ខេត្តបន្ទាយមានជ័យ ៖ បុរសចំណាស់ម្នាក់បានតខ្សែភ្លើងទៅនឹងម៉ូទ័រប៉ូមទឹកស្រះខាងក្រោយផ្ទះ បណ្តាលឲ្យឆ្លងចរន្តអគ្គីសនីឆក់ស្លាប់ ។ ហេតុការណ៍នេះបង្កឲ្យមានការភ្ញាក់ផ្អើលកើតឡើងនៅវេលាម៉ោង១២ថ្ងៃត្រង់ ថ្ងៃទី២១ ខែកុម្ភៈ ឆ្នាំ២០១៩ នៅភូមិបុស្សធំ ឃុំតាគង់ ស្រុកម៉ាឡៃ ខេត្តបន្ទាយមានជ័យ ។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានឲ្យដឹងថា ជនរងគ្រោះដែលឈ្មោះ អួង លន ភេទប្រុស អាយុ៦២ឆ្នាំ នៅភូមិបុស្សធំ ឃុំតាគង់ ស្រុកម៉ាឡៃ ខេត្តបន្ទាយមានជ័យ ។
លោកអធិការបានបន្តថា មុនពេលកើតហេតុ ជនរងគ្រោះបានតខ្សែភ្លើងដាក់ម៉ូទ័រ ដើម្បីបូមទឹកស្រះខាងក្រោយផ្ទះយកទឹកមកប្រើប្រាស់ តែមិនដឹងថាខ្សែភ្លើងដាច់នោះទេ ពេលជនរងគ្រោះចាប់ចំកន្លែងខ្សែភ្លើងដាច់នោះ ស្រាប់តែឆ្លងចរន្តអគ្គិសនី បណ្តាលឱ្យឆក់ស្លាប់តែម្តង។
លោកអធិការបានបញ្ជាក់ទៀតថា ក្រោយពីទទួលបានព័ត៌មានខាងលើភ្លាម លោកបានចាត់កម្លាំងកំជនាញបច្ចេកទេស និងអាជ្ញាធរមូលដ្ឋានចុះទៅពិនិត្យសព រកពុំឃើញមានស្លាកស្នាមអ្វីដែលទាក់ទងនឹងករណីឃាតកម្មនោះឡើយ តាមការសន្និដ្ឋានរបស់សមត្ថកិច្ច គឺជនរងគ្រោះពិតជាស្លាប់ដោយសារខ្សែភ្លើងឆក់ប្រាកដមែន ក្រោយពីនិត្យរួច សពត្រូវបានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