មើលចុះមនុស្សមួយចំនួនមានមុខមានមាត់ក្នុងសង្គមមានពេលវេលាដើរទាក់យកចិត្តថ្លើមអ្នកដទៃ ជាងមានពេលនៅជាមួយគ្រួសារខ្លួនឯង ឬក៏ត្រូវស្ទុះទៅលិច ស្ទុះទៅកើតដើម្បីរកផលប្រយោជន៍របស់ខ្លួនរហូតមិនមានពេលល្ហែ ឲ្យពេលទៅប្រភពខាងក្រៅច្រើនជាងឲ្យដល់គ្រួសារ ឬពុំនោះសោត ត្រូវប្រឹងប្រែងព្យាយាម ប្រចុបប្រចែងអ្នកតូចអ្នកធំដើម្បីផលប្រយោជន៍នោះៗ ។
ប៉ន្តែអ្នកខ្លះនៅពេលដែលយើងធើ្វខ្លួនជាមនុស្សធ្វើការដោយទឹកចិត្តស្មោះត្រង់ ប្រកបរបរត្រឹមត្រូវ និងជាអ្នកស្រឡាញ់យុត្តិធម៌នោះ គេអាចមើលមកថា យើងជាមនុស្សល្ងង់ ងប់ងល់នឹងការងារ មិនចេះរកស៊ី មិនចេះចង់មានចង់បាន មិនចេះឆក់ឱកាសដូចគេទេ ។ កូនអើយព្រមឲ្យគេថាល្ងង់ចុះ កុំតូចចិត្ត កុំធ្លាក់ទឹកចិត្តព្រោះសម្តីស៊កសៀតទាំងនេះមិនមែនជាការពិតរបស់យើងទេ ។
កូនធ្វើការដោយស្មោះត្រង់ មានទឹកចិត្តចំពោះអ្នកដទៃ ស្លូតបូតត្រឹមត្រូវ សូម្បីមិនសូវមានទ្រព្យសម្បត្តិដូចគេក៏ដោយ តែកូនសប្បាយចិត្តនឹងអំពើសុចរិតរបស់យើង ។ គ្រួសារយើងអាចខ្វះខាតខ្លះ ប៉ុន្តែមានការកក់ក្តៅ រស់នៅឃើញមុខគ្នារាល់ថ្ងៃ មិនគិតខ្វល់ឬរង្កៀសចិត្តក្នុងរឿងអ្វីច្រើនឡើយ ។
ដូច្នេះបុគ្គលដែលគាត់គិតថា ខ្លួនគាត់ឆ្លាត តែគាត់ភ្លេចថា ព្រោះការឆ្លាតរបស់ខ្លួននោះឯងបានធ្វើឲ្យខ្លួនមិនមានពេលបរិភោគ ឬបរិភោគខុសពេល មិនមានពេលដេក មិនមានពេលសម្រាក និងមិនមានពេលឲ្យដល់គ្រួសារគ្រប់គ្រាន់ ធ្វើឲ្យគ្រួសារខ្វះការកក់ក្តៅនោះ ។
ចែករំលែកព័តមាននេះ