ខេត្តកំពង់ឆ្នាំង ៖ បើធ្វើដំណើរតាមផ្លូវជាតិលេខ៥មកដល់ទឹកដីស្រុករលាប្អៀរ ខេត្តកំពង់ឆ្នាំ លោកអ្នកពិតជាបានឃើញអាជីវករដាក់តាំងលក់ផើងផ្កាលើកំណាត់ផ្លូវដែលមានលាបពណ៌ឆើតឆាយយ៉ាងស្រស់ស្អាតគួរឲ្យគយគន់ និងស្ងើចសរសើរពីស្នាដៃច្នៃប្រឌិតរបស់អ្នកស្រុកនេះ។ បើតាមអ្នកផលិតមួយរូបបានរៀបរាប់ថា ជំនាញនេះលោករៀនពីប្រទេសម៉ាឡេស៊ី បន្ទាប់ពីទៅធ្វើកម្មករនៅទីនោះអស់រយៈពេលជាច្រើនឆ្នាំ ។
ស្ថិតក្នុងវ័យ៤០ឆ្នាំប្លាយ ដៃកំពុងលាបថ្នាំថូផ្កា ប្រកបដោយអារម្មណ៍ផ្ចិតផ្ចង់ លោក ស៊ឹម ប្រុស បានប្រាប់កោះសន្ដិភាពថា លោកចេះផលិតផើងផ្កាបែបថ្មីនេះពីប្រទេសម៉ាឡេស៊ី ខណៈដែលលោកទៅធ្វើជាកម្មករសំណង់នៅទីនោះ ហើយត្រូវបានមេជាងបង្ហាត់បង្រៀនឲ្យចេះអំពីរបៀបធ្វើផើងផ្កានេះ ។ បុរសសម្បុរខ្មៅស្រអែម ទឹកមុខស្លូតបូត និងរួសរាយរាក់ទាក់រូបនេះ បានបន្ដថា ៖« ការធ្វើផើងផ្កា ដោយប្រើកន្សែងពោះគោ ឬក្រណាត់ភួយចាស់ៗនោះ នៅប្រទេសម៉ាឡេស៊ី គេនិយមណាស់ ប៉ុន្ដែវាមិនសូវមានគុណភាពទេ ដោយសារតែទឹកស៊ីម៉ងត៍ វាកាត់អំបោះ ធ្វើឲ្យពុកផុយ និងបែកនាពេលខាងមុខ »។
ក្រោយពេលត្រឡប់មកស្រុកកំណើតវិញ លោក ស៊ឹម ប្រុស បានចាប់យករបរនេះធ្វើជាជំនួញផ្ទាល់ខ្លួន ដើម្បីរកចំណូលចិញ្ចឹមគ្រួសារ ប៉ុន្ដែមិនបានអនុវត្តទាំងស្រុងនូវអ្វីដែលខ្លួនបានរៀនចេះពីប្រទេសម៉ាឡេសុីនោះទេ ដោយលោកយករបស់ណាដែលធន់នឹងទឹកស៊ីម៉ងត៍ មកកែច្នៃវិញ ទើបផើងផ្កាមានគុណភាព ។
លោកបន្ដថា ៖« ដោយឃើញរបរនេះ អាចផ្ដល់ចំណូលសម្រាប់ផ្គត់ផ្គង់ជីវភាពគ្រួសារបាន ខ្ញុំក៏ចាប់ផ្ដើមធ្វើវាដោយយករបស់ដែលធន់នឹងទឹកស៊ីម៉ងត៍មកកែច្នៃ ធ្វើឲ្យគុណភាពល្អជាងធ្វើពីកន្សែងពោះគោ និងក្រណាត់ភួយចាស់ៗ ហើយពេលនេះកំពុងទទួលបានការគាំទ្រច្រើនពីបងប្អូន»។ លោកថា ៖« ការធ្វើផើងនេះ បើចង់បានគុណភាព ត្រូវយកប្រភេទក្រណាត់ស្វិតមកធ្វើ ។ សព្វថ្ងៃនេះ ថ្វីបើខ្ញុំធ្វើយឺតជាងគេបន្តិចមែន ប៉ុន្តែគុណភាពផើងផ្ការឹងមាំល្អ មានអតិថិជនមកកុម្មង់ទិញជាច្រើន »។
បន្ទាប់ពីមានការគាំទ្រច្រើន បច្ចុប្បន្ន អាជីវកម្មធ្វើផើងផ្ការបស់លោក ស៊ឹម ប្រុស កំពុងតែពង្រីកធំឡើងៗដោយច្នៃជាម៉ូដគល់ឈើ ដែលមានភាពស្រស់ស្អាត និងទាក់ទាញជាងមុន ។ ភរិយាបុរសសម្បុរខ្មៅស្រអែមរូបនេះ បាននិយាយថា បច្ចុប្បន្ននេះ ពួកយើងពិតជាមមាញឹកមែន ខណៈប្ដីរបស់អ្នកស្រីមិនអាចផលិតឲ្យគ្រប់គ្រាន់ទៅតាមតម្រូវការ ។ ទោះបីជាយ៉ាងណា អ្នកស្រីថា ៖« យើងកំពុងមានផែនការជួលកម្មករមកជួយ ធ្វើយ៉ាងណាឲ្យទាន់ការបញ្ជាទិញរបស់អតិថិជន និងពង្រីអាជីវកម្មនេះឲ្យធំបន្ដិច »។
ដោយឡែកអ្នកលក់ផើងផ្កា ឈ្មោះ ពេជ សុភាស់ នៅភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ បាននិយាយដែរថា បច្ចុប្បន្ននេះអ្នកស្រីលក់ផើងផ្កាបែបសម័យថ្មីនេះដាច់ខ្លាំងណាស់ អតិថិជនមកទិញជាច្រើន ។ អ្នកស្រីនិយាយថា ៖« ដោយឃើញផលិតផលនេះកំពុងពេញនិយមពីអ្នកចូលចិត្តដាំកូនឈើនៅតាមគេហដ្ឋាន ខ្ញុំក៏ទិញមកលក់បន្ដ ហើយឃើញថា មានការគាំទ្រច្រើន » ៕
ចែករំលែកព័តមាននេះ