រឿងរ៉ាវនៃជីវិតប្រចាំថ្ងៃនេះកើតឡើងមិនចេះចប់ទេ អ្នកខ្លះក៏ដោះស្រាយបញ្ហាទាំងអស់នោះបាន ឯអ្នកខ្លះទៀតដោះមិនចេញ ស្រាយមិនរួចរហូតគិតខ្លីឈានទៅសម្លាប់ខ្លួន ព្រោះយល់ថា មានតែផ្លូវនេះទេទើបបានរួចផុតពីទុក្ខសោក តែគេមិនដឹងថា ទង្វើបែបនេះគ្រាន់តែជាការយល់ខុស ជាភាពឆោតល្ងង់តែប៉ុណ្ណោះ ព្រោះស្លាប់តែរូបកាយ តែចិត្តមានទុក្ខត្រូវទៅចាប់កំណើតនៅកន្លែងដែលមានទុក្ខកាន់តែខ្លាំងគឺ សាងកម្មណាបានកម្មនោះ ចិត្តដែលកំពុងតែមានទុក្ខត្រូវតែទៅកើតនៅកន្លែងដែលមានទុក្ខ នេះជាសច្ចធម៌មិនអាចបំភ្លៃបានឡើយ ។
អ្នកខ្លះត្អូញថា ខ្ញុំអស់សង្ឃឹមខ្លាំងណាស់ ខ្ញុំលំបាកណាស់ ខ្ញុំអស់កម្លាំងណាស់ ខ្ញុំពិតជាឈឺហើយ ខ្ញុំធុញថប់ក្នុងអារម្មណ៍ណាស់ ខ្ញុំជួបតែរឿងអាក្រក់រហូតមក ខ្ញុំអភ័ព្វណាស់ កម្សត់ណាស់ មានវាសនាអាក្រក់ណាស់ជាតិនេះ ។
បើអ្នកមានទិដ្ឋិយ៉ាងនេះមានន័យថា យើងគ្មានសមត្ថភាពធ្វើឲ្យរឿងនោះចេញទៅឲ្យឆ្ងាយពីជីវិតរបស់ខ្លួនទេ យើងយល់ព្រមឲ្យជីវិតជួបតែរឿងអាក្រក់គ្រប់យ៉ាងដោយមិនព្រមរើបម្រះចេញពីផលអាក្រក់ទាំងនោះហើយ ។
អារម្មណ៍បែបនេះប្រៀបបាននឹងការស្រូបទាញយកនូវព្រឹត្តិការណ៍អាក្រក់ៗមកកាន់ជីវិតឲ្យកាន់តែច្រើនឡើងថែមទៀត គឺយើងបានបន្ថែមទម្ងន់ទុក្ខ ទៅលើបញ្ហាដែលកំពុងតែមានស្រាប់ គឺទុក្ខជាន់ទុក្ខតែម្តង ។
ដឹងទេ! ជីវិតយើងទាំងអស់គ្នានេះគឺសុទ្ធតែដូចមនុស្សធ្លាក់រណ្តៅលាមកដែលមានជម្រៅខុសៗគ្នា ហើយប្រឹងប្រវាឡើងមកវិញតាមជញ្ជាំងរណ្តៅ បើមិនប្រឹងប្រវាតោងឡើងមកវិញទេ នឹងធ្លាក់ចុះកាន់តែជ្រៅជាមិនខាន ។ ហេតុនេះបុគ្គលគួរតែមានឆន្ទៈតស៊ូ ព្យាយាម និងអំណត់បំផុតដើម្បីធន់នឹងជីវិតបាន ។
ចែករំលែកព័តមាននេះ