សៀងហៃ ៖ យោងតាមភ្នាក់ងារសារព័ត៌មាន Japan Times កាលពីថ្ងៃចន្ទ កន្លងមកបានឲ្យដឹងថា ប្រទេសចិនបានបញ្ជាដល់ក្រុមហ៊ុនអាកាសចរណ៍ចិនឲ្យផ្អាកដំណើរការយន្តហោះ 737 Max របស់ក្រុមហ៊ុន Boeing Co បន្ទាប់ពីមានការធ្លាក់យន្តហោះ 737 Max 8 របស់ក្រុមហ៊ុន Ehtiopian Airlines កាលពីថ្ងៃអាទិត្យដែលបង្កឲ្យមនុស្ស ១៥៧នាក់បាត់បង់ជីវិត។
វាជាការធ្លាក់យន្តហោះសេរី 737 Max លើកទីពីរមកហើយតាំងពីយន្តហោះសេរីនេះចាប់មានលើទីផ្សារក្នុងឆ្នាំ ២០១៧។ កាលពីខែតុលា យន្តហោះ 737 Max របស់ក្រុមហ៊ុន Lion Air របស់ឥណ្ឌូនេស៊ីដែលហោះចាកចេញពីហ្សាការតាក៏បានធ្លាក់ប្រមាណ១៣នាទីបន្ទាប់ពីចាប់ហោះហើរដែរដែលបង្លឲ្យអ្នកដំណើរ និងបុគ្គលិកលើយន្តហោះ ១៨៩នាក់បាត់បង់ជីវិត។
រដ្ឋបាលអាកាសចរណ៍ស៊ីវិលប្រចាំប្រទេសចិន (CAAC) បាននិយាយក្នុងសេចក្តីថ្លែងការណ៍មួយថា ពួកគេនឹងផ្តល់ដំណឹងទៅក្រុមហ៊ុនអាកាសចរណ៍ទាក់ទិននឹងពេលដែលពួកគេអាចបន្តប្រើប្រាស់យន្តហោះនេះបានវិញបន្ទាប់ពីទាក់ទងទៅកាន់ក្រុមហ៊ុន Boeing និងរដ្ឋបាលអាកាសចរណ៍សហព័ន្ធអាមេរិកដើម្បីធានាដល់សុវត្ថិភាពនៃការហោះហើរ។
មូលហេតុដែលបង្កឲ្យមានការធ្លាក់យន្តហោះក្នុងប្រទេសឥណ្ឌូនេស៊ីកំពុងស្ថិតក្រោមការស៊ើបអង្កេតនៅឡើយ។ ប៉ុន្តែរបាយការណ៍ដែលបានចេញផ្សាយកាលពីខែវិច្ឆិកាបានឲ្យដឹងថា ការមើលថែយន្តហោះ និងការហ្វឹកហាត់ ព្រមទាំងការឆ្លើយតបនៃប្រព័ន្ធប្រឆាំងនឹងភាពរអាក់រអួលមិនមែនជាមូលហេតុទេ។
រដ្ឋបាលខាងលើបាននិយាយថា ក្រុមហ៊ុនអាកាសចរណ៍ចិនមានយន្តហោះ 737 Max សរុប ៩៦គ្រឿងដែលកំពុងដំណើរការ។
មន្ត្រីអាមេរិកម្នាក់បានប្រាប់ដល់សារព័ត៌មាន Reuters មកថា សហរដ្ឋអាមេរិកមិនមានគម្រោងការឆ្លើយតបនឹងហេតុការណ៍នេះទេព្រោះយន្តហោះទាំងនេះមានសុវត្ថិភាពណាស់ក្នុងសហរដ្ឋ អាមេរិក ហើយបច្ចុប្បន្ននេះនៅមានកង្វះព័ត៌មានទាក់ទិននឹងមូលហេតុដែលបង្កឲ្យមានការធ្លាក់យន្តហោះនៅឡើយ។
ជាមួយគ្នានេះផងដែរ ក្រុមហ៊ុន Singapore Airlines Ltd បាននិយាយថាពួកគេកំពុងតែតាមដានស្ថានការយ៉ាងដិតដល់ ប៉ុន្តែពួកគេនឹងបន្តប្រើយន្តហោះទាំងនេះធម្មតា ៕
ចែករំលែកព័តមាននេះ