រាជធានីភ្នំពេញ ៖ កន្លងមកមានការនិយាយថា មាស សុខសោភា អាចនឹងចូលរោងការនៅក្នុងស្រុកម្តងទៀតជាមួយស្វាមីខ្មែរសញ្ជាតិកាណាដា។ ដំណឹងនេះធ្វើឲ្យមានការលើកឡើងថា ពិតជាកក្រើកព្រោះថា មាស សុខសោភា…
រាជធានីភ្នំពេញ ៖ កន្លងមកមានការនិយាយថា មាស សុខសោភា អាចនឹងចូលរោងការនៅក្នុងស្រុកម្តងទៀតជាមួយស្វាមីខ្មែរសញ្ជាតិកាណាដា។ ដំណឹងនេះធ្វើឲ្យមានការលើកឡើងថា ពិតជាកក្រើកព្រោះថា មាស សុខសោភា ជាកំពូលតារាចម្រៀងល្បី ហើយមហាជនឲ្យតម្លៃថារាជនីសំឡេង។
បើយោងតាមការទម្លាយសារជាថ្មីរបស់សាមីខ្លួនផ្ទាល់ គឺគ្មានគម្រោងរៀបការឲ្យផ្អើលគេឡើយ។ ដូចនេះអ្នកទន្ទឹងរង់ចាំមើល មាស សុខសោភា គ្រងឈុតប្រពៃណីរៀបការនោះមិនអាចមាននោះទេ។
កាន់តែមានប្រជាប្រិយភាព មាស សុខសោភា កាន់តែមានរូបសម្ផស្ស និង ការតែងខ្លួនឡើងខ្ញង់តែម្តង មិនថា ឡើងច្រៀងនៅតាមកម្មវិធីនានា ឬកម្មវិធីជាលក្ខណៈកម្សាន្តនោះទេ ។ សម្រាប់ឱកាសបុណ្យចូលឆ្នាំខ្មែរនេះ មាស សុខសោភា ក៏មានចេញបទចម្រៀងថ្មីៗជាច្រើនបទផងដែរ ហើយឆាប់ៗខាងមុខនេះ មាស សុខសោភា ក៏មានគម្រោងចេញទៅច្រៀងនៅប្រទេសកាណាដាទៀតផង។
សោភាបានឲ្យអ្នកសារព័ត៌មានយើងដឹងកាលពីពេលមុនចូលឆ្នាំថា នាងហោះទៅកាណាដានៅថ្ងៃទី១៨ មេសានេះ ដោយដំណើរចាកចេញរយៈពេល៣ខែ។ នាងចាកចេញសម្តែងដល់ទៅរយៈពេលយូរហើយ អាចឆ្លងទៅអាមេរិក៣ខែទៀត គឺជាប្រវត្តិសាស្ត្រហើយតាំងពីចូលសិល្បៈជិត២០ឆ្នាំ។ តារាលំដាប់ប្រទេសរូបនេះអះអាងទៀតថា ការឆ្លងនាយសមុទ្ររយៈពេលច្រើនខែ ដើម្បីប្តូរបរិយាកាស ព្រោះក៏ហត់នឿយជាមួយការងារច្រើន ណាមួយចង់បន្តការរីករាយសម្តែងជាមួយបងប្អូនក្រៅស្រុកឲ្យបានច្រើន។
នៅពេលសួរនាំបញ្ហារៀបការសោភានិយាយលឿនថា អត់មានដំណឹងរៀបការនៅក្នុងស្រុកទៀតទេ ព្រោះនាងរៀបការយូរហើយ បើរៀបពិធីទៀតនាំតែខាតពេល ប៉ុន្តែអ្វីដែលនាងខកបំណង គឺមិនបាននៅចូលរួមមង្គលការ ឱក សុគន្ធកញ្ញា ជាមិត្តភក្តិដែលរៀបការពាក់កណ្តាលខែឧសភាខាងមុខ ដូច្នេះមានតែជូនពរឲ្យគាត់មានសេចក្តីសុខតរៀងទៅ។
ហើយមុនហោះទៅកាណាដាមាស សុខសោភា បានសម្រុកចេញមុខតាមកញ្ចក់ទូរទស្សន៍ជាញឹកញាប់ ដើម្បីលាមហាជនជាហ្វ្រេនមួយរយៈ។ ចំពោះបទចម្រៀងសម្រាប់ចូលឆ្នាំនាងលេចធ្លោជាងគេដូចជាបទ «រលឹមប្រុយៗ» បទ«ប៉ក់កន្ទ្រឹមអើយ» និងបទ«ឆ្នាំថ្មីរកប្តីមិនបាន» សុទ្ធសឹងជាបទទាក់ទាញចាក់រាំគ្រប់កន្លែងយ៉ាងកក្រើក៕
ចែករំលែកព័តមាននេះ