រាជធានីភ្នំពេញ ៖ មាស សុខសោភា លះបង់ពេលវេលានៅក្នុងស្រុក ចេញទៅសម្តែងរយៈពេលយូរនៅប្រទេសកាណាដា ទីដែលស្វាមីរបស់នាងរស់នៅ ។ ការចេញដំណើរនេះបានប្រារព្ឋពិធីជប់លៀងលាគ្នាជាមួយមិត្តសិល្បៈ និងអ្នកគាំទ្រ…
រាជធានីភ្នំពេញ ៖ មាស សុខសោភា លះបង់ពេលវេលានៅក្នុងស្រុក ចេញទៅសម្តែងរយៈពេលយូរនៅប្រទេសកាណាដា ទីដែលស្វាមីរបស់នាងរស់នៅ ។ ការចេញដំណើរនេះបានប្រារព្ឋពិធីជប់លៀងលាគ្នាជាមួយមិត្តសិល្បៈ និងអ្នកគាំទ្រ ទាំងក្តីអាឡោះអាល័យរបស់មាស សុខ សោភា ។
មាស សុខសោភា ក្តាប់បានការងារសិល្បៈនៅក្នុងស្រុកមិនចាញ់តារាល្បីផ្សេងទៀតប៉ុន្មានទេ ឯនៅក្រៅប្រទេសក៏ល្អ ដោយនាងទៅច្រៀងនៅប្រទេសណា ក៏មានអ្នកគាំទ្រចូលរួមទស្សនាច្រើនដែរ ។
នេះជាលើកដំបូងដែលតារាចម្រៀងមាស សុខសោភា និងស្វាមីរៀបចំពិធីជប់លៀងយ៉ាងអធិកអធម កាលពីថ្ងៃទី២ មេសា ឆ្នាំ២០១៩នៅភោជនីយដ្ឋានមួយ ដោយមានការចូលរួមពីមិត្តភក្តិក្នុង និងក្រៅសិល្បៈជាច្រើន វាជាការជប់លៀងអបអរសាទរការចេញដំណើរផង និងលាគ្នាផង ដ្បិតការចេញដំណើររបស់មាស សុខសោភាលើកនេះក្នុងរយៈពេលយូរ ។
ពិធីជប់លៀងរបស់តារាចម្រៀងប្រចាំផលិតកម្មថោនមាស សុខសោភា ដាក់ឈ្មោះថា «Thank you night party» ធ្វើឡើងដើម្បីអរគុណដល់អ្នកគាំទ្រនាង ដែលបានគាំទ្រក្នុងរយៈពេលប្រមាណជា២០ឆ្នាំកន្លងមកនេះ ។ ជាពិសេសជាការជម្រាបលាអ្នកគាំទ្រមួយរយៈពេលវែងដល់ទៅជាងកន្លះឆ្នាំ ដោយនាងត្រូវទៅសម្តែងនៅប្រទេសកាណាដា ។ នេះជាការសម្តែងនៅក្រៅប្រទេសរយៈពេលវែងរបស់តារាចម្រៀងមាស សុខសោភា ជាលើកដំបូង ។
ក្នុងពិធីជប់លៀងនោះមាស សុខសោភា តុបតែងខ្លួនយ៉ាងស្រស់ស្អាត ជាមួយស្វាមីលោកអ៊ិត ដារ៉ា ។ អ្នកទាំងពីរឈរញញឹមរាក់ទាក់ទទួលភ្ញៀវ ។ តារាចម្រៀងសំនៀងផ្អែមមាស សុខសោភាទទួលបានការជូនពរ និងបាច់ផ្កាយ៉ាងស្រស់ស្អាតពីអ្នកចូលរួម និងមិត្តភក្តិក្នុងសិល្បៈ មានដូចជាលោកឆន សុវណ្ណរាជ សុគន្ធ ថេរ៉ាយុ ហ្សូណូ ឃុំ ប៉ុណ្ណាដែត រ៉េត ធីដូណា រ៉ូលីន ញឹម ចាន់ថន សុគន្ធ និសា សុខ សីឡាលីន យក់ ឋិតរដ្ឋា និងខៀវ សានសាណា ជាដើម ។
សម្រាប់ពិធីបុណ្យចូលឆ្នាំថ្មីប្រពៃណីជាតិ លើកនេះ មាស សុខសោភា មិនបាននៅកម្សាន្តក្នុងស្រុកទេ នាងត្រូវទៅច្រៀងនៅប្រទេសកាណាដា ។ មាស សុខសោភា តែងតែចេញទៅច្រៀងនៅក្រៅប្រទេសយ៉ាងហោចណាស់១ឆ្នាំម្តង ៕
ចែករំលែកព័តមាននេះ