រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានស្នើឲ្យអ្នកដែលបម្រើសេវាកម្មទេសចរណ៍ទាំងអស់ដូចជា ផ្នែកសណ្ឋាគារ និងភោជនីដ្ឋាន…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានស្នើឲ្យអ្នកដែលបម្រើសេវាកម្មទេសចរណ៍ទាំងអស់ដូចជា ផ្នែកសណ្ឋាគារ និងភោជនីដ្ឋាន ត្រូវបង្កើនការយកចិត្តទុកដាក់ចំពោះសេវាកម្ម ការផ្តល់សេវាបដិសណ្ឋារកិច្ច ផ្នែកអនាម័យ និងត្រូវអនុវត្តឲ្យបានល្អបំផុតដល់ភ្ញៀវ ធ្វើយ៉ាងណាទាក់ទាញភ្ញៀវមកស្នាក់នៅ ហើយលើកក្រោយមកទៀតជាមួយមិត្តភក្ដិ ក្រុមគ្រួសារ និងអ្នកទេសចរជាច្រើនទៀត ។
ថ្លែងក្នុងពិធីអបអរសាទរ «ទិវាជាតិទីក្រុងស្អាត» លើកទី៧ ក្រោមប្រធានបទ «ទីក្រុងស្អាត៖ ទីក្រុងផ្តល់ភាពកក់ក្តៅ» នៅថ្ងៃទី២៥ កុម្ភៈ ម្សិលមិញ សម្តេចតេជោបន្តថា ៖« បើធ្វើជាអ្នកជំនួញ ឬអ្នកលក់ដូរ ការរកអតិថិជនម្នាក់មកទិញរបស់យើងគឺជារឿងលំបាកហើយ តែរឿងដែលពិបាកជាងហ្នឹងទៀតនោះ គឺអ្នកលក់ត្រូវធានាយ៉ាងណាដល់អថិតិជនដែលជាអ្នកទិញនូវទំនិញរបស់យើងនោះ ថ្ងៃក្រោយគេមកទិញទៀត » ។ សម្តេចតេជោបន្ថែមថា ៖« មិនត្រឹមតែមកទិញខ្លួនឯងទេ គេហៅថែមមិត្តភក្តិរបស់គេឲ្យមកជួយទិញថែមទៀត ទើបជាបញ្ហាជោគជ័យនៃមុខជំនួញ » ។
សម្តេចតេជោសង្កត់ធ្ងន់ថា ៖« កុំឲ្យគេមកទិញម្តងហើយ រាងចាល មុខគេមិនមើល សម្តីគំរោះគំរើយ តម្លៃកាត់ខ្ពស់ អីចឹងថ្ងៃក្រោយរកស៊ីខាត កុំថាមកពីរាជរដ្ឋាភិបាល បន្ទោសមកពីយើង មុខអាក្រក់ សម្តីអាក្រក់ យើងពិនិត្យមើលឡើងវិញ »។ ជាមួយគ្នានេះសម្តេចតេជោ បានជំរុញឲ្យវិស័យទេសចរណ៍ត្រូវមានការផ្សារភ្ជាប់ ឬទាញផលប្រយោជន៍ពីវិស័យកសិកម្ម តាមរយៈការជំរុញឲ្យកសិករ ម្ចាស់រមណីយដ្ឋាន និងភោជនីយដ្ឋាន បង្កើនការដាំដុះដំណាំកសិកម្មបែបធម្មជាតិឲ្យបានច្រើន ដើម្បីបំពេញតម្រូវការដល់ភ្ញៀវទាំងជាតិ និងអន្តរជាតិ ។
