តាមប្រភពពីMetro បានឱ្យដឹងថា បុរសម្នាក់បានប្រកាច់ហើយសន្លប់ ក្រោយពីគាត់ប្រើសំឡីត្បាល់ត្រចៀក ហើយរបូតសំឡីជាប់ក្នុងត្រចៀកយកមិនចេញ ។ បុរសវ័យ៣១ឆ្នាំ បានកើតទៅជាជំងឺរលាកងាប់កោសិកាក្នុងរន្ធត្រចៀកខាងក្រៅ (Necrotising Otitis Externa) ដែលបង្កឡើងដោយបាក់តេរី ទៅវាយលុកនៅក្នុងភ្នាសរបស់ឆ្អឹងក្បាល ។
គ្រូពេទ្យថា សំឡីមួយដុំដែលជាប់នៅក្នុងនោះ ចាប់ផ្តើមធ្វើឱ្យមានការបង្ករោគ នៅក្នុងត្រចៀក មុន
ពេលឡើងទៅដល់ក្បាល។ វាអាចឡើងដល់ភ្នាសរុំខួរក្បាល ហើយបង្កទៅជាការប្រកាច់។ នេះគឺជាការលើកឡើងដោយវេជ្ជបណ្ឌិតឯកទេសខាងត្រចៀក ច្រមុះ និង បំពង់ក នៃសាកលវិទ្យាល័យមន្ទីរពេទ្យ Coventry ។
លោកវេជ្ជបណ្ឌិត Alexander Charlton ដែលជាអ្នកព្យាបាលបុរសម្នាក់នោះ បានឱ្យថតស៊ីធីស្កេន និងធ្វើការវះកាត់ដើម្បីយកដុំសំឡីនោះចេញពីក្នុងរន្ធត្រចៀក។ ក្រោយពីសម្រាកព្យាបាលនៅមន្ទីរពេទ្យរយៈពេលមួយសប្តាហ៍ និង ញ៉ាំថ្នាំផ្សះអស់២ខែ អ្នកជំងឺបានធូរស្រាល ដោយគ្មានផលវិបាកដល់ការខូចខាតការស្តាប់ ឬ បញ្ហាខួរក្បាលអ្វីឡើយ។
គួរបញ្ជាក់ផងដែរថា ការសម្អាតត្រចៀក ដែលត្រឹមត្រូវចេញដោយសេវាសុខភាពជាតិរបស់អង់គ្លេស គឺយើងត្រូវប្រើប្រេងអូលីវ ឬ ប្រេងអាល់ម៉ុន បន្តក់ចូលក្នុងរន្ធត្រចៀកពីរបីតំណក់ មួយថ្ងៃម្តង រយៈពេល២សប្តាហ៍។ គេនឹងឃើញដុំអាចម៍ត្រចៀកធ្លាក់មកពេលយើងគេងយប់៕
ចែករំលែកព័តមាននេះ