ចិត្តជាឪពុកម្ដាយគ្រប់រូប មិនដែលមានម៉ែឪណាដែលមិននឹកកូន មិនគិតដល់កូននោះទេ ពុកម៉ែតែងនឹកកូនគិតកូនគ្រប់ពេល ទឹកភ្នែករបស់ពុកម៉ែតែងស្រក់ហូរមកជារឿយៗ ព្រោះក្តីស្រឡាញ់កូន ត្រូវការកូនក្នុងឱកាសដ៏ពិសេសប៉ុន្មានថ្ងៃខាងមុខនេះ ។
កូនអើយនៅពេលដែលកូនឃ្លាតឆ្ងាយពីពុកម៉ែ ឬពេលដែលកូនមិននៅជិតម៉ែ ក្នុងទ្រូងពុកម៉ែតឹងណែនចង្អៀត អួលអាក់ព្រោះម៉ែនឹកកូនខ្លាំងណាស់ ។
ក្នុងចិត្តរបស់ពុកម៉ែតែងនឹកគិតដល់កូនជានិច្ច ចុះក្នុងចិត្តរបស់កូនមានដែលនឹកដល់ពុកម៉ែទេ? ឬក៏ទាល់តែកូនជួបឧបសគ្គផ្សេងៗ ឬទាល់តែមានការងារចង់ឲ្យម៉ែជួយ ទើបកូននឹកដល់ម៉ែ កូនត្រូវការម៉ែ ។
កូនមានដឹងទេថា គ្រប់ពេលវេលាដែលម៉ែឃើញគ្រួសារអ្នកជិតខាងគេមកជួបជុំគ្នាសើចសប្បាយក្អាក់ក្អាយ ម៉ែតែងនឹកដល់កូន ម៉ែស្រក់ទឹកភ្នែក ម៉ែចង់ឲ្យកូនរបស់ម៉ែមកជុំគ្នាសប្បាយរីករាយដូចគ្រួសារគេដែរ ចង់ឱ្យកូនមកហូបបាយជុំគ្នាជាមួយនឹងពុកម៉ែ ចង់ឱ្យកូនជូនម៉ែទៅវត្តក្នុងឱកាសបុណ្យចូលឆ្នាំថ្មីនឹងគេ ហើយគ្រប់ពេលវេលា ។
ម៉ែត្រូវការកូនខ្លាំងណាស់ ម៉ែប្រាថ្នាចង់ឲ្យកូនមកមើលម៉ែ ចង់ឲ្យកូនមកដើម្បីឲ្យម៉ែឃើញមុខនៅក្នុងឱ្យបុណ្យចូលឆ្នាំថ្មីខាងមុខនេះ ព្រោះម៉ែនឹកកូន ម៉ែចង់ឲ្យកូនមកនៅនែបនិត្យជិតពុកម៉ែ បើកូនគ្មានអ្វីយកមកជូនពុកម៉ែក៏ហីទៅចុះ ឲ្យតែកូនគ្រប់គ្នាមកឲ្យពុកម៉ែឃើញមុខតែប៉ុណ្ណឹង ពុកម៉ែសប្បាយចិត្តរកអ្វីប្រៀបផ្ទឹមគ្មានឡើយ ។
ចែករំលែកព័តមាននេះ