រាជធានីភ្នំពេញ៖ រ័ត្ន រចនា បានសម្តែងក្តីរំភើបរីករាយឥតឧបមា ចំពោះការគាំទ្ររូបនាងពេលសម្តែងជាលើកដំបូងនៅក្នុងប្រទេសអូស្ត្រាលី ក្នុងរយៈពេលជាងមួយខែមកនេះ ។ តារាចម្រៀងរូបនេះបានចាកចេញពីកម្ពុជាទៅអូស្ត្រាលីកាលពីថ្ងៃទី២៥ មីនា ឆ្នាំ២០១៩ ហើយបានវិលមកវិញកាលពីពេល ថ្មីៗកន្លងមក ។
រ័ត្ន រចនា និយាយថា «ក្នុងដំណើរបេសកកម្មច្រៀងរាំនៅក្នុងប្រទេសអូស្រាលីដែលមានរយៈពេលប្រមាណជា៥សប្តាហ៍កន្លងមកនាងខ្ញុំពិតជាមានក្តីរំភើបយ៉ាងខ្លាំង ព្រោះបងប្អូនខ្មែរនៅទីនោះបានទទួលរាក់ទាក់ និងគាំទ្រដល់នាងខ្ញុំ និងតារាផ្សេងទៀតដែលចេញទៅសម្តែងនៅទីនោះ ។ បងប្អូនខ្មែរនៅទីនោះបានពេញចិត្ត និងចង់ឃើញយើងដោយផ្ទាល់ ទើបពួកគាត់បាននាំគ្នាទិញសំបុត្រស្ទើរគ្មានកីអីអង្គុយ ដែលចំនួនអ្នកចូលទស្សនានោះលើសពីការរំពឹង ធ្វើឲ្យនាងខ្ញុំ និងតារាផ្សេងទៀតពិតជាសប្បាយរីករាយរកពាក្យអ្វីប្រៀបផ្ទឹមបានឡើយ »។
នេះជាលើកទីមួយហើយដែលរ័ត្ន រចនា បានទទួលការគាំទ្រច្រើនពីជនរួមជាតិនៅក្រៅប្រទេស។ កន្លងមកហាក់មិនសូវចាប់អារម្មណ៍លើនាងខ្លាំង ដោយសារតែគេមិនទាន់ស្គាល់នាងច្បាស់ ។ «ការទទួលបានការគាំទ្ររបស់បងប្អូននៅក្រៅប្រទេសនាពេលនេះទំនងជានាងខ្ញុំល្បីឈ្មោះ ក្រោយច្រៀងបទ«មេម៉ាយសប្បាយចិត្ត» បើទោះបីជាមានអ្នកខ្លះសម្តែងការពេញចិត្តទឹកដមសំឡេងរបស់នាងខ្ញុំក៏ដោយ »។ រ័ត្ន រចនា និយាយបែបនេះ ។
រ័ត្ន រចនា សង្ឃឹមថានាងនឹងបានជោគជ័យថ្មីទៀតសម្រាប់ការចេញសម្តែងនៅប្រទេសផ្សេងទៀត បើទោះបីជាប្រទេសដែលជាគម្រោងនោះនៅមិនទាន់ចេញជារូបរាងនៅឡើយក្តី។ សម្រាប់ជោគជ័យនៅលើទឹកដីអូស្ត្រាលីរ័ត្ន រចនា ឲ្យដឹងថា នាងអាចរកប្រាក់នៅទីនោះច្រើនគួសម ប៉ុន្តែបើប្រៀបធៀបជាមួយចំណូលដែលរកបានក្នុងស្រុកមិនលើសខ្វះគ្នាច្រើនប៉ុន្មានឡើយ ។
ដំណើរចេញទៅច្រៀងរាំនៅប្រទេសអូស្ត្រាលីពីតារាចម្រៀងរ័ត្ន រចនា ហៅមេម៉ាយសប្បាយចិត្ត គឺជាការសម្រេចគម្រោងទីមួយ លើផែនការដែលនាងចង់ចេញទៅច្រៀងនៅប្រទេស២ផ្សេងទៀតគឺបារាំង និងអាមេរិក ។
ការចេញទៅសម្តែងនៅប្រទេសអូស្ត្រាលីគឺជាការឆ្លើយតបតាមការអញ្ជើញពីសមាគមមួយក្នុងរដ្ឋមេលប៊ន ប្រទេសអូស្ត្រាលី ដើម្បីផ្តល់ភាពសប្បាយរីករាយ និងការរាំលេងសប្បាយសម្រាប់ជនរួមជាតិខ្មែរដែលរស់នៅទីនោះក្នុងអំឡុងបុណ្យចូលឆ្នាំខ្មែរ ៕
ចែករំលែកព័តមាននេះ