ខេត្តស្វាយរៀង ៖ កម្លាំងការិយាល័យគ្រឿងញៀនសហការជាមួយអធិការដ្ឋាននគរបាលក្រុងបាវិតបានធ្វើការឃាត់ខ្លួនជនសង្ស័យប្រើប្រាស់ និងជួញដូរគ្រឿងញៀនចំនួន៣នាក់ និងរឹបអូសថ្នាំញៀន ចំនួន១៨កញ្ចប់តូចធំបញ្ជូនទៅសាលាដំបូងខេត្តស្វាយរៀងកាលពីថ្ងៃទី២២ ខែមីនា ឆ្នាំ២០១៩ ។
បើតាមសមត្ថកិច្ចបានឲ្យដឹងថា កាលពីថ្ងៃទី២១ ខែមីនា ឆ្នាំ២០១៩ វេលាម៉ោង១២និង៣០នាទីថ្ងៃត្រង់បានទទួលព័ត៌មានពីភ្នាក់ងារផ្តល់ព័ត៌មានថា នៅចំណុចភូមិព្រៃផ្តៅ សង្កាត់ច្រកម្ទេស ក្រុងបាវិត មានមុខសញ្ញាជួញដូរគ្រឿងញៀនក្រោយពីទទួលបានព័ត៌មានកម្លាំងអធិការដ្ឋាននគរបាលក្រុងបាវិតបានសហការជាមួយកម្លាំងប៉ុស្តិ៍រដ្ឋបាលសង្កាត់ច្រកម្ទេសបានចុះទៅឃាត់ខ្លួនជនសង្ស័យបានចំនួន០១នាក់ឈ្មោះ ឡាញ់ ឡាន់ ភេទប្រុស អាយុ២៧ ឆ្នាំរស់នៅភូមិថ្មី ឃុំថ្នាធ្នង់ ស្រុករំដួល ដកហូតវត្ថុតាង ម្សៅក្រាមពណ៌សថ្លាចំនួន០១កញ្ចប់តូច ។
លុះដល់ម៉ោង១និង១០នាទីរសៀលថ្ងៃដដែលកម្លាំងការិយាល័យគ្រឿងញៀនខេត្តសហការជាមួយកម្លាំងអធិការដ្ឋាននគរបាលក្រុងបាវិតកម្លាំងប៉ុស្តិ៍រដ្ឋបាលសង្កាត់ច្រកម្ទេសដោយមានការសហការល្អពីម្ចាស់ផ្ទះជួលឈ្មោះ ព្រាប សីហា ភេទប្រុស អាយុ៣៧ឆ្នាំ សមត្ថកិច្ចបន្តឃាត់ខ្លួនជនសង្ស័យឈ្មោះ ហៀក ពេជ ភេទប្រុស អាយុ៣២ឆ្នាំ មុខរបរបើកបររថយន្តមាន ស្រុកកំណើតនៅភូមិលេខ៩ ឃុំពោធិ៍បាន ស្រុកកោះធំ ខេត្តកណ្តាល ស្នាក់នៅបន្ទប់ជួលលេខ៣ឆែកឆេររកឃើញថ្នាំញៀនចំនួន៦កញ្ចប់(ធំ១កញ្ចប់) និងសម្ភារប្រើប្រាស់មួយចំនួនទៀត ។
សមត្ថកិច្ចបានបន្តទៀតថា លុះដល់ម៉ោង១និង៥៥នាទីរសៀលថ្ងៃដដែលសមត្ថកិច្ចបន្តស្រាវជ្រាវឃាត់ជនសង្ស័យបានចំនួន០១នាក់ទៀតដែលស្នាក់នៅបន្ទប់លេខ៥ដែលមានឈ្មោះ ខាន់ ស៊ីនាថ ភេទប្រុស អាយុ៣៤ឆ្នាំ មុខរបរបើកបររថយន្តមានស្រុកកំណើតនៅភូមិគ្រោះ ឃុំព្រៃឃ្នាស់ ស្រុកមេសាង ខេត្តព្រៃវែង ដែលជួលបន្ទប់លេខ៥ស្នាក់នៅឆែកឆេររកឃើញថ្នាំញៀនចំនួន៩កញ្ចប់(ធំ៨កញ្ចប់) និងសម្ភារវេចខ្ចប់មួយចំនួនទៀត ។
សរុបគឺចាប់ខ្លួនជនសង្ស័យ០៣នាក់ដកហូតសម្ភាររួមមាន ម្សៅក្រាមពណ៌សថ្លា(ម៉ាទឹកកក)សង្ស័យជាថ្នាំញៀនចំនួន១៦កញ្ចប់(ធំ៨កញ្ចប់) ទូរស័ព្ទដៃ០៣គ្រឿង សម្ភារវេចខ្ចប់មួយចំនួនសម្ភារប្រើប្រាស់មួយចំនួន ។ បច្ចុប្បន្នជនសង្ស័យនឹងវត្ថុតាងបានកសាងសំណុំរឿងបញ្ជូនទៅសាលាដំបូងខេត្តស្វាយរៀងចាត់ការតាមនីតិវិធីច្បាប់ ៕
ចែករំលែកព័តមាននេះ