រាជធានីភ្នំពេញ ៖ រហូតដល់ម៉ោង៥ និង៣០នាទីថ្ងៃទី២៦ កុម្ភៈ អង្គសវនាការបានសម្រាក ហើយប្រធានក្រុមប្រឹក្សាបានលើកពេលបន្តសវនាការ ទៅព្រឹកថ្ងៃទី២៧ កុម្ភៈ បន្តទៀត ខណៈសវនាការលើសំណុំរឿងសម្លាប់អ្នកស្រី ចេវ សុវឌ្ឍនា នៅតែមិនទាន់ច្បាស់លាស់ ដែលម្តងថា អត្តឃាតចង.ក ម្តងថាឃាតកម្ម ។ គួរបញ្ជាក់ថា អ្នកស្រី ចេវ សុវឌ្ឍនា គឺជាស្រីចំណាន់របស់លោក ឡាយ វណ្ណៈ អតីតអភិបាលខេត្តតាកែវ ដែលនៅថ្ងៃទី២៦ កម្ភៈ ជាថ្ងៃទី២ នៃការបន្តសវនាការនៅសាលាដំបូងរាជធានី ហើយបានរំពឹងថា នៅថ្ងៃទី២៧ កុម្ភៈ នោះ នឹងបញ្ចប់ការជំនុំជម្រះ ។
គួររំលឹកទៀតថា អង្គសវនាការនេះ ទើបតែបានសាកសួរជនជាប់ចោទ ឡាយ វណ្ណៈ តែម្នាក់គត់ ហើយត្រូវបានលោក ឡាយ វណ្ណៈ បដិសេធលើការចោទប្រកាន់ដែលថាលោកបានសម្លាប់អ្នកស្រី ចេវ សុវឌ្ឍនា។ លើកនេះ ក៏មិនខុសគ្នាដែរ កាលពីព្រឹកថ្ងៃទី២៦ កុម្ភៈ ជនជាប់ចោទលោក ឡាយ ណារិទ្ធ អតីតស្នងការរងនគរ បាលខេត្តតាកែវ ដែលត្រូវជាបងប្រុសលោក ឡាយ វណ្ណៈ ក៏បានបដិសេធថា លោកមិនជាប់ពាក់ព័ន្ធក្នុងអំពើឃាតកម្មលើអ្នកស្រី ចេវ សុវឌ្ឍនា នោះដែរ ។
ជនជាប់ចោទ ឡាយ ណារិទ្ធ ត្រូវបានប្រធានក្រុមប្រឹក្សាជំនុំជម្រះលោក ហម ម៉េងសែ ផ្តល់សិទ្ធិឲ្យឆ្លើយចំពោះមុខអង្គសវនាការនូវអ្វីដែលខ្លួនបានធ្វើ បានប្រព្រឹត្ត ចៀសវាងបង្វែរអង្គហេតុ ភូតកុហកតុលាការ ។ ជនជាប់ចោទ ឡាយ ណារិទ្ធ បានរៀបរាប់ហូរហែតាមដំណើររឿងជូនអង្គសវនាការដែលការរៀបរាប់នោះ ហាក់ដូចជាមិនជាប់ពាក់ព័ន្ធ ក្នុងការចោទប្រកាន់នូវអំពើឃាតកម្មឡើយ ។
លោក ឡាយ ណារិទ្ធ បានបន្តថា នៅថ្ងៃទី២៦ មីនា ២០១៨ មុនកើតហេតុ លោកបានជិះម៉ូតូបណ្តែតអារម្មណ៍តាមដងផ្លូវនានាជុំវិញខេត្ត ដែលនោះជាទម្លាប់ ដល់ពេលល្ងាចបន្តិច លោកតែងជិះម៉ូតូហើយបានទៅជួបឈ្មោះ ជាតិ ជាមន្ត្រីនគរបាលខេត្តដែរ និងជាអ្នករកសុីផង ។ ពេលជួបឈ្មោះ ជាតិ ខ្លួនបាននៅអង្គុយហូបបាយទឹកជុំគ្នានោះ រហូតដល់ល្ងាចបន្តិច ស្រាប់តែប្អូនរបស់លោកគឺលោក ឡាយ វណ្ណៈ បានប្រាប់ឲ្យខ្លួនទៅផ្ទះអ្នកស្រី ចេវ សុវឌ្ឍនា ដោយបញ្ជាក់ថា អ្នកស្រី ចេវ សុវឌ្ឍនា ចង.កសម្លាប់ខ្លួន ។
