ម្តេចបាត់ដំណឹងកូនឈឹង កន្លែងធ្វើការរបស់កូនបានឈប់សម្រាកឬទេ? បើបានសម្រាក កូនមកលេងនឹងពុកម៉ែផង កូនអ្នកជិតខាងគេមកជុំគ្នាបណ្តើរៗហើយ គេសើចសប្បាយហាក់មានសុភមង្គលណាស់ ។ ចំណែកផ្ទះយើងស្ងាត់ជ្រងំធ្វើឱ្យម៉ែខ្លោចចិត្តហូរទឹកភ្នែកទាំងមិនដឹងខ្លួនព្រោះតែនឹកកូន ម៉ែចង់ឃើញកូនៗមកជួបជុំគ្នា សើចលេងសប្បាយដូចគ្រួសារអ្នកជិតខាងដែរ ។
ពុកម៉ែចង់ប្រាប់កូនថា ក្នុងបេះដូងពុកម៉ែមានរូបកូនជានិច្ច អ្នកដែលស្មោះជាមួយកូន គឺមានតែពុកម៉ែប៉ុណ្ណោះ ព្រោះពុកម៉ែហ៊ានទទួលយកនូវទង្វើរបស់កូនគ្រប់បែបយ៉ាង មិនថាទង្វើនោះជាទង្វើវិជ្ជមាន ឬទង្វើអវិជ្ជមានទេ ទោះកូនអាក្រក់ល្អ ស ខ្មៅ ត្រូវខុសយ៉ាងណា ក៏ពុកម៉ែទទួលយកបានដែរ ។
ចំពោះអ្នកដទៃ គេអាចទទួលយកបានតែចំពោះភាពវិជ្ជមានរបស់កូនប៉ុណ្ណោះ ចំណែកចំណុចមិនល្អ ភាពអវិជ្ជមាន ទង្វើអាក្រក់ កំហុសឆ្គងរបស់កូន គេមិនអាចទទួលយកបានជាដាច់ខាត ហើយគេប្រាកដជាបោះបង់ចោលកូនមិនខាន ។
តែចំពោះពុកម៉ែទោះបីកូនជាមនុស្សយ៉ាងណាក៏ដោយក៏កូននៅតែជាកូនរបស់ពុកម៉ែ ពុកម៉ែនៅតែស្រឡាញ់កូន ហើយនឹងលើកលែងឲ្យកូនជានិច្ច មិនដែលយកទោស អូសដំណើរកូនឡើយ នេះហើយគឺជាបេះដូងពុកម៉ែ ដែលស្មោះចំពោះកូន ។
ប្រញាប់មកជួបពុកម៉ែ ពុកម៉ែកំពុងទន្ទឹងរង់ចាំផ្លូវកូនគ្រប់ដង្ហើម ម៉ែនឹកកូន ម៉ែស្រឡាញ់កូន ម៉ែមិនប្រាថ្នាអ្វីក្រៅពីនេះទេ ឆាប់មកណាកូនថ្ងៃបុណ្យចូលឆ្នាំថ្មីចេះតែរង្កិលទៅមុខហើយ ។
ចែករំលែកព័តមាននេះ