ខេត្តកំពត ៖ ករណីគ្រោះថ្នាក់ចរាចរណ៍មួយបានកើតឡើងរវាងម៉ូតូប៉ះជាមួយរថយន្ត បណ្តាលឱ្យយុវជនម្នាក់រងរបួសធ្ងន់នៅនឹងកន្លែងកើតហេតុ តែមិនបានមួយម៉ោងផងម្ចាស់រថយន្ត និងរថយន្តត្រូវបានលោកឧត្តមសេនីយ៍ទោ ម៉ៅ ចន្ទ័មធុរឹទ្ធ ស្នងការនគរបាលខេត្តកំពត បញ្ជាទៅកូនចៅអនុញ្ញាត្តិឱ្យម្ចាស់រថយន្ត…
ខេត្តកំពត ៖ ករណីគ្រោះថ្នាក់ចរាចរណ៍មួយបានកើតឡើងរវាងម៉ូតូប៉ះជាមួយរថយន្ត បណ្តាលឱ្យយុវជនម្នាក់រងរបួសធ្ងន់នៅនឹងកន្លែងកើតហេតុ តែមិនបានមួយម៉ោងផងម្ចាស់រថយន្ត និងរថយន្តត្រូវបានលោកឧត្តមសេនីយ៍ទោ ម៉ៅ ចន្ទ័មធុរឹទ្ធ ស្នងការនគរបាលខេត្តកំពត បញ្ជាទៅកូនចៅអនុញ្ញាត្តិឱ្យម្ចាស់រថយន្ត និងរថយន្តចេញពីប៉ុស្តិ៍រដ្ឋបាលគរបាលកោះតូច ខណៈជនរងគ្រោះកំពុងបញ្ជូនទៅមន្ទីរពេទ្យ។
មជ្ឈដ្ឋានទូទៅ កំពុងមានមន្ទិលសង្ស័យថា អាចមានអ្វីនៅពីក្រោយខ្នងរបស់លោកស្នងការក្នុងការដោះលែងអ្នកបើករថយន្តឱ្យមានសេរីភាព និងរង់ចាំមើលថា អ្នកបើកបររថយន្តអាចរួចពីសំណាញ់ច្បាប់ដែរឬទេ? ខណៈជួបគ្រោះថ្នាក់ចរាចរណ៍ ហើយមានអ្នកកាងនៅពីក្រោយខ្នងបែបនេះ។
ហេតុការណ៍គ្រោះថ្នាក់ចរាចរណ៍គួរឱ្យភ្ញាក់ផ្អើលខាងលើនេះបានកើតឡើងនៅវម៉ោង១និង៣០នាទីរសៀល ថ្ងៃទី៥ ខែកុម្ភៈ ឆ្នាំ២០១៩ នៅចំណុចគីឡូម៉ែត្រលេខ១២ ស្ថិតក្នុងភូមិកោះតូច ឃុំកោះធំ ស្រុកទឹកឈូ ខេត្តកំពត។ ជនរងគ្រោះមានឈ្មោះ ញើង អាង ភេទប្រុស អាយុ២២ឆ្នាំ មានទីលំនៅភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ខេត្តកំពត។ចំណែកឯអ្នកបើកបររថយន្តមិនស្គាល់អត្តសញ្ញាណ។
បើតាមជនរងគ្រោះកំពុងសម្រាកនៅមន្ទីរពេទ្យបានប្រាប់អ្នកសារព័ត៌មានឱ្យដឹងថា នៅមុនពេលកើតហេតុ ខ្លួនជិះម៉ូតូម៉ាក CBR ស្លាកលេខកណ្តាល 1S-7369 ក្នុងទិសដៅពីកើតទៅទិសខាងលិច (ខេត្តកំពតទៅខេត្តកំពង់សោម) ក្នុងល្បឿនធម្មតា លុះដល់ចំណុចកើតហេតុខាងលើក៏មានរថយន្តមួយគ្រឿងម៉ាកហាយឡែនឌ័រ ពណ៌ទឹកមាស ពាក់ស្លាកលេខ ភ្នំពេញ 2AP-7453 បើកបរក្នុងទិសដៅស្របគ្នា ស្រាប់តែរថយន្តបត់ឆ្វេងក្នុងល្បឿនលឿនធ្វើឱ្យអ្នកបើកបរម៉ូតូវាក់អើក៏ជ្រុលទៅប៉ះជាមួយរថយន្តតែម្តង បណ្តាលឱ្យអ្នកបើកម៉ូតូដួលបោកខ្ទប់ទៅនឹងថ្នល់រងរបួសជាទម្ងន់ រួចរថយន្តបើករត់រហូតត្រូវប្រជាពលរដ្ឋដេញឃាត់បានប្រគល់ឱ្យសមត្ថកិច្ច។
ពាក់ព័ន្ធបញ្ហានេះដែរ អ្នកសារព័ត៌មានបានទំនាក់ទំនងទៅលោកឧត្តមសេនីយ៍ទោ ម៉ៅ ច័ន្ទមធុរឹទ្ធ ស្នងការនគរបាលខេត្តកំពត បានបញ្ជាក់តាមទូរស័ព្ទថា លោកពិតជាបានអនុញ្ញាត្តិឱ្យភាគីខាងរថយន្ត និងរថយន្តទៅពិតមែន ដោយលោកមើលឃើញថា ខាងរថយន្តអត់ខុស ដោយភាគីខាងម៉ូតូបើកបរក្នុងស្ថានភាពស្រវឹងបើកម៉ូតូទៅបុករថយន្ត។
លោក សែម វិសុទ្ធ វេជ្ជបណ្ឌិតនៅមន្ទីរពេទ្យអនុស្សាវរីយ៍ ស៊ុន យ៉ាឃៀល បញ្ជាក់ពីស្ថានភាពជំងឺរបស់ជនរងគ្រោះថា តាំងពីបញ្ជូនអ្នកជំងឺមកដល់ពេលនេះ គឺជំងឺមានសភាពធ្ងន់ធ្ងរ ភ្នាត់ឆ្អឹងត្រគៀក បាក់ និងបែកឆ្អឹងត្រកៀក ប៉ះពាល់ក្បាល និងដៃ ត្រូវការដាក់ដែក និងវះកាត់ប្រើរយៈពេលយូរក្នុងការព្យាបាល។
ចំណែកអ្នកមីង ដុស ស៊ាវ អាយុ៥៦ឆ្នាំ ត្រូវជាម្តាយរបស់ជនរងគ្រោះបានលើកដៃដប់សំពះសំណូមពរទៅដល់អាជ្ញាធរគ្រប់ជាន់ថ្នាក់ឱ្យជួយរកយុត្តិធម៌ជូនកូនគាត់ផង ដែលកូនរបស់គាត់ស្ថិតក្នុងសភាពធ្ងន់ធ្ងរកំពុងសង្គ្រោះនៅក្នុងមន្ទីរពេទ្យ ខណៈអ្នកបើករថយន្តត្រូវបានលោកស្នងការដោះលែងឱ្យមានសេរីភាពគ្មានភាពទំនួលខុសត្រូវ៕
ចែករំលែកព័តមាននេះ