រាជធានីភ្នំពេញ ៖ លោកស្រីឧបនាយករដ្ឋមន្ត្រី ម៉ែន សំអន គូសបញ្ជាក់ថា ប្រទេសជាតិមានសុខសន្តិភាព ស្ថេរភាព ធ្វើអោយមានការរីកចម្រើនអភិវឌ្ឍលើគ្រប់វិស័យក្នុងនោះវិស័យ ព្រះពុទ្ធសាសនាក៏ត្រូវបានលើកកម្ពស់ជាបន្តបន្ទាប់ ។ លោកស្រីម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ច បានលើកឡើងក្នុងពេលដែលលោកស្រី តំណាងសម្តេចតេជោ ហ៊ុន សែន នាយករដ្ឋមន្ត្រីក្នុងពិធីអភិសេកប្រាសាទចតុមុខ នៅក្នុងខេត្តព្រះវិហារ កាលពីពេលថ្មីៗនេះ ដោយបានគូសបញ្ជាក់ថា ប្រទេសជាតិមានសុខសន្តិភាព ស្ថេរភាព ធ្វើឲ្យមានការរីកចម្រើនអភិវឌ្ឍលើគ្រប់វិស័យ ក្នុងនោះវិស័យព្រះពុទ្ធសាសនាក៏ត្រូវបានលើកកម្ពស់ជាបន្តបន្ទាប់ ។
លោកស្រីបានបន្ថែមថា ជាក់ស្តែងពិធីបុណ្យឆ្លងនាពេលនេះ ដើម្បីឧទ្ទិសដល់ព្រះពុទ្ធ សាសនាផងក៏ដូចរួមចំណែកជាមួយរាជរដ្ឋាភិបាលក្នុងការអភិវឌ្ឍជាតិផង និងបានទទួល អានិសង្ឃផលបុណ្យយ៉ាងត្រចះត្រចង់ផងដែរ ។ សមិទ្ធផលថ្មីនេះពិតជានឹងរួមចំណែកជួយដល់ខេត្តព្រះវិហារក្នុងការជំរុញដល់ការទាក់ទាញភ្ញៀវទេសចរជាតិ និងអន្តរជាតិមកទស្សនា និងស្វែងយល់ពីអរិយធម៌វប្បធម៌ខ្មែរដ៏រុងរឿងថែមទាំងបានរួមចំណែកប្រមូលថវិកាជូនជាតិទៀតផង ។
លោកស្រីឧបនាយករដ្ឋមន្ត្រីបញ្ជាក់បន្ថែមថា ប្រាសាទចតុមុខនេះ គឺជាប្រាសាទមួយក្នុងចំណោមប្រាសាទជាច្រើននៅក្នុងក្រុមប្រាសាទបាកាន (ព្រះខ័នកំពង់ស្វាយ) ។ ប្រាសាទនេះមានរូបរាងជាព្រះពុទ្ធទ្រង់ឈរបែរទល់ខ្នងគ្នាចំនួន៤ទិសដែលយើងកម្រឃើញមានប្រាសាទផ្សេងៗទៀត នៅក្នុងប្រទេសកម្ពុជា ហើយការចូលរួមថែរក្សា និងការអភិរក្សប្រាសាទនេះ គឺធ្វើឡើងក្នុងគោលបំណង ១- ការកំណត់កាលបរិច្ឆេទរបស់ប្រាសាទ ២-បញ្ចៀសការដើរជាន់ព្រះកេសព្រះពុទ្ធពីសំណាក់ភ្ញៀវជាតិ និងអន្តរជាតិ ដែលមកទស្សនានៅទីនេះ ៣- លើកកម្ពស់វិស័យទេសចរវប្បធម៌ និងសាសនា និងទី៤- ទាក់ទាញភ្ញៀវទេសចរណ៍មកទស្សនាកាន់តែច្រើន ដើម្បីលើកកម្ពស់ជីវភាពប្រជាជននៅក្នុងតំបន់ ។
សូមបញ្ជាក់ថា ក្រសួងវប្បធម៌ និងវិចិត្រសិល្បៈ និងសហការី បានសិក្សាស្រាវជ្រាវ និងជួសជុលប្រាសាទនេះឡើងវិញដោយប្រើពេលវេលាប្រមាណជាង៥ខែ គឺពីថ្ងៃទី១៩ ខែមីនា ឆ្នាំ២០១៨ ដល់ថ្ងៃទី៩ ខែកញ្ញា ឆ្នាំ២០១៨ ទើបបានបញ្ចប់ក្រោមកិច្ចសម្របសម្រួលពីសំណាក់អាជ្ញាធរខេត្តរួមជាមួយអង្គភាពពាក់ព័ន្ធនានា ៕
ចែករំលែកព័តមាននេះ