រាជធានីភ្នំពេញ៖ក្រសួងវប្បធម៌ និងវិចិត្រសិល្បៈបានសម្រេចប្រគល់បទចម្រៀង«នឹកភូមិភ្នំធំ» ឬ«ថ្ងៃដែលអូនចុកឈាម»ជាកម្មសិទ្ធិបញ្ញារបស់គ្រួសារកវីគង្គ ប៊ុនឈឿន ។ ការសម្រេចពីក្រសួងវប្បធម៌បានធ្វើឡើងបន្ទាប់ពីបទចម្រៀងនេះត្រូវផលិតកម្មសាន់ដេ ឲ្យនាយចឺម ច្រៀងដោយដាក់ថានិពន្ធបទភ្លេងថ្មី ។ ក្រុមគ្រួសាររបស់កវីគង្គ…
រាជធានីភ្នំពេញ៖ក្រសួងវប្បធម៌ និងវិចិត្រសិល្បៈបានសម្រេចប្រគល់បទចម្រៀង«នឹកភូមិភ្នំធំ» ឬ«ថ្ងៃដែលអូនចុកឈាម»ជាកម្មសិទ្ធិបញ្ញារបស់គ្រួសារកវីគង្គ ប៊ុនឈឿន ។ ការសម្រេចពីក្រសួងវប្បធម៌បានធ្វើឡើងបន្ទាប់ពីបទចម្រៀងនេះត្រូវផលិតកម្មសាន់ដេ ឲ្យនាយចឺម ច្រៀងដោយដាក់ថានិពន្ធបទភ្លេងថ្មី ។
ក្រុមគ្រួសាររបស់កវីគង្គ ប៊ុនឈឿន បានដាក់ពាក្យបណ្តឹងស្នើសុំឲ្យក្រសួងវប្បធម៌ និងវិចិត្រសិល្បៈមានវិធានចំពោះករណីបំពាននោះ។ ជាការឆ្លើយតបក្រសួងបានសម្រេចប្រគល់បទចម្រៀង«ថ្ងៃដែលអូនចុកឈាម»ជាកម្មសិទ្ធិបញ្ញារបស់ក្រុមគ្រួសាររបស់កវីស្ទឹងសង្កែគង្គ ប៊ុនឈឿន ។
យោងតាមសេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈដែលបានចេញផ្សាយនៅថ្ងៃទី១០ ខែមេសា ឆ្នាំ២០១៩មានខ្លឹមសារថា «ក្នុងពេលកន្លងទៅក្រសួងបានទទួលសំណើសុំសិទ្ធិគ្រប់គ្រងមរតកសាសន៍លើបទចម្រៀងដែលជាស្នាដៃរបស់លោកគង្គ ប៊ុនឈឿន ពីលោកស្រី តាត គឹមលន ជាភរិយារបស់លោក។ ឆ្លងតាមការសិក្សាស្រាវជ្រាវ ក្រសួងបានពិនិត្យឃើញថា បទចម្រៀងមួយបទដែលមានចំណងជើងដើម «នឹកភូមិភ្នំធំ ឬថ្ងៃដែលអូនចុកឈាម» ជាស្នាដៃនិពន្ធបទភ្លេង និងទំនុកច្រៀងដោយលោកគង្គ ប៊ុនឈឿន ។ ក្រសួងវប្បធម៌ ប្រគល់សិទ្ធិគ្រប់គ្រងមរតកសាសន៍ជូនលោកស្រីតាត គឹមលន ដើម្បីគ្រប់គ្រងតាមសំណើ »។
សេចក្តីជូនដំណឹងបន្តថា« រាល់ភាគីពាក់ព័ន្ធដែលមានបំណងប្តឹងជំទាស់លើការស្នើសុំសិទិ្ធគ្រប់គ្រងមរតកសាសន៍បទចម្រៀងខាងលើអាចដាក់ពាក្យបណ្តឹងមកនាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែលនៃក្រសួងវប្បធម៌ និងវិចិត្រសិល្បៈ ខណះពេលដែលមានពាក្យប្តឹងទាស់មានសុពភាពរយៈពេល១ខែ គិតចាប់ពីការផ្សាយដំណឹងនេះតទៅ »។
ផលិតកម្មសាន់ដេតាមរយៈអ្នកនិពន្ធរបស់ខ្លួន បានកែកាឡៃបទ «នឹកភូមិភ្នំធំ ឬថ្ងៃដែលអូនចុកឈាម» មកជាបទ«អូនជាអ្នកមានសមនឹងអ្នកមានដូចគ្នា» ច្រៀងដោយនាយចឺម បានទទួលរងការរិះគន់យ៉ាងខ្លាំង ។
បន្ទាប់ពីមានការរិះគន់ និងការដាក់ពាក្យប្តឹងពីក្រុមគ្រួសាររបស់លោកគង្គ ប៊ុនឈឿន នោះ ផលិតកម្មសាន់ដេ និងអ្នកនិពន្ធបទបទ«អូនជាអ្នកមានសមនឹងអ្នកមានដូចគ្នា» នេះបានចេញមុខសុំទោសជាសាធារណៈ និងលុបបទចម្រៀងនេះចោល តែអ្នកច្រៀងគឺនាយចឺម មិនបានសុំទោសទេ ៕
ចែករំលែកព័តមាននេះ