ADផ្ទាំងផ្សព្វផ្សាយពាណិជ្ជកម្ម

កងយោធពលខេមរភូមិន្ទ និងកងទ័ពចិនគ្រោងរៀបចំធ្វើសមយុទ្ឋទ្រង់ទ្រាយធំជាងឆ្នាំមុនៗ

5 ឆ្នាំ មុន

ភ្នំពេញ
១៣ ខែ កុម្ភៈ ឆ្នាំ ២០១៩ ម៉ោង ១៧:២៩

រាជធានីភ្នំពេញ៖ កងយោធពលខេមរភូមិន្ទ និងកងទ័ពរំដោះប្រជាជនចិននឹងរៀបចំធ្វើសមយុទ្ឋហ្វឹកហ្វឺនលំហាត់នាគមាសឆ្នាំ២០១៩ ដែលមានលក្ខណៈទ្រង់ទ្រាយធំជាងឆ្នាំមុនៗ លើប្រធានបទស្តីពីសមយុទ្ធរួមគ្នាប្រឆាំង ភារវកម្មនិងការងារមនុស្សធម៌ ដើម្បីធ្វើយ៉ាងណាឱ្យកងទ័ពនៃប្រទេសទាំងពីរកាន់តែជិតស្និទ្ធបន្ថែមទៀតក្នុងបេសកកម្មការងាររួមគ្នា ។ ក្នុងកិច្ចប្រជុំកាលពីពេលថ្មីៗនេះ លោកឧត្តមសេនីយ៍ទោ…

ក្នុងកិច្ចប្រជុំកាលពីពេលថ្មីៗនេះ លោកឧត្តមសេនីយ៍ទោ ប៉ែន សុក្រិត្យវិទ្យា នាយករងទីចាត់ការហ្វឹកហ្វឺនអគ្គមេបញ្ជាការ ដែលជាក្រុមការងារទីបញ្ជាការលំហាត់នាគមាសឆ្នាំ២០១៩ រវាងកងយោធពលខេមរភូមិន្ទ ជាមួយកងទ័ពរំដោះប្រជាជនចិនបានមានប្រសាសន៏ឲ្យដឹងថា សមយុទ្ឋហ្វឹកហ្វឺនលំហាត់នាគមាសឆ្នាំ២០១៩នេះ គ្រោងនឹងធ្វើឡើងចាប់ពីថ្ងៃទី២៨ ខែកុម្ភៈដល់ថ្ងៃទី២៧ ខែមីនា ឆ្នាំ២០១៩ ដែលមានទីតាំងនៅទីលានបាញ់គ្រាប់ពិតនៃសាលាហ្វឹកហ្វឺនតេជោសែនជុំគិរី របស់កងពលតូចថ្មើរជើងលេខ៧០ ស្ថិតក្នុងភូមិសាស្ត្រតំបន់វាលចំបក់ ប្រជុំភ្នំព្រះ នៃជួរភ្នំ ចង្អោតូច ចង្អោធំ ភូមិត្រពាំងរាំង ឃុំត្រពាំងរាំង ស្រុកជុំគីរី ខេត្តកំពត ។

លោកបានបញ្ជាក់ថា ក្នុងលំហាត់នោះ ភាគីកម្ពុជាគ្រោងនឹងបញ្ជូនកម្លាំងចូលរួមក្នុងពិធីបើកនិងបិទនៃកិច្ចដំណើរការធ្វើលំហាត់សរុបចំនួន២៥៤២នាក់ រួមនឹងសំភារៈ យោធូបករណ៏ និងយោធបរិក្ខារយោធា រីឯភាគីកងទ័ពរំដោះប្រជាជនចិន បានគ្រោងនឹងបញ្ជូនកម្លាំងមកចូលរួមសរុបចំនួន២៥២នាក់ រួមនឹងគ្រឿងសព្វាវុធ យោធូបករណ៏ សំរាប់កិច្ចប្រតិបត្តិការលំហាត់ផងដែរ ៕