មិនមែនក្រៅតែពីការងាររកទទួលទានបានសមប្រកបហើយក៏ត្រូវចប់ដែរនោះទេ គឺនៅតែមានការងារសុចរិតជាច្រើនទៀតដែលយើងត្រូវធ្វើ ឬត្រូវសន្សំតាមដួងចិត្ត ត្រូវអប់រំស្មារតីឱ្យធ្លាក់ក្នុងអំពើល្អរាល់ថ្ងៃដោយគ្មានពេលសម្រាកឡើយ ។ តែមិនដូច្នោះទេមនុស្សពួកខ្លះពេលទំនេរមិនគិតសន្សំបុណ្យកុសលទេបែរជាទៅអង្គុយនិយាយដើមគេ ពិតជាមិនល្អសោះឡើយ ។
ពិតជាបែបនេះមែនការងារអាក្រក់មានច្រើនណាស់ ដែលអ្នកធ្វើហើយតែមិនបានគិតថា វាជាអំពើបាបនោះឧទាហរណ៍ដូចជា ការមានចិត្តបៀតបៀនគេ ឈ្នានីសគេ និយាយដើមគេ ច្រណែនគេ ព្យាបាទគេ ខឹងគេ តូចចិត្តនឹងគេ ដែលទាំងអស់នេះមានមនុស្សជាច្រើន ពេលទំនេរក៏ទៅអង្គុយនិយាយពីនេះខ្លះ ពីនោះខ្លះ អ្នកនេះមិនល្អយ៉ាងនេះ អ្នកនោះអាក្រក់យ៉ាងនេះ យ៉ាងនោះជាដើម នេះគឺជាការងារដ៏អាក្រក់មួយ តែបុគ្គលមិនបានគិតថាវាជាអំពើបាបទេ ព្រោះគេគិតថាមិនបានទៅធ្វើផ្ទាល់ដៃ ឬទៅសម្លាប់គេ ។
តាមពិតទៅអំពើបាបមិនមែនទាល់តែអ្នកទៅសម្លាប់ជីវិតគេនោះទេ មិនបានសម្លាប់គេក៏មានបាបដូចគ្នាដូចជា យើងមានគំនិតមិនល្អ ការទៅនិយាយដើមគេហ្នឹងជាប្រភពនាំឱ្យបាបនោះ ពោលគឺនរណានៅមានអកុសលមូល លោភៈ ទោសៈ មោហៈ បាបនឹងមាននៅក្នុងបុគ្គលនោះ ហើយអពមង្គលក៏កើតឡើងក្នុងពេលដំណាលគ្នាដែរ ។
ព្រះពុទ្ធទ្រង់មិនសរសើរការងារណា ដែលជាការងារមិនប្រក្រតី ការងារមានទោសនាំមកនូវសេចក្តីវិនាស នាំមកនូវអពមង្គលនោះឡើយ ។
ចែករំលែកព័តមាននេះ