ចម្លើយបន្តថា ពេលប្អូនប្រុសបានប្រើដូច្នោះ ខ្លួនក៏បានជិះទៅរកផ្ទះអ្នកស្រី ចេវ សុវឌ្ឍនា និងទម្រាំរកឃើញ ព្រោះមិនស្គាល់ផ្ទះ ក៏បានជួបអ្នកបម្រើ និងឃើញមានគណៈកម្មការត្រួតពិនិត្យកន្លែងកើតហេតុថ្នាក់ខេត្តទៅដល់មុនអស់ហើយ ហើយពេលខ្លួនទៅដល់ក៏បានឃើញនាង ចេវ សុវឌ្ឍនា ចងកស្តោកនៅក្នុងបន្ទប់ ។ ពេលនោះខ្លួនក៏បានចុះពីលើផ្ទះមកវិញ ហើយបានទូរស័ព្ទទៅប្អូនឡាយ វណ្ណៈថា នាង ចេវ សុវឌ្ឍនា ស្លាប់ដោយសារចង.កមែន ទើបប្អូនប្រាប់ឲ្យជួយចាត់ចែងយកសពទៅភ្នំពេញធ្វើបុណ្យ ។ ដូច្នេះ ការចោទប្រកាន់ថា ខ្លួនជាប់ពាក់ព័ន្ធក្នុងការសម្លាប់អ្នកស្រី ចេវ សុវឌ្ឍនា គឺសុំបដិសេធទាំងស្រុង ហើយសុំឲ្យតុលាការជួយរកយុត្តិធម៌ថែមទៀតផង ។
ចម្លើយជនជាប់ចោទ ម៉េន សាម៉ៃ ជាអ្នកបើករថយន្តឱ្យលោក ឡាយ វណ្ណៈ បានឆ្លើយទាំងទឹកភ្នែកទឹកសំបោរថា ខ្លួនមិនជាប់ពាក់ព័ន្ធអំពើឃាតកម្មលើអ្នកស្រី ចេវ សុវឌ្ឍនា នោះទេ ។ ការឆ្លើយដំបូងនៅសមត្ថកិច្ចថា លោក ឡាយ វណ្ណៈ ពិតជាបានសម្លាប់អ្នកស្រី ចេវ សុវឌ្ឍនានោះ គឺជាការបង្ខិតបង្ខំរបស់សមត្ថកិច្ច ដែលបានប្រើអំពើហិង្សាទះកំភ្លៀងផង ទាត់ផង ធ្វើឱ្យខ្លួនភ័យខ្លាច ក៏ឆ្លើយដាក់ ឡាយ វណ្ណៈ ការពិតរឿងនេះ លោក ឡាយ វណ្ណៈ មិនបានជាប់ពាក់ព័ន្ធ និងអំពើឃាតកម្មលើអ្នកស្រី ចេវ សុវឌ្ឍនា ទេគឺពិតជាចង.កសម្លាប់ខ្លួនឯងមែន ។
យ៉ាងណាក្តី មន្ត្រីនគរបាលយុត្តិធម៌នៃនាយកដ្ឋានព្រហ្មទណ្ឌក្រសួងមហាផ្ទៃ ដែលបានចូលរួមសវនាការនេះ បានបដិសេធរាល់ចម្លើយ ដែលជនជាប់ចោទឆ្លើយថា សមត្ថកិច្ចបានវ៉ៃយកចម្លើយគឺមិនពិតទេ ។ នារសៀលថ្ងៃដដែល អង្គសវនាការបានសាកសួរជនជាប់ចោទឈ្មោះ ជឹម វុធ អ្នកបម្រើផ្ទះអ្នកស្រី ចេវ សុវឌ្ឍនា ។
ពេលនោះ ជនជាប់ចោទ ជឹម វុធ ក៏បានបដិសេធផងដែរ រាល់ចម្លើយនៅសមត្ថកិច្ចនគរបាលព្រហ្មទណ្ឌក្រសួងមហាផ្ទៃ តែបានរក្សាចម្លើយនៅតុលាការ ពោលគឺមានន័យថា ការស្លាប់អ្នកស្រី ចេវ សុវឌ្ឍនា មិនមែនជាអំពើឃាតកម្មទេ គឺអ្នកស្រី ចេវ សុវឌ្ឍនា ពិតជាចងកសម្លាប់ខ្លួន ។ បន្ទាប់មកទៀតអង្គសវនាការបានសាកសួរសាក្សីឈ្មោះ ចាន់ រី ប្រពន្ធ ជឹម វុធ ដែលជាអ្នកបម្រើផ្ទះអ្នកស្រី ចេវ សុវឌ្ឍនា ក៏បដិសេធដូចគ្នាទាំងអស់ ទៅនឹងជនជាប់ចោទ ឡាយ វណ្ណៈ ឡាយ ណារិទ្ធ ម៉េន សាម៉ៃ ជឹម វុធ និងសាក្សីឈ្មោះ ចាន់ រី ដែរ ។
ចែករំលែកព័តមាននេះ