រក់មែន។
២-ត្រូវពិចារណាឱ្យឃើញផលប្រយោជន៍ដ៏មហាសាល ដែលនឹងកើតមកអំពីការដែលមិនមានទោសៈ។
៣-ប្រើវិធីទន្ទេញ ឬភាវនាខ្សឹបៗ ប្រាប់ខ្លួនឯងថា កុំខឹង កុំខឹង កុំខឹង មិនខ្ចីខឹង មិនខ្ចីខឹង កុំទៅខឹងៗ ខឹងបានការអ្វីៗ ឱ្យបានជាប់ជានិច្ចរាល់ឥរិយាបថ រាល់កិច្ច និងរាល់ពេលដែលមានអារម្មណ៍ទោសៈចូលមកប៉ះចិត្ត ។
៤-មានទស្សនៈទៅលើអ្វីៗក្នុងន័យជាល្អ ជាវិជ្ជមាន កុំសូវគិតទៅលើរឿងអាក្រក់ឥតប្រយោជន៍ពេក ។
៥-មានរបៀបរម្ងាប់ទោសៈតាមបែបថា នៅពេលយើងខឹងគេ ហើយចង់ឈ្លោះតតបវិញ ត្រូវរាប់លេខឱ្យបានចំនួន១០០០ នោះនឹងអាចឈប់ខឹងហើយ ។
៦-វិធីមួយដែលគេឯងប្រើមានប្រសិទ្ធភាព គឺការធ្វើសមាធិនៅពេលខឹង។ ឧទាហរណ៍ បើយើងខឹងអ្នកណាមួយខ្លាំង គប្បីបិទភ្នែក ឬមិនបាច់បិទក៏បាន ហើយដកដង្ហើមឱ្យបានវែងៗជាទីបំផុតចំនួន១០ដង។ នៅពេលកំពុងដកដង្ហើមវែងៗនោះ ភ្នែក ឬចិត្ត ត្រូវសម្លឹងមើលចុងច្រមុះជាកន្លែងដែលខ្យល់រត់ចេញរត់ចូលប៉ះនឹងរឹមច្រមុះ កុំឱ្យចិត្តងាកបែរទៅណាឱ្យសោះ។ ធ្វើដូច្នេះកម្លាំងរបស់ទោសៈនឹងថយចុះជាលំដាប់រហូតបាត់អស់ជាមិនខាន ។
៧-ចម្រើនមេត្តាកម្មដ្ឋាន ពោលគឺផ្សាយមេត្តា នឹកស្រមៃក្នុងចិត្តថា សូមឱ្យមនុស្សសត្វទាំងអស់បានសេចក្តីសុខ កុំបីមានពៀរវេរារវាងគ្នានិងគ្នាឡើយ ។
វិធីសាស្ត្រទាំងអស់នេះជាគន្លឹះយ៉ាងសំខាន់ជួយរំលត់ភ្លើងទោសៈចេញពីចិត្ត និងនាំឱ្យអារម្មណ៍ស្ងប់ ត្រជាក់ សុខស្រួលជាប្រក្រតី ។
ចែករំលែកព័តមាននេះ