សម្តេចតេជោនាយករដ្ឋមន្ត្រី បន្តអំពាវនាវឲ្យប្រជាពលរដ្ឋចូលរួមរក្សាសន្តិភាព កុំឲ្យមានអំពើរភេវរកម្ម ជាពិសេសត្រូវធ្វើយ៉ាងណាឲ្យតំបន់រមណីយដ្ឋាន តំបន់ទេសចរណ៍ តំបន់រោងចក្រក្លាយទៅជាសហគមន៍ដ៏សុខសាន្តមួយ ដោយក្នុងនោះអាជ្ញាធរត្រូវបន្តអនុវត្តភូមិឃុំមានសុវត្ថិភាពឲ្យបានខ្ជាប់ខ្ជួន ដើម្បីធានាដល់ភាពសុខសាន្តរបស់ប្រជាពលរដ្ឋ ។ នៅឆ្នាំ២០១៩នេះ កម្ពុជារំពឹងថា នឹងទទួលភ្ញៀវទេសចរអន្តរជាតិប្រមាណ៦លាន៧សែននាក់ និងនៅឆ្នាំ២០២០ នឹងទទួលបានប្រមាណជាង៧លាននាក់ ដោយនាំមកនូវចំណូលប្រមាណ៥ពាន់លានដុល្លារ បង្កើតនូវឱកាសការងារបានប្រមាណជិត១លាននាក់ និងនៅឆ្នាំ២០៣០ អាចនឹងទទួលបានទេសចរអន្តរជាតិប្រមាណ១៥លាននាក់ នាំមកនូវចំណូលប្រមាណ១០ពាន់លានដុល្លាអាមេរិក បង្កើតឱកាសការងារប្រមាណជិត២លាននាក់ ។
លោក ថោង ខុន រដ្ឋមន្ត្រីក្រសួងទេសចរណ៍មានលើកឡើងថា ដើម្បីត្រៀមទទួលស្វាគមន៍ភ្ញៀវទេសចរអន្តរជាតិ ដូចបានជម្រាបជូនខាងលើនេះ ជាយុទ្ធសាស្ត្រគឺត្រូវធ្វើឱ្យកម្ពុជា ក្លាយជាគោលដៅទេសចរណ៍ប្រកបដោយភាពទាក់ទាញ និងផ្តល់ភាពកក់ក្តៅដល់ភ្ញៀវទេសចរ តាមរយៈការបង្កើតឱ្យមានផលិតផលទេសចរណ៍ថ្មីៗ និងប្រកបដោយភាពវ័យឆ្លាត ស្អាត និងបៃតង (Smart, Clean & Green)។
លោក ថោង ខុន បានបញ្ជាក់ថា ក្នុងចលនាប្រឡងប្រណាំងទីក្រុងស្អាត រាជរដ្ឋាភិបាលបានកំណត់យកថ្ងៃទី២៧ ខែកុម្ភៈ ជារៀងរាល់ឆ្នាំដើម្បីប្រារព្ធអបអរសាទរទិវាជាតិទី ក្រុងស្អាត ហើយផ្តើមចេញពីចលនាប្រឡងប្រណាំងនេះ រាជរដ្ឋាភិបាលក៏បានអនុញ្ញាតឱ្យដាក់ចេញនូវចលនាប្រឡងប្រណាំង «រង្វាន់សម្តេចតេជោនាយករដ្ឋមន្ត្រីសម្រាប់ធុរកិច្ចបៃតងក្នុងវិស័យទេសចរណ៍» តាមរយៈអនុក្រឹត្យលេខ១២៣ អនក្រ.បក ចុះថ្ងៃទី១៤ ខែកញ្ញា ឆ្នាំ ២០១៥ដោយប្រសិទ្ធនាមថា «រង្វាន់សម្តេចតេជោនាយករដ្ឋមន្ត្រីសម្រាប់ធុរកិច្ចបៃតងក្នុងវិស័យទេសចរណ៍» ដើម្បីលើកទឹកចិត្ត និងទទួលស្គាល់កិច្ចខិតខំប្រឹងប្រែងរបស់ផ្នែកឯកជនក្នុងវិស័យទេសចរណ៍ និងវិស័យពាក់ព័ន្ធ ដែលមានស្នាដៃល្អចូលរួមទ្រទ្រង់ដល់ចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» និងជាការលើកកម្ពស់ភាពស្អាត និងបៃតងនៅកម្ពុជា ៕
ចែករំលែកព័តមាននេះ