រាជធានីភ្នំពេញ៖ ប្រធាន និង អនុប្រធានគណបក្សសង្គ្រោះជាតិ លោក សម រង្ស៊ី និង លោក កឹម សុខា នឹងទៅដល់ទីលានប្រជាធិបតេយ្យនៅម៉ោង ៩ព្រឹកថ្ងៃទី២៤ តុលា ២០១៣ ដើម្បីដឹកនំាធ្វើមហាបាតុកម្មអហិង្សា និងហែក្បួនយកញ្ញត្តិដាក់ជូនស្ថានទូតអាមេរិក អង់គ្លេស និង បារំាង ។
នៅឯទីលានប្រជាធិបតេយ្យនោះវិញ ក្រុមអ្នកគំាទ្របក្សប្រឆាំងប្រមាណ៣០០០នាក់គិតត្រឹមម៉ោង៨និង៤៥នាទីព្រឹកនេះ បានប្រមូលផ្តុំគ្នារង់ចំាមេបក្សប្រឆាំងទំាងពីរ ។ចំណែកសមត្ថកិច្ចរាប់សិបនាក់ ក៏ត្រូវបានគេបន្តដាក់ពង្រាយនៅជុំវិញបរិវេណទីលានប្រជាធិបតេយ្យ ស្ថិតនៅខាងក្រោយស្ថានទូតអាមេរិកប្រចំាកម្ពុជា ក៏ដូចជានៅតាមគោលដៅសំខាន់ៗមួយចំនួនទៀត ដើម្បីត្រៀមរៀបចំសន្តិសុខសណ្តាប់ធ្នាប់ និង បង្រ្កាបក្នុងករណីមានអំពើហិង្សាណាមួយកើតឡើង ។
នៅព្រឹកថ្ងៃទី២ នៃការធ្វើមហាបាតុកម្មអហិង្សាដឹកនំាដោយគណបក្សសង្គ្រោះជាតិ ទិដ្ឋភាពជាទូទៅក្នុងរាជធានីភ្នំពេញមានសភាពប្រក្រតីឡើងវិញ ខុសពីថ្ងៃម្សិលមិញដែលមានសភាពស្ងប់ស្ងាត់តាមដងផ្លូវ ។
បើតាមសេចក្តីជូនដំណឹងរបស់សាលារាជធានីភ្នំពេញ នៅថ្ងៃទី២៤ តុលា ចាប់ពីម៉ោង៨ព្រឹក ដល់ម៉ោង១០និង៣០នាទី ការហែក្បួនយកញ្ញត្តិនិងស្នាមមេដៃប្រជាពលរដ្ឋទៅកាន់ស្ថានទូតអាមេរិក អង់គ្លេស និង បារំាង ត្រូវឆ្លងកាត់ផ្លូវលេខ ៦១ ផ្លូវលេខ ៤៧ និង ផ្លូវលេខ ៧៦ ។ ដូច្នេះប្រជាពលរដ្ឋ ត្រូវចៀសវាងធ្វើដំណើរតាមផ្លូវខាងលើ ព្រោះអាចនឹងមានការកកស្ទះចរាចរណ៏ ។ សេចក្តីរាយការណ៏នៅមុននេះបន្តិច លោក សម រង្ស៊ី និង លោក កឹម សុខា បានទៅដល់ទីលានប្រជាធិបតេយ្យហើយនៅម៉ោង៩ព្រឹកនេះ ៕
ចែករំលែកព័តមាននេះ