ខេត្តកណ្ដាល ៖ បុរសម្នាក់ជិះម៉ូតូធ្លាក់ទឹកស្ទឹងបណ្តាលឱ្យលង់ស្លាប់ បង្កឱ្យមានការភ្ញាក់ផ្អើលកាលពីវេលាវេលាម៉ោង១១និង៥នាទីយប់ថ្ងៃទី២៦ ខែកុម្ភៈ ឆ្នាំ២០១៩ នៅចំណុចទ្វារទឹកស្ទឹងអង្គរជ័យ ភូមិអង្គរជ័យ ឃុំបន្ទាយដែក ស្រុកកៀនស្វាយ…
ខេត្តកណ្ដាល ៖ បុរសម្នាក់ជិះម៉ូតូធ្លាក់ទឹកស្ទឹងបណ្តាលឱ្យលង់ស្លាប់ បង្កឱ្យមានការភ្ញាក់ផ្អើលកាលពីវេលាវេលាម៉ោង១១និង៥នាទីយប់ថ្ងៃទី២៦ ខែកុម្ភៈ ឆ្នាំ២០១៩ នៅចំណុចទ្វារទឹកស្ទឹងអង្គរជ័យ ភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល ។
ជនរងគ្រោះដែលស្លាប់ឈ្មោះ ប៉ែន ម៉ាច ភេទប្រុស អាយុ៤៦ឆ្នាំ មុខរបរកសិករ មានទីលំនៅភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល ។
តាមប្រភពព័ត៌មានពីប្អូនថ្លៃរបស់ជនរងគ្រោះឈ្មោះ តាំង ស៊ីមាន ភេទប្រុស រស់នៅភូមិឃុំជាមួយគ្នា បានឱ្យដឹងថា មុនពេលកើតហេតុ កាលពីវេលាម៉ោង៩និង១៥នាទីយប់ថ្ងៃទី២៦ កុម្ភៈ ២០១៩ គាត់បានដើរនេសាទត្រីតាមបណ្តាយមាត់ស្ទឹងក្នុងភូមិអង្គរជ័យ រហូតដល់វេលាម៉ោង១១និង៥នាទីយប់ថ្ងៃដដែល បានមកដល់មុខទ្វារទឹកស្ទឹងទល់មុខវត្តអង្គរជ័យ ក៏ប្រទះឃើញម៉ូតូមួយគ្រឿងម៉ាកសង់កូរ៉េ ពណ៌ក្រហម ពាក់ផ្លាកលេខ ភ្នំពេញ ១AR-៥៣៤១ ( ម៉ូតូគ្មានភ្លើងបំភ្លឺ )លិចនៅក្នុងទឹក ធ្វើឱ្យគាត់មានការសង្ស័យថាជាម៉ូតូរបស់បងថ្លៃគាត់ ។
ប្រភពដដែលបានបន្តថា គាត់ក៏បានមកផ្ទះដើម្បីរកមើល និងសួរប្រពន្ធជនរងគ្រោះ តែប្រពន្ធនិយាយថា មិនទាន់ឃើញជនរងគ្រោះមកផ្ទះនៅឡើយទេ ភ្លាមនោះក៏មានការភ្ញាក់ផ្អើលនាំគ្នាទៅមើលកន្លែងម៉ូតូធ្លាក់ទឺក ស្រាប់តែឃើញជនរងគ្រោះនៅពីក្រោមម៉ូតូលង់ទឹកស្លាប់បាត់ទៅហើយ ។
បន្ទាប់មកក៏បាននាំគ្នាស្រង់សពជនរងគ្រោះឡើងមកលើគោក និងឃើញស្នាមដាច់មុខនៅផ្នែកខាងលើ ចន្លោះចញ្ចើមសងខាងជម្រៅដល់លលាដ៍ក្បាល និងក្រោមថ្ពាល់ខាងឆ្វេងដាច់ប្រវែង៦,៥សង្ទីម៉ែត្រ ជម្រៅ១សង្ទីម៉ែត្រ ស្នាមរបួសប៉ះត្រូវនិងវត្ថុរឹង ហើយក៏យកសពជនរងគ្រោះមកផ្ទះ និងរាយការណ៍មកប៉ុស្តិ៍នគរបាលរដ្ឋបាលបន្ទាយដែក ។
ក្រោយទទួលបានព័ត៌មានខាងលើភ្លាម កម្លាំងប៉ុស្តិ៍បានសហការជាមួយផ្នែកជំនាញ ស្រុក ក្រុមប្រឹក្សាឃុំមេភូមិពេទ្យឃុំបន្ទាយដែក ចុះពិនិត្យសព និងបានបញ្ជាក់ថា ជនរងគ្រោះស្រវឹងស្រាជិះម៉ូតូធ្លាក់ទឹក បណ្តាលឱ្យលង់ស្លាប់ ។ ក្រោយពីពិនិត្យរួច សមត្ថកិច្ចបានប្រគល់សពជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