រាជធានីភ្នំពេញ៖ មានការកើនឡើងនៅលើហ្វេសប៊ុកចំពោះការផ្សាយបទចម្រៀងខូវើមរតកដើម ដោយតារាចម្រៀងសម័យបច្ចុប្បន្ន។ ពួកគេបានកែសម្រួលបទ ចាស់ៗ ហើយច្រៀងឡើងវិញជាមួយបច្ចេកវិទ្យាទំនើបតាមសម័យកាល ។
បទចម្រៀងដែលត្រូវបានយកមកខូវើច្រៀងឡើងវិញផ្សាយតាមហ្វេសប៊ុក និងយូធូបក្លាយជាទីចាប់អារម្មណ៍ពីប្រិយមិត្តអ្នកស្តាប់ ដោយសារនោះជាប្រភេទបទចម្រៀងដែលនិពន្ឋឡើងដោយកវីជំនាន់មុនមានលក្ខណៈពីរោះរួចទៅហើយ ។ អីុចឹងហើយចម្រៀងមរតកដើមទាំងនោះនៅតែមានការពេញនិយមគ្រប់កាលៈទេសៈបំពេអារម្មណ៍ប្រិយមិត្តអ្នកស្តាប់ ។
តារាចម្រៀងដែលខូវើបទចម្រៀងចាស់ មានដូចជា តារាចម្រៀងបាន មុនីលក្ខ័ណ៍ ជាដើម ។ មុន្នីលក្ខណ៍ ខូវើបទរាំវង់ កន្ទ្រឹមដូចជាបទ«លលកវាយំ»«ក្រមុំរើសប្តី»«ក្រយប់ម្ល៉េះឬថ្ងៃនេះរៀបការ»«សង្ឃឹមថ្ងៃមួយ»និងបទរបស់អ្នកនាងម៉េង កែវពេជ្ជតា ជាដើម ។
ចំណែកកញ្ញាចាន់ ស្រីនាថ ខូវើដូចជាបទ«កុំរំអួយ»«ដៃសមុទ្រត្រពាំងរូង»«ថ្ងៃនេះអូនញាំស្រា»«ភ្លេចពាក្យសម្បថ»និងបទ«ថៅកែត្បូងណាកូន»។ រីឯតារាចម្រៀងសៅ ឧត្តម វិញខូវើបទ«ចន្ឋូ»«ក្លិនក្រអូប»«យំបីរាត្រី»«បងនាំស្រីរត់»«បងផ្ញើកូនផង»ជាប្រភេទបទពេញនិយមចាក់ស្តាប់គ្រប់ទិសទី ។ ចំពោះលោកអ៊ាម វណ្ណី កំពុងល្បីបទ«គេលេងភ្លេងហើយ»បទ«ផ្ការីកក្នុងចិត្ត»។
លោកអៀង វុត្ថា មានបទ«បាត់ស្រីទៅណា»បទ«ស្រអែមដងស្ទឹងសង្កែ»បទ«ក្លិនផ្កាម្លិះ»បទ«អ្នកគ្រូក្រមុំ» ។ ក្រៅពីនេះមានតារា ផ្សេងៗទៀតដូចជា សុវត្ថិឌី ធារិកា តន់ ចាន់សីម៉ា យុទ្ឋ និស្ស័យ និងលោកអេឡិច ចិន្ត្រាជាដើម ។
អ្នកនាងយុគ ចិន្តា និយមផ្តល់ឱកាសឲ្យតារាចម្រៀងខូវើបទពីដើមឡើងច្រៀងក្នុងកម្មវិធី«សោភ័ណតន្ត្រីសុីធីអិន»ផ្សាយផ្ទាល់រាល់ថ្ងៃសៅរ៍វេលាថ្ងៃត្រង់បាននិយាយកាលពីពេល ថ្មីៗកន្លងមកថា«នាងខ្ញុំតែងតែឲ្យ ប្អូនៗជំនាន់ក្រោយដែលច្រៀងចម្រៀងពីដើមមកសម្តែងលើឆាកដើម្បីបង្ហាញថាបទពីដើមគឺនៅតែពេញនិយមមិនសាបរលាបឡើយ ទោះសម័យណាក៏ដោយ ។ នេះជាការជួយលើកទឹកចិត្តដល់ប្អូនៗរលកក្រោយដែលបានជួយបន្តការពារមរតកសម័យមុនទោះជាច្រៀងឡើងវិញតែក៏មិនកាត់ចោលពាក្យពេចន៍ដើមឡើយ »។
កញ្ញាបាន មុនីលក្ខ័ណ៍ និយាយថា«អារម្មណ៍សប្បាយចិត្តដែលបទចម្រៀងដែលនាងខូវើឡើងវិញនៅតែទទួលការគាំទ្រ ហើយពេញនិយមស្តាប់លើបណ្តាញសង្គមយូធូបនេះជាការចូលរួមការពារបទ ចាស់ៗឲ្យនៅតែរស់រវើកដដែល ។ នាងខ្ញុំនៅតែបន្តរិះរកបទចម្រៀងចាស់ៗថតច្រៀងឡើងវិញឲ្យកាន់តែសម្បូរ
ឡើង»៕
ចែករំលែកព័តមាននេះ