នាង Kylie Minogue តារាចម្រៀងជនជាតិអូស្ត្រាលី បានទូរស័ព្ទហៅប៉ូលិសជួយអន្តរាគមន៍ ព្រោះភ័យខ្លាចចំពោះបុរសអនាមិកម្នាក់ដែលតាមដានលើរូបនាង ។
ហេតុការណ៍បានកើតឡើងខណៈពេលតារាចម្រៀងអាយុ៥០ឆ្នាំ Kylie Minogue កំពុងស្នាក់នៅក្នុងផ្ទះមួយនៅក្រុងឆេលសុី ប្រទេសអង់គ្លេស ហើយមានបុរសមិនស្គាល់ឈ្មោះម្នាក់មកឈរចុចកណ្ដឹងនៅមុខផ្ទះរយៈពេលយូរ រួមទាំងបដិសេធមិនព្រមដើរចេញ តម្រូវឲ្យនាងហៅប៉ូលិស ។
ប៉ូលិសបានសាកសួរជននោះពីបទប្រព្រឹត្តបទល្មើសលើកដំបូង ប៉ុន្តែគ្មានការចាប់ខ្លួនទេ។ ស្របពេលជាមួយគ្នានេះមានអ្នកស្រុកម្នាក់បានបញ្ជាក់ប្រាប់ The Sun ថារឿងរ៉ាវបានកើតឡើងនៅពេលបុរសរូបនោះចុចកណ្តឹងទាក់ទងខាងក្នុងជាច្រើនលើក កាលពីសប្ដាហ៍មុន និងមិនព្រមចាកចេញទៅណា ធ្វើឲ្យនាង Kylie Minogue ភ័យក៏ប្ដឹងប៉ូលិស ។
តំណាងរបស់ប៉ូលិសនិយាយថា ពួកគេទាំង២បានពិគ្រោះគ្នា ដោយខាងបុរសទទួលការព្រមានពីបទល្មើសជាលើកដំបូង ខណៈពេលនារីរងគ្រោះក៏បានបង្កើនការយាមកាមយ៉ាងតឹងរ៉ឹងនៅផ្ទះរបស់ខ្លួន ៕
ចែករំលែកព័តមាននេះ