ខេត្តកំពង់ធំ ៖ បុរសម្នាក់ចងកសម្លាប់ខ្លួនបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៣និង៣០នាទីរសៀលថ្ងៃទី២៨ ខែមីនា ឆ្នាំ២០១៩ នៅលើផ្ទះជនរងគ្រោះ ស្ថិតក្នុងភូមិកណ្តោលចាស់ ឃុំព្រះដំរី ស្រុកស្ទោង ខេត្តកំពង់ធំ ។
លោកវរសេនីយ៍ទោ វ៉ន សុភ័ណ អធិការរងនគរបាលស្រុកស្ទោងប្រាប់ថា ជនរងគ្រោះដែលស្លាប់ឈ្មោះ ប៊ន ជា ភេទប្រុស អាយុ៣១ឆ្នាំ រស់នៅភូមិឃុំកើតហេតុខាងលើ ។
យោងតាមការបំភ្លឺពីឈ្មោះ អូន លីម អាយុ៥១ឆ្នាំ ត្រូវជាម្តាយរបស់ជនរងគ្រោះបានបញ្ជាក់ថា កន្លងមកកូនរបស់គាត់ជាមនុស្សប្រើប្រាស់គ្រឿងញៀន ហើយតែងតែរករឿងគាត់ និងប្រពន្ធជាញឹកញាប់ ។
ប្រភពដដែលបានបន្តថា នៅមុនពេលកើតហេតុ កូនប្រុសបានទារលុយដែលគាត់ជំពាក់ចំនួន៣លានរៀល តែគាត់ប្រាប់ថា« ម៉ែមិនទាន់មានទេ» ឮដូច្នោះកូនគាត់និយាយថា «បើមិនបានច្រើន តែប្រាំម៉ឺនរៀលក៍យកដែរ» តែគាត់ពុំបានអោយលុយកូនប្រុសនោះទេ បន្ទាប់មកគាត់ឃើញកូនរបស់គាត់មានសភាពប្លែកៗ ចេះតែរវើរវាយហើយនិយាយថា«ឈប់អោយម៉ែឃើញមុខទៀតហើយ គេ(ជនរងគ្រោះ)នឹងចងកសម្លាប់ខ្លួន» ។
ប្រភពដដែលបានបន្តទៀតថា ក្រោយមកកូនរបស់គាត់បានដើរចូលទៅក្នុងបន្ទប់បិទទ្វារបង្អួចដាក់គន្លឹះជាប់ គាត់សង្ស័យកូនសង្ងំជក់ថ្នាំញៀន គាត់ក៏បានឡើងលើផ្ទះមើលតាមប្រហោងរនាបឃើញកូនប្រុសដេកប្រែខ្លួនចុះឡើងៗ រួចគាត់ក៏បានចុះមកដីវិញ ។
បន្ទាប់មកទៀតគាត់ក៏ទៅអើតមើលម្តងទៀត តែរកមើលមិនឃើញ គាត់ក៏ហៅ តែកូនប្រុសមិនឆ្លើយ គាត់ក៏បានយកចបជីកគាស់បង្អួចមើល ស្រាប់តែឃើញកូនប្រុសចងកនឹងផ្ទោងដំបូលផ្ទះស្លាប់បាត់ទៅហើយ ពេលនោះគាត់ក៏បានហៅអ្នកជិតខាងឱ្យជួយគាស់ចំរឹងបង្អួចដើម្បីចូលបើកគន្លឹះទ្វារ កាត់ចំណងដាក់សពចុះមកក្រោម រួចរាយការណ៍ជូនសមត្ថកិច្ចតែម្តង។
បន្ទាប់ពីទទួលបានសេចក្តីរាយការណ៍ខាងលើភ្លាមនេះ សមត្ថកិច្ចក៏ចុះទៅពិនិត្យសពដល់កន្លែងកើត ហេតុ រកឃើញមានកន្សែងចងភ្ជាប់និងខ្សែអង្រឹងចងភ្ជាប់នឹងផ្ទោងដំបូលផ្ទះ រីឯសពមានស្នាមជាំនៅជុំវិញកផ្នែកខាងមុខ ក្រៅពីនេះពុំមានស្លាកស្នាមនៅកន្លែងផ្សេងឡើយ។
ឆ្លងតាមការពិនិត្យ សមត្ថកិច្ចបានសន្និដ្ឋានថា ជនរងគ្រោះពិតជាធ្វើអត្តឃាតដោយចងកសម្លាប់ខ្លួន ប្រាកដមែន រួចក៏ប្រគល់សពជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕
ចែករំលែកព័តមាននេះ