តាមប្រភពព័ត៌មាន Sky Sports បានឱ្យដឹងថា កីឡាករជើងខ្លាំង Neymar កំពុងតែធ្វើការពិភាក្សាពីការបន្តកុងត្រានៅក្លិបអ្នកមានបារាំង Paris Saint-Germain។ នេះគឺជាអ្វីដែលឪពុករបស់គេបានប្រាប់។
កីឡាករប្រេស៊ីលរូបនេះ តែងតែមានគេនិយាយថានឹងទៅលេងឱ្យ Real Madrid រហូតតាំងពីពេលចូលមកលេងនៅ PSG ភ្លាម ក្នុងតម្លៃ ១៩៨លានផោន កាលពីឆ្នាំ២០១៧ តែឪពុករបស់គេឈ្មោះ Neymar Sr. បានប្រាប់ថា នាពេលនេះកីឡាករវ័យ២៧ឆ្នាំរូបនេះ កំពុងតែនិយាយគ្នាជាមួយនឹង PSG ពីការបន្តកុងត្រា។
លោក Neymar Sr. បានប្រាប់សារព័ត៌មាន UOL ថា៖«Neymar បានផ្លាស់ក្លិបចំនួន២ដងតាំងពីលេងបាល់មកដល់ពេលនេះ តែគេនៅតែសង្ស័យថា Neymar អាចនឹងទៅលេងនៅ Real Madrid តាំងពី១០ឆ្នាំមកម្ល៉េះ។ ភាគរយដែលគេមិនទៅលេងនៅទីនោះ គឺខ្ពស់ខ្លាំងណាស់»។
ឪពុកម្នាក់នេះបានបន្តថា៖ «គេកំពុងតែស្ថិតនៅឆ្នាំទី២នៃកុងត្រារបស់គេ។ ដូចនេះគេនៅសល់៣ឆ្នាំទៀត សម្រាប់កុងត្រាបច្ចុប្បន្ន ហើយពួកយើងបានទៅពិភាក្សាគ្នាពីការបន្តកុងត្រារួចហើយ»។
គួរបញ្ជាក់ផងដែរថា កាលពេលកន្លងមកថ្មីៗនេះ នាយកក្លិប Real Madrid លោក Florentino Perez ថានឹងយកទាំង Neymar និង Mbappe មកក្លិបរបស់ខ្លួន ក្រោយពេលបានលោក Zinedine Zidane មកកាន់តំណែងជាគ្រូបង្វឹក ៕
ចែករំលែកព័តមាននេះ