រាជធានីភ្នំពេញ៖ ប្រធានសហគមន៍ចាប៉ីអមតៈលោកពេជ្រ សារ៉ាត សម្លឹងឃើញថា មួយរយៈចុងក្រោយនេះការចង់ហាត់រៀនលើទម្រង់ចាប៉ីមានការកើនឡើងគួរឲ្យកត់សម្គាល់ ជាពិសេសគឺយុវជន ។ លោកយល់ថា ការកើនឡើងបន្តិចនៃការចង់ហាត់រៀនចាប៉ីនេះគឺជារឿងមួយដ៏ល្អ ប៉ុន្តែសិស្សមួយចំនួនទៀតដែលបានចូលហាត់រៀនហើយនោះក៏បោះបង់ចោលច្រើនដែរ ដោយសារពួកគេខ្លះរវល់ការសិក្សា និងខ្លះរវល់ការងាររកស៊ី ។
លោកពេជ្រ សារ៉ាត បានបញ្ជាក់កាលពីពេល ថ្មីៗកន្លងមកថា ចាប់តាំងពីក្រុមរបស់លោកបានដើរបង្រៀនដល់យុវជន កុមារនៅតាមមូលដ្ឋានមួយរយៈនេះមកឃើញមានការផុលផុសគួរឲ្យកត់សម្គាល់នូវការចូលហាត់រៀនចាប៉ីដងវែងច្រើន ។ ពួកគេទាំងនោះមានបំណងចង់ចេះចង់ដឹងនូវទម្រង់ចាប៉ីដងវែងនេះ ប៉ុន្តែមានខ្លះក៏បានបោះបង់ចោលពាក់កណ្តាលទីផងដែរ ដោយសារជាប់ធុរៈរៀងខ្លួន ។
បើតាមលោក ពេជ្រ សារ៉ាត «សហគមន៍បានរៀបចំជាផែនការកម្មវិធីនៅក្នុងការបង្រៀងចាប៉ីនេះរួចហើយ ប៉ុន្តែនៅខ្វះខ្វាតមូលនិធិសម្រាប់ទ្រទ្រង់ ។ ក្នុងខែខ្លះយើងបានអនុវត្តកម្មវិធីបានពេញលេញ ហើយខែខ្លះក៏មិនបានពេញលេញ ដោយសារយើងនៅខ្វះថវិកា ជាហេតុធ្វើឲ្យការអនុវត្តនេះមិនបានលេចចេញជាធំដុំនៅឡើយទេ ។ ប្រសិនបើមានមូលនិធិគ្រប់គ្រាន់សហគមន៍របស់លោកនឹងអនុវត្តផែនការនេះឲ្យទទួលបានជោគជ័យ»។
លោកពេជ្រ សារ៉ាត ឲ្យដឹងទៀតថា សព្វថ្ងៃលោកកំពុងតែចងក្រងយុវជនឲ្យចេះធ្វើការជាក្រុមសម្រាប់ចាប៉ីដងវែង ដោយឲ្យពួកគេចេះផ្សព្វផ្សាយដោយខ្លួនឯង ។ ចំណែកការបង្រៀនចាប៉ីដល់កុមារនោះលោកក៏បានបណ្តុះបណ្តាលនូវគ្រូបង្គោលបានប្រមាណ៧នាក់ហើយ ដើម្បីជួយការងារសហគមន៍ចាប៉ីអមតៈ និងក្នុងន័យបញ្ជ្រៀបកុមារ យុវជន និងមហាជនឲ្យបានស្គាល់នូវទម្រង់ចាប៉ីដងវែងនេះ ។
លោកពេជ្រ សារ៉ាត និយាយថា «ពីដើមគេតែងតែឮពាក្យនិយាយថាចាប៉ីសម្រាប់តាលោកតា ចាស់ៗរៀនទេ តែលោកតែងតែគិតនឹងខិតខំឲ្យកុមារញ៉ាំចំណីមួយនេះ លួងផង បញ្ជោរផង សើចផង កម្សត់ផង ពន្យល់ផង ទម្រាំកុមារយល់ និងព្រមរៀន រកវិធីសាស្ត្រ ថ្មីៗដើម្បីបន្តវេនដល់កុមារ តូចៗ ។ យ៉ាងណាក៏ដោយខ្ញុំនៅតែបារម្ភនៅពេលដែលខ្ញុំបានបណ្តុះបណ្តាលនូវធនធានបានហើយ ប៉ុន្តែបើគ្មានទីកន្លែងសម្រាប់ឲ្យពួកគេបង្ហាញសមត្ថភាពនោះ គឺក៏គ្មានន័យហើយវាអាចនឹងបាត់បង់ទៅវិញ »៕
ចែករំលែកព័តមាននេះ