ខេត្តបាត់ដំបង ៖ ពិធីបំពាក់ឋានន្តរស័ក្តិជូនដល់នាយទាហាន នាយទាហានរង ជាយោធិនរបួសពិការ១២៦នាក់ដែលត្រូវផ្ទេរទៅក្រសួងសង្គមកិច្ច បានធ្វើឡើងកាលពីព្រឹកថ្ងៃទី១៤ ខែមីនា ឆ្នាំ២០១៩ ក្រោមអធិបតីលោកនាយឧត្តមសេនីយ៍ ប៊ុន សេង រដ្ឋលេខាធិការក្រសួងការពារជាតិ តំណាងដ៏ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ។
ក្នុងពិធីនោះដែរមានការចូលរួមពីលោកឧត្តមសេនីយ៍ទោ ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ លោកឧត្តមសេនីយ៍ឯក ផាន់ សាមន្ថា នាយសេនាធិការរងចម្រុះ អគ្គបញ្ជាការ អនុប្រធានក្រុមស្រាវជ្រាវយុទ្ធសាស្ត្រយោធាអគ្គបញ្ជាការ មេបញ្ជាការរងកងទ័ពជើងគោក មេបញ្ជាការរង នាយសេនាធិការរង នាយការិយាល័យ មេបញ្ជាការកងពលតូចទាំង៣ តំបន់ប្រតិបត្តិការសឹករងទាំង៤ កងការពារព្រំដែនទាំង៤ ព្រមទាំងនាយទាហានសរុបរួម២៨៣នាក់នៅសាលប្រជុំធំយោធភូមិភាគទី៥។
លោកឧត្តមសេនីយ៍ទោ សុខ ប៊ុនថន នាយករងនាយកដ្ឋានបុគ្គលិក ក្រសួងការពារជាតិ អានព្រះរាជក្រឹត្យ អនុក្រឹត្យនិងប្រកាស ស្តីពីការដំឡើងឋានន្តរស័ក្តិជូនយោធិនរបួស និងពិការ។
លោកនាយឧត្តមសេនីយ៍ ប៊ុន សេង បានផ្តល់កិត្តិយសបំពាក់ឋានន្តរស័ក្តិជូនដល់នាយទាហាន នាយទាហានរងជាយោធិនរបួសពិការចំនួន១២៦នាក់ក្នុងនោះមាន (ឧត្តមសេនីយ៍ឯក ១ ឧត្តមសេនីយ៍ទោ ៤ ឧត្តមសេនីយ៍ត្រី១៣ វរសេនីយ៍ឯក ២៩ វរសេនីយ៍ទោ ២២ វរសេនីយ៍ត្រី១១ អនុសេនីយ៍ឯក ៦ អនុសេនីយ៍ទោ៧ អនុសេនីយ៍ត្រី៨ នាយចំណង់២០ ព្រិន្ទបាលឯក២ ព្រិន្ទបាលទោ៣ ។
លោកនាយឧត្តមសេនីយ៍បានលើកឡើងថា នេះជាលើកទី១ហើយដែលប្រមុខរាជរដ្ឋាភិបាលបានផ្តល់គោលនយោបាយជូនយោធិនចេញពីជួរកងយោធពលខេមរភូមិន្ទឡើងមួយស័ក្តិមុនពេលផ្ទេរទៅក្រសួងសង្គមកិច្ច។
សូមជូនពរបងប្អូនមានសុខភាពល្អ រកទទួលទានមានបានក្រោយពេលបងប្អូនចេញពីជួរ ។ គុណបំណាច់បងប្អូនរបួសពិការបានឆ្លងកាត់សមរភូមិប្រយុទ្ធជាច្រើនរហូតធ្លាក់ខ្លួនពិការនេះហើយក៏ដោយសារប្រទេសយើងមានសង្គ្រាមអស់៣ទសវត្សសូមទប់ស្កាត់កុំឲ្យកម្ពុជាធ្លាក់ទៅរកសង្គ្រាមសាជាថ្មី។
ឆ្លៀតក្នុងឱកាសនេះ លោកនាយឧត្តមសេនីយ៍សូមអំពាវនាវដល់ប្រមុខរាជរដ្ឋាភិបាល ក្រសួងការពារជាតិជួយគិតគូរដល់អតីតយុទ្ធជនដែលមានជីវភាពក្រីក្រខ្វះខាតដើម្បីឲ្យបងប្អូនបានរស់នៅក្នុងជីវភាពសមរម្យផង។
ការបំពាក់ឋានន្តរស័ក្តិនាពេលនេះស្របពេលរាជរដ្ឋាភិបាលអាណត្តិទី៦ ឆ្នាំទី១ធ្វើការកែទម្រង់ដើម្បីពន្លឿនប្រសិទ្ធភាពការងារ ពង្រឹងនីតិរដ្ឋ ពិសេសអនុវត្តទិសដៅកែទម្រង់សីុជម្រៅតាមអភិក្រម៥យ៉ាង( ឆ្លុះកញ្ចក់ ងូតទឹក ដុសក្អែល ព្យាបាល វះកាត់) ឈរលើស្មារតីស្រឡាញ់ជាតិ ប្រជាពលរដ្ឋ។
ការចូលរួមក្នុងការកែទម្រង់ត្រូវឈរលើទស្សន:ធានាបានប្រសិទ្ធភាពការងារដោយរក្សាចាស់ ពង្រីកថ្មី សម្រាប់បន្តវេន។
សូមផ្តាំផ្ញើដល់បងប្អូនដែលបានចេញពីជួរកងយោធពលខេមរភូមិន្ទផ្ទេរទៅក្រសួងសង្គមកិច្ចនឹងក្លាយជាសមាជិកអតីតយុទ្ធជនកម្ពុជា សូមរក្សានូវឆន្ទៈ ស្មោះត្រង់ ធ្វើជាគំរូល្អ ដល់សង្គមឲ្យសក្តិសមជាអតីតកងទ័ពមានវិន័យថ្លៃថ្នូរហើយក៏មានបងប្អូនមួយចំនួនក្លាយជាសមាជិក ក្រុមប្រឹក្សាខេត្ត ស្រុក ឃុំ ហើយត្រូវជួយការងារនៅមូលដ្ឋាន យើងនៅតែបន្តការសហការកសាងអភិវឌ្ឍន៍ប្រទេសយើងក្នុងសុខសន្តិភាពជាបន្តទៅទៀត ៕
ចែករំលែកព័តមាននេះ