រាជធានីភ្នំពេញ ៖ រថយន្តហ៊ឺយ៉ាន់ដាយដឹកក្តារកុងប្លាកេធុនធំមួយគ្រឿង បើកលឿនមិនប្រយ័ត្នជ្រុលរេចង្កូតបើកកៀររបាំងថ្មពុះចែកទ្រូងផ្លូវ បណ្តាលឱ្យទ្រូងផ្លូវចំនួន៦កង់ត្រូវរងការខូចខាតដាច់ចេញពីគ្នា ចំណែករថយន្តត្រូវដាច់កង់ផ្នែកកណ្តាលមិនអាចបន្តដំណើរទៅមុខទៀតបានតាំងយប់រហូតមកដល់ព្រឹកថ្ងៃនេះ បង្កឱ្យមានការកកស្ទះចរាចរណ៍មួយចំហៀងផ្លូវតែម្តង ។
ហេតុការណ៍គ្រោះថ្នាក់ខាងលើនេះកើតឡើងកាលពីម៉ោង១២រំលងអធ្រាត្រឈានចូលថ្ងៃទី១៨ ខែកុម្ភៈ ឆ្នាំ២០១៩ តាមបណ្តោយផ្លូវលេខ២១៧ ទល់មុខវត្តស្ទឹងមានជ័យ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ ។ រថយន្តបង្កជាប្រភេទរថយន្តហ៊ីយ៉ាន់ដាយដឹកទំនិញធុនធំ ពណ៌ស ពាក់ស្លាកលេខភ្នំពេញ 3D-2861 ។
តាមប្រភពព័ត៌មានឱ្យដឹងថា នៅមុនកើតហេតុ គេសង្កេតឃើញរថយន្តបង្កបានបើកបរតាមបណ្តោយផ្លូវ២១៧ខាងលើពីត្បូងទៅជើងក្នុងល្បឿនលឿន លុះដល់ចំណុចខាងលើ រថយន្តបានរេចង្កូតបើកកៀររបាំងថ្មពុះចែកទ្រូងផ្លូវពេញទំហឹង បណ្តាលឱ្យរបាំថ្ម៦កង់រងការខូចខាតដាច់ចេញពីគ្នា រីឯរថយន្តដាច់កង់មិនអាចបន្តដំណើរទៅមុខបាន ។ ភ្លាមៗនោះអ្នកបើករថយន្តបង្កបានរត់គេចខ្លួនបាត់ស្រមោលសូន្យ។
សូមបញ្ជាក់ថា តាំងពីពេលកើតហេតុ រហូតមកទល់នឹងវេលាម៉ោង៩ព្រឹកថ្ងៃខែដដែលនេះ នគរបាលជំនាញបានចុះមកវាស់វែងអស់ហើយ ប៉ុន្តែនគរបាលពុំព្រមរកវិធីសាស្ត្រណាមួយដើម្បីយករថយន្តបង្កខាងលើចេញពីកន្លែងកើតហេតុឡើយ ជាហេតុធ្វើឱ្យបណ្តោយផ្លូវខាងលើ (មួយចំហៀងផ្លូវ ) ត្រូវកកស្ទះចរាចរណ៍ណែនណាន់តាន់តាប់តែម្តង ៕
ចែករំលែកព័តមាននេះ