រាជធានីភ្នំពេញ៖ កញ្ញាបាន មុនីលក្ខ័ រីកសាយកេរ្តិ៍ឈ្មោះចាប់តាំងពីពេលចូលរួមប្រឡងចម្រៀងលំដាប់ពិភពលោក នៅស្ថានីយទូរទស្សន៍ហង្សមាសមក ។ មហាជនយល់ថាមុនីល័ក្ខ នឹងសាងស្នាដៃច្រើននៅផលិតកម្មនោះ ។ ទោះជាយ៉ាងណាក្តីនាងមិនស្ថិតនៅផលិតកម្មនោះទេក្រោយចប់កិច្ចសន្យា ។
ស្រីស្អាតបាន មុនីលក្ខ័ បានទាក់ទាញការចាប់អារម្មណ៍ពីមហាជនតាមរយៈការច្រៀងបទខូវើផ្សាយនៅលើយូធូប ។ បណ្តាបទដែលនាងច្រៀងខូវើនោះទទួលបានការគាំទ្រពីមហាជន ។
កាលពីពេល ថ្មីៗកន្លងមកបាន មុន្នីល័ក្ខ និយាយឲ្យដឹងថា «ខ្ញុំផុតកុងត្រានៅហង្សមាស ហើយ អ៊ីចឹងពេលនេះខ្ញុំនៅទំនេរ មិនមែនជាតារាចម្រៀងរបស់ផលិតកម្មណាមួយទេ ។ ខ្ញុំចាំមើលដែរថា តើហង្សមាសនឹងបន្តកុងត្រាថ្មីឱ្យខ្ញុំទៀត ឬអត់ ? តែពេលនេះគ្មានដំណឹងពីគាត់សោះ ! តែខ្ញុំនៅតែច្រៀងកម្មវិធី ផ្សេងៗឱ្យហង្សមាស ដដែលទេ ដូចជា Concert គាត់ និងកម្មវិធីនៅប៉ុស្តិ៍គាត់អ៊ីចឹង»។
ស្រីស្អាតបាន មុនីល័ក្ខ និយាយទៀតថា«នាងខ្ញុំក៏តែងតែនឹកក្នុងចិត្តថាមានការងារល្អក្នុងសិល្បៈដោយសារតែប្រឡងចម្រៀងនៅហង្សមាស បើមិនមានទេសិល្បៈនាងខ្ញុំក៏មិនដឹងថាជាបែបណាដែរអាចថានៅទ្រឹងជាក់ជាមិនខាន ។ប្រសិនបើមិនទាន់មានផលិតកម្មច្រៀងគឺមានតែបន្តចេញចម្រៀងតាមដំណើរព្រោះតាំងពីខូវើបទចម្រៀង ពីដើមៗរបស់រៀមច្បងមកឃើញថាប្លែកខ្លាំងមានការចាប់អារម្មណ៍ច្រើនដែលនាងខ្ញុំនៅតែបន្តច្រៀងបទចាស់ ប្លែកៗឲ្យច្រើនទៀត»។
បាន មុនីល័ក្ខ ជាអតីតបេក្ខភាពកម្មវិធីប្រលងចម្រៀង The Voice Cambodia រដូវកាលទី១ តែបានធ្លាក់ចេញនៅវគ្គពាក់កណ្តាលកម្មវិធី ។ ទោះជាយ៉ាងណាក្តីផលិតកម្មហង្សមាស បានរុញនាងឱ្យចូលទៅជ្រកនៅផលិតកម្ម We-Production តែនាងមិនសូវលេចធ្លោឡើយ ព្រោះបទចម្រៀងចេញតិចពេក ។
មហាជនយល់ថា បាន មុនីល័ក្ខ នឹងមានផលិតកម្មមួយចំនួនចាំត្រងយករូបនាងមិនខាន ប្រសិនបើហង្សមាស មិនបន្តកិច្ចសន្យាឱ្យនាង ស្របពេលដែលមុននេះមុនីល័ក្ខ លេចមុខច្រៀងឆ្លងឆ្លើយជាមួយខាន់ ជេមស៍ ធ្វើឲ្យគេសង្ស័យថា នាងក្លាយទៅជាតារារបស់ផលិតកម្មសាន់ដេ ។ លើសពីនេះរវាងមុនីល័ក្ខ និងលោកជេមស៍ លេចឭថាត្រៀមចេញទៅច្រៀងនៅអាមេរិកនាពេល ឆាប់ៗទៀតផង ៕
ចែករំលែកព័តមាននេះ