រាជធានីភ្នំពេញ ៖ ហេតុការណ៍ភ្លើងឆេះចំនួន២កន្លែងផ្សេងគ្នា បានកើតឡើងកាលពីយប់ថ្ងៃទី៥ និងវេលាទៀបភ្លឺថ្ងៃទី៦ ខែកុម្ភៈ ស្ថិតនៅក្នុងខណ្ឌ២ក្នុងរាជធានីភ្នំពេញ តែមិនប៉ះពាល់ដល់លំនៅឋានរបស់ពលរដ្ឋទេ ។
ករណីទី១-តូបលក់សម្លៀកបំពាក់ចំនួន២ នៅឧទ្យានសុបិនចម្ការព្រីង ក្នុងសង្កាត់គោកឃ្លាង ខណ្ឌសែនសុខ បានត្រូវអគ្គិភ័យលេបត្របាក់ខ្ទេច ដែលសង្ស័យបណ្តាលមកពីទុស្សេខ្សែភ្លើង កាលពីវេលាម៉ោង១០និង១០នាទីយប់ថ្ងៃទី៥ ខែកុម្ភៈ ។ ប្រភពព័ត៌មានពីសន្តិសុខយាមនៅឧទ្យាន ខាងលើឲ្យដឹងថា នៅយប់នោះ ខណៈពួកគាត់កំពុងដើរល្បាត ស្រាប់ឃើញមានផ្សែងហុយខ្មួលលាយឡំនឹងអណ្តាតភ្លើងកំពុងឆាបឆេះ សម្លៀកបំពាក់នៅក្នុងតូបយ៉ាងសន្ធោសន្ធៅ។
ភ្លាមៗនោះ ពួកគាត់បាននាំគ្នាទាញទុយោទឹក និងបំពង់ពន្លត់អគ្គិភ័យបាញ់ពន្លត់អស់ជាច្រើនបំពង់ ប៉ុន្តែដោយនៅតែមិនរលត់ ក៏រាយការណ៍ទៅសមត្ថកិច្ចមូលដ្ឋាននិងខាងរថយន្តពន្លត់អគ្គិភ័យ ឲ្យមកជួយធ្វើការអន្តរាគមន៍ ។ បន្ទាប់មក មានរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចំនួន២គ្រឿងបានមកបាញ់ទឹកពន្លត់ ទើបភ្លើងរលត់ទៅវិញជាស្ថាពរ ។
បើតាមប្រភពពីសមត្ថកិច្ចបានឲ្យដឹងថា តូបលក់សម្លៀកបំពាក់ដែលត្រូវភ្លើងឆាបឆេះនេះ មានម្ចាស់ឈ្មោះ ថាច់ ចិត្តាម្លិះ ភេទស្រី អាយុ៣៤ឆ្នាំ ស្នាក់នៅផ្ទះជួលក្នុងសង្កាត់គោកឃ្លាង ខណ្ឌសែនសុខ ។ ទោះជាយ៉ាងណា ករណីអគ្គិភ័យខាងលើនេះ មិនបណ្តាលឲ្យឆេះសម្លៀកបំពាក់សម្រាប់លក់អស់ទាំងស្រុង និងមិនឆេះរាលដាលដល់តូបដែលនៅជិតខាងនោះទេ ។
ករណីទី២-ឃ្លាំងស្តុកកាតុង និងកម្ទេចក្រណាត់ស្បែកជើង បានត្រូវភ្លើងឆេះផ្អើលដល់សមត្ថកិច្ចហៅរថយន្តពន្លត់អគ្គិភ័យមកបាញ់ទឹកពន្លត់ តែថៅកែរោងចក្របែរជាមិនឱ្យចូលទៅវិញ ។ ការភ្ញាក់ផ្អើលពីភ្លើងឆេះឃ្លាំងក្នុងរោងចក្រផលិតស្បែកជើងនេះ បានកើតឡើងកាលពីវេលាម៉ោង៣នឹង៣០នាទីទៀបភ្លឺថ្ងៃទី៦ ខែកុម្ភៈ នៅជិតផ្សារទួលពង្រ ស្ថិតក្នុងភូមិត្រពាំងរំចេក សង្កាត់ចោមចៅទី១ ខណ្ឌពោធិ៍សែនជ័យ ។
ប្រភពព័ត៌មានពីសមត្ថកិច្ចបានឲ្យដឹងថា ភ្លើងបានឆេះនៅក្នុងឃ្លាំងស្តុកស្បែកជើង និងកម្ទេចកាតុងនៃរោងចក្រខាងលើ ដែលស្ថិតនៅជាប់របងផ្ទះជួលរបស់ប្រជាពលរដ្ឋ ធ្វើឱ្យមានការភ័យខ្លាចយ៉ាងខ្លាំង ។ ភ្លាមៗនោះ នគរបាលប៉ុស្តិ៍បានទាក់ទងទៅរថយន្តពន្លត់អគ្គិភ័យមកដល់ តែតំណាងក្រុមហ៊ុនខាងលើមិនឲ្យរថយន្តពន្លត់អគ្គិភ័យចូលទៅបាញ់ទឹកពន្លត់ឡើយ ។
បន្ទាប់មក លោកអធិការរងនគរបាលខណ្ឌពោធិ៍សែនជ័យ បានទាក់ទងទៅអភិបាលខណ្ឌនិងលោកអធិការ ដើម្បីសុំគោលការណ៍ចាត់វិធានការក្តៅ និងបញ្ជាកម្លាំងឲ្យនគរបាលប៉ុស្តិ៍វាយសោរបងដើម្បីឱ្យរថយន្តចូលបាញ់ទឹកពន្លត់ ។ សមត្ថកិច្ចផ្នែកពន្លត់អគ្គិភ័យនិយាយថា ក្នុងករណីភ្លើងឆេះនេះ រថយន្តពន្លត់អគ្គិភ័យរបស់សាលារាជធានីភ្នំពេញចំនួន៩គ្រឿងបានមកជួយអន្តរាគមន៍ និងប្រើប្រាស់ទឹកអស់៨រថយន្តទើបភ្លើងរលត់ទៅវិញ ។
ជាមួយនេះ បានបញ្ជាក់ថា នឹងហៅតំណាងរោងចក្រខាងលើទៅណែនាំផងដែរ ជុំវិញការរារាំងមិនឲ្យរថយន្តពន្លត់អគ្គិភ័យចូលបាញ់ទឹកពន្លត់ ។ ចំពោះមូលហេតុនៃការឆេះនេះ សមត្ថកិច្ចរកមិនទាន់ឃើញពិតប្រាកដនៅឡើយទេ គ្រាន់តែដឹងថានៅក្នុងឃ្លាំងដែលស្តុកស្បែកជើងនិងកម្ទេចកាតុងនោះ មិនមានខ្សែភ្លើងតចូលឡើយ ៕
ចែករំលែកព័តមាននេះ