ជីវិតយើងនេះរមែងត្រូវភ្លើង ជាតិ ជរា ព្យាធិ មរណៈ ដុតរោលឱ្យក្តៅផ្សារាល់ថ្ងៃ នេះឯងហើយ ដែលលោកចាត់ថាជាភ្លើងនរកនោះ កុំបាច់ទៅរកនរកឯណាឆ្ងាយ គឺនៅក្នុងជីវិតយើងសព្វថ្ងៃក៏មានសួគ៌-នរកនៅលាយឡំជាមួយដែរ តែបុគ្គលបាបរមែងមិនដឹងនូវលក្ខណៈពិតនៃលោកនេះឡើយ ។
អ្នកប្រាជ្ញទាំងឡាយបានពោលយ៉ាងនេះថា នរកមិនមែនមានតែនៅក្នុងឋាននរកឋានប្រេតនោះឯណា នៅក្នុងជីវិតយើងសព្វថ្ងៃនេះក៏ត្រូវភ្លើងនរកកើតអំពី ជរា ព្យាធិ មរណៈ ទុក្ខ សោកដុតកម្លោចបំផ្លាញសេចក្តីសុខយើងរាល់ពេល រាល់ខណៈដែរ ។
បុគ្គលកើតទោសៈច្រើន អ្នកឈ្នានីសគេ អ្នកចងចិត្តគំកួន អ្នកចងចិត្តប្រទូស្តអ្នកដទៃ អ្នកប្រព្រឹត្តខុសក្នុងអបាយមុខ ស្រី ស្រា ល្បែងពាលា សេពគប់នឹងបុគ្គលបាប…ទាំងអស់ហ្នឹងហើយជាភ្លើងនរកនោះ ។
សត្វលោកណាដែលមានចិត្តប្រាសចាកកុសលធម៌ រស់នៅខ្វះភាពបរិសុទ្ធ បុគ្គលនោះឯងគឺជានរក ព្រោះបុគ្គលបាបមិនដែលមានចិត្តត្រជាក់ទេ តែងក្តៅងំជាប់ជានិច្ចនៅក្នុងអារម្មណ៍ គ្មានសេចក្តីសុខឡើយ ។
ចែករំលែកព័តមាននេះ