ខេត្តក្រចេះ ៖ បុរសខ្មែរអ៊ិស្លាមម្នាក់បានរងរបួសធ្ងន់ដោយសាររងអំបែងគ្រាប់យុទ្ធភណ្ឌដែលផ្ទុះលាន់កក្រើកដី នៅពេលជនរងគ្រោះបានដើរទៅពន្លត់ភ្លើងឆេះព្រៃចម្ការ ហើយភ្លើងបានឆេះពីលើក្បាលគ្រាប់បណ្តាលឱ្យផ្ទុះត្រូវជនរងគ្រោះ ។ ហេតុការណ៍នេះបង្កឱ្យមានការភ្ញាក់ផ្អើលបានកើតឡើងនាថៃ្ងទី១៨ មីនា នៅចំណុចក្បែរព្រះវិហារឥស្លាម ក្នុងឃុំគ្រញូងសែនជ័យ ស្រុកស្នួល។
នគរបាលមូលដ្ឋានបានឲ្យដឹងថា ជនរងគ្រោះម្នាក់ខាងលើឈ្មោះ សុខ កំរី ភេទប្រុស អាយុ៤៨ឆ្នាំ ជាខ្មែរអ៊ិស្លាម ។
នគរបាលនៅមិនទាន់បញ្ជាក់ពីប្រភេទគ្រាប់យុទ្ធភណ្ឌដែលផ្ទុះមួយគ្រាប់នេះថាជាប្រភេទអ្វីនោះទេ ដោយសារតែគ្រាប់មួយគ្រាប់នេះបានផ្ទុះសុសរកមិនឃើញបំណែកគ្រាប់។
នគរបាលមូលដ្ឋានបានឲ្យដឹងទៀតថា នៅថ្ងៃកើតហេតុគឺមានភ្លើងឆេះព្រៃចម្ការ ហើយជនរងគ្រោះជាម្ចាស់ចម្ការបានដើរទៅមើលក្នុងគោលបំណងពន្លត់ភ្លើងឆេះព្រៃ នៅពេលទៅដល់ ស្រាប់តែគ្រាប់យុទ្ធភណ្ឌដែលកប់ក្នុងដី និងត្រូវភ្លើងឆេះនោះ ក៏បានផ្ទុះឡើងលាន់កក្រើកដី បណ្តាលឲ្យជនរងគ្រោះរងរបួសធ្ងន់សន្លប់ស្តូកនៅនឹងកន្លែងកើតហេតុក្បែរភ្នក់ភ្លើង ហើយត្រូវបានក្រុមគ្រួសារ និងសមត្ថកិច្ចបញ្ជូនទៅសង្គ្រោះនៅមន្ទីរពេទ្យស្រុកស្នួលភ្លាមៗផងដែរ។
ពាក់ព័ន្ធនឹងករណីផ្ទុះគ្រាប់យុទ្ឋភ័ណ ត្រូវគេមើលឃើញថាបានកើតមានជាញឹកញាប់ នាពេលថ្មីៗនេះ និងបង្កឲ្យពលរដ្ឋនៅស្រុកស្នួលជាច្រើននាក់ខ្លះស្លាប់ ខ្លះរងរបួស និងពិការ ដោយសារតែរងការផ្ទុះ ខណៈដែលស្រុកនៅតំបន់ប៉ែកឦសាន្តមួយនេះក៏ប្រឈមនឹងរបបសង្គ្រាមធ្ងន់ធ្ងរកាលសម័យរបបខ្មែរក្រហមផងដែរ ហើយរហូតមកទល់សព្វថ្ងៃនេះ ការផ្ទុះគ្រាប់យុទ្ឋភ័ណគឺនៅតែគំរាមកំហែងអាយុជីវិតពលរដ្ឋនៅស្រុកស្នួលជាហូរហែរ បើទោះបីជាមានការរុករកពីក្រុមមន្ត្រីជំនាញ តែការរុករកក៏នៅមិនទាន់អស់នៅឡើយទេ ៕
ចែករំលែកព័តមាននេះ