ខេត្តសៀមរាបប្រារព្ធទិវានារីអន្តរជាតិ ៨មីនា ២០១៩
- សៀមរាប
ខេត្តសៀមរាប ៖ នាថ្ងៃទី៧ ខែមីនា ឆ្នាំ២០១៩ នៅមហោស្រពអាណាចក្រអង្គរ ខេត្តសៀមរាប មានរៀបចំខួបលើកទី១០៨ ទិវានារីអន្តរជាតិ ៨មិនា…
ខេត្តសៀមរាប ៖ នាថ្ងៃទី៧ ខែមីនា ឆ្នាំ២០១៩ នៅមហោស្រពអាណាចក្រអង្គរ ខេត្តសៀមរាប មានរៀបចំខួបលើកទី១០៨ ទិវានារីអន្តរជាតិ ៨មិនា ឆ្នាំ២០១៩ ដែលបានរៀបចំឡើង ក្រោមប្រធានបទ
( លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍន៍ធនធានមនុស្ស) ក្រោមវត្តមាន លោក ទៀ សីហា អភិបាលនៃគណៈអភិបាលខេត្ត និងលោកជំទាវ ដោយមានការចូលរួមពីសំណាក់លោក លោកឧកញ៉ា លោកជំទាវ អស់លោក លោកស្រីជាដឹកនាំមន្ទីរ អង្គភាព និងអាជ្ញាធរ ក្រុង ស្រុក បងប្អូនមន្ត្រីរាជការជានារីសរុបចំនួន១៣០០នាក់ចូលរួម ។
បន្ទាប់ពីកិច្ចស្វាគមន៍ និងសេចក្តីរាយការណ៍របស់លោកស្រី ហិញ ហាច ប្រធានមន្ទីរកិច្ចការនារីខេត្ត និង លោកជំទាវ យូ សុភា អភិបាលរងខេត្ត បានអានព្រះរាជសារ សម្តេចព្រះមហាក្សត្រី នរោត្តម មុនីនាថ
សីហនុ ព្រះវររាជមាតាជាតិខ្មែរ ក្នុងសេរីភាព សេចក្តិថ្លៃថ្នូរ និងសុភមង្គលរួមមក លោក ទៀ សីហា អភិបាលខេត្តសៀមរាប បានមានប្រសាសន៍ដាក់ចេញនូវគោលការណ៍សម្រាប់សមត្ថកិច្ចដែលពាក់ព័ន្ធ យកចិត្តទុកដាក់ចំពោះស្ត្រីកំពុងជាប់ក្នុងពន្ធនាគារ និងបានដាក់ចេញនូវបម្រាមដាច់ខាតមិនឲ្យមានការសម្របសម្រួលសុំសម្រាលទោសចំពោះជនណាដែលប្រព្រឹត្តិអំពើរំលោភសេពសន្ថវៈលើអនីតិជនឡើយ ។
អនុសាសន៍ដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានយកចិត្តទុកដាក់ជាខ្លាំងចំពោះស្ត្រីជាទណ្ឌិត ដែលកំពុងជាប់ក្នុងពន្ធនាគារ ដោយសម្តេចបានឲ្យសមត្ថកិច្ច-ស្ថាប័នពាក់ព័ន្ធ ត្រូវសិក្សាអំពីការស្នើសុំបន្ធូរបន្ថយទោសដល់ទណ្ឌិតជាស្ត្រីផងដែរ ។
លោកក៏បានកោតសរសើរដល់ថ្នាក់ដឹកនាំមន្ទីរ ស្ថាប័ន អង្គភាព ក្រុង ស្រុក ដែលបានរួមគ្នាប្រារព្វពិធី ខួបលើកទី១០៨ ទិវានារីអន្តរជាតិ ៨ មីនា ឆ្នាំ ២០១៩នេះឡើង ព្រមទាំងបានប្រារព្វធ្វើឡើងជារៀងរាល់ឆ្នាំ ហើយក៏មិនមែនបានសេចក្តីថា សិទ្ធនារីតែមួយថ្ងៃនោះទេ ដូច្នេះរាជរដ្ឋាភិបាលក៏បានត្រូវយកចិត្តទុកដាក់លើស្ត្រី ហើយស្ត្រីបានដើរតួនាទីស្មើរនឹងបុរសក្នុងកិច្ចការអភិវឌ្ឍន៍សង្គម និងប្រទេសជាតិ ត្រូវបានស្ត្រីចូលរួមគ្រប់សកម្មភាពជាមួយបុរស ។
លោកអភិបាលខេត្តសៀមរាបក៏បានលើកឡើងនៅក្នុងឱកាសប្រារព្ធពិធីអបអរសាទរ ខួបលើកទី១០៨ ទិវានារីអន្តរជាតិ ៨មីនា ឆ្នាំ២០១៩ ដោយបានបញ្ជាក់ថា គ្រប់អង្គភាព-ស្ថាប័នសមត្ថកិច្ចជំនាញដែលពាក់ព័ន្ធត្រូវអនុវត្តនូវអនុសាសន៍ដ៏ថ្លៃថ្លារបស់ប្រមុខរាជរដ្ឋាភិបាល ឲ្យមានប្រសិទ្ធភាពខ្ពស់ និង ទាន់ពេលវេលា ។ លោក បានលើកឡើងបន្ថែមនៅក្នុងពិធីនោះថា ស្ត្រីជាមាតាដែលត្រូវបានទទួលទោសទណ្ឌ ពិតជាមានអារម្មណ៍ខ្លោចផ្សារណាស់ ចំពោះកូនតូចរបស់ខ្លួនដែលជាប់នៅជាមួយទាំងរូបគេពុំមានទោសកំហុសអ្វីសោះឡើយ។
លោក ទៀ សីហា ក៏បានបង្ហាញឲ្យដឹងផងដែរថា ឯកសារការប៉ាន់ប្រមាណអំពីយេនឌ័រនៅកម្ពុជា ដែលបានដាក់បញ្ចូលផងដែរ នូវបញ្ហារបស់ស្ត្រីទៅក្នុងក្រុមនៃជនងាយរងគ្រោះ នៃផែនការជាតិ ស្តីពីការទប់ស្កាត់អំពើហឹង្សាលើស្ត្រីលើកទី៣ ( ២០១៩-២០២៣ ) ។ លោកបានបញ្ជាក់ទៀតថា ដូច្នេះនៅថ្នាក់ក្រោមជាតិ ត្រូវផ្តល់សេវា និង រួមគ្នាទប់ស្កាត់អំពើហឹង្សាលើស្ត្រីនិងក្មេងស្ត្រី រួមទាំងការរំលោភសេពសន្ថវៈនិងការបៀតបៀនផ្លូវភេទ ឲ្យមានប្រសិទ្ធភាពខ្ពស់។
លោកក៏បានគូសបញ្ជាក់ថា ដោយយោងតាមរបាយការណ៍របស់មន្ទីរសុខាភិបាលខេត្តសៀមរាប កាលពីថ្ងៃទី៦ ខែ មីនា ឆ្នាំ២០១៨កន្លងទៅ បានឲ្យដឹងថា មានបទល្មើសរំលោភសេពសន្ថវៈ បានកើតឡើងជាមធ្យមចំនួន៣ករណីជារៀងរាល់ថ្ងៃនៅក្នុងខេត្តសៀមរាប ហើយជនរងគ្រោះទាំងនោះមួយចំនួនជាក្មេងស្រីមានអាយុក្រោម១៥ឆ្នាំនោះ ។
លោក ទៀ សីហា បានដាក់បំរាមយ៉ាងម៉ឹងម៉ាត់ ចំពោះអាជ្ញាធរនិងសមត្ថកិច្ចពាក់ព័ន្ធ មិនត្រូវឲ្យមានការសម្របសម្រួល ឬសុំសម្រាលទោសចំពោះជនណាដែលបានប្រព្រឹត្តអំពើរំលោភសេពសន្ថវៈ លើអនីតិជនជាដាច់ខាត ។ លោកអភិបាលខេត្ត ហៅជនដែលបានប្រព្រឹត្តអំពើអាណាចារទាំងនោះ ថាជាសត្វ មិនមែនជាមនុស្សនោះទេ មិនត្រូវលើកលែងទោសឲ្យជាដាច់ខាត ។
ក្នុងគោលនយោបាយលើកកម្ពស់សមភាពយេនឌ័រ ការទប់ស្កាត់អំពើហឹង្សាលើស្ត្រី ការលុបបំបាត់អំពើកេងប្រវ័ញ្ជជួញដូរនិងរំលោភផ្លូវភេទ រាជរដ្ឋាភិបាលម្ពុជា បានជម្រុញឲ្យគ្រប់បណ្តាអង្គភាព-ស្ថាប័ន ចូលរួមគាំទ្រ សំដៅលើកកម្ពស់ភាពអង់អាចរបស់ស្ត្រីនិងក្មេងស្រី ដើម្បីធ្វើឲ្យប្រសើរឡើង នូវការអភិវឌ្ឍជីវភាពសេដ្ឋកិច្ចគ្រួសារ និង សង្គមជាតិ។សមភាពយេនឌ័រ ការពង្រឹងភាពអង់អាចដល់ស្ត្រី និង ការផ្តល់សេវាគាំពារសង្គម គឺជាកត្តាចាំបាច់បំផុត ដើម្បីធានាបាននូវដំណើរការសង្គម ប្រកបដោយសុខដុមរមនា ៕
ចែករំលែកព័តមាននេះ