ពិធីបុណ្យចូលឆ្នាំថ្មីជាប្រពៃណីខ្មែរដ៏មានប្រជាប្រិយភាពតាំងពីយូរលង់ណាស់មកហើយ ដែលបច្ឆជនបានកាន់រក្សាបន្តពីមួយជំនាន់ទៅមួយជំនាន់ជាតំណតរហូតមកដល់បច្ចុប្បន្ននេះ ។ សង្ក្រាន្តឆ្នាំថ្មីឆ្នាំនេះនឹងចូលមកដល់នៅថ្ងៃអាទិត្យ ១០កើត ខែចេត្រ ត្រូវនឹងថ្ងៃទី១៤ ខែមេសា គ.ស. ២០១៩ វេលាម៉ោង៣និង១២នាទីរសៀល ។
ពេលនោះមានទេពធីតាមួយព្រះអង្គជាមគ្គនាយិកានាមធុង្សទេវី ជាបុត្រីទី១នៃកបិលមហាព្រហ្មគង់នៅចាតុម្មហារាជិកា ទ្រង់អម្ពរពណ៌ក្រហម លម្អនៅព្រះកាណ៌ដោយផ្កាទទឹម អភរណៈបទុមរាគ ភក្សាហារទ្រង់ផ្លែឧទុម្ពរ ព្រះហស្តស្តាំទ្រង់កងចក្រ ព្រហស្តឆ្វេងទ្រង់ស័ង្ក ទ្រង់អង្គុយពាក់ឆៀងលើខ្នងស្តេចគ្រុឌជាពាហនៈ ។
ទើបនាំអស់ទេវបុត្រ ទេវធីតាទាំងមួយសែនកោដិហោះទៅកាន់គុហាកែវធម្មមោលី នាទីភ្នំកៃលាស ខេត្តហិមពាន្តជាទីតម្កល់ទុកនូវព្រះសិរសាកបិលមហាព្រហ្ម ដែលតម្កល់លើពានមាសនាំមកដង្ហែប្រទក្សិណជុំវិញភ្នំព្រះសុមេរុរាជ តាមផ្លូវព្រះអាទិត្យចរចំនួន៦០នាទី ។
រួចនាំសិរសាយកទៅតម្កល់ទុកនៅកន្លែងដើមវិញ ហើយប្រជុំទេវបុត្រទេវធីតាទាំងមួយសែនកោដិចូលទៅស្រង់ទឹកអនោត្តមហាស្រះដែលមានទឹកហូរចេញពីបំពង់ថ្មកែវដ៏ត្រជាក់ក្សេមក្សាន្តព្រះរាជហឫទ័យ ហើយនាំគ្នាចូលទៅសមាទានរក្សាសីល ដោយសោមនស្សរីករាយគ្រប់ៗព្រះអង្គ ក្នុងភគវតីសភាសាលាដែលព្រះវិស្សកម្មទេវបុត្រនិមិ្មតថ្វាយដើម្បីបន្ទោបង់នូវអពមង្គលឱ្យជ្រះស្រឡះ ហើយចម្រើននូវសិរីសួស្តី ជ័យមង្គលជន្មាយុយឺនយូរដល់ទេវតា និងមនុស្សសត្វផងទាំងឡាយតាំងពីឆ្នាំថ្មីចូលមកនេះបានសុខក្សេមក្សាន្តតរៀងទៅ ។
នៅក្នុងឱកាសសង្ក្រាន្តទាំងបីថ្ងៃនេះសូមអស់ប្រជាពលរដ្ឋប្រុសស្រីផងទាំងឡាយ រៀបចំពលិការ គ្រឿងសក្ការបូជា អុចទាន ធូបថ្វាយព្រះរតនត្រ័យ និងទទួលស្វាគមន៍ទេវបុត្រ ទេវធីតាឆ្នាំថ្មីហើយខំលះបង់ចិត្តអាក្រក់អន្យតិរ្ថិយជាចិត្តអប្រិយជាប់ដោយគំនុំគំកួនព្យាបាទឈ្នានីសដែលកើតមានក្នុងឆ្នាំចាស់ឱ្យជ្រះស្រឡះតាំងចិត្តប្រព្រឹត្តល្អ ប្រកបដោយ មេត្តា ករុណា មុទិតា ឧបេក្ខា និងបញ្ញាធ្វើបុណ្យសុន្ទរ៍ទានតាមប្រពៃណី រក្សាសីលប្រាំឱ្យបានជាប់ជានិច្ច នោះទេវតានឹងឱ្យពរសព្ទសាធុការ លោកអ្នកនឹងមានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ ។
ចែករំលែកព័តមាននេះ