ប្រទេសនេប៉ាល់ ៖ យោងតាមការសិក្សាមួយចេញផ្សាយកាលពីថ្ងៃទី៤កុម្ភៈថា ២ភាគ៣នៃទឹកកកជួរភ្នំហ៊ីម៉ាឡៃយ៉ានិងHINDOU KOUCH អាចនឹងរលាយរហូតដល់ដំណាច់សតវត្សនេះ ប្រសិនបើភពផែនដីនៅតែបញ្ចេញឧស្ម័នផ្ទះកញ្ចក់ ក្នុងកម្រិតដូចសព្វថ្ងៃដែលវានឹងនាំឲ្យមានគ្រោះថ្នាក់ នៃទឹកជោរជន់ខ្លាំងក្នុងបណ្ដាទន្លេធំ២នៅអាស៊ី។
លាតសន្ធឹងក្នុងប្រវែងដល់ទៅ៣.៥០០គីឡូម៉ែត ពីអាហ្វហ្គានីស្ថានមកដល់មីយ៉ាន់ម៉ា តំបន់ជួរភ្នំ HINDOU KOUCH-HIMALAYA តំណាងឲ្យតំបន់ទឹកកកធំទី៣ នៃពិភពលោកបន្ទាប់ពីតំបន់ប៉ូលទាំង២។ តំបន់ទឹកកកនេះផ្ដល់ទឹកដល់់ទន្លេធំៗនៅអាសីុដូចជា ទន្លេGANGE មេគង្គ ទន្លេលឿងជាដើម។
ការកើនកំដៅផែនដីគំរាមកំហែងដល់ការរលាយទឹកកក លើកំពូលជួរភ្នំនោះដែលមានភ្នំខ្ពស់ៗជាងគេលើពិភពលោក ដូចជាភ្នំEVEREST និង K2។ ការសិក្សាដ៏ធំនោះធ្វើឡើងដោយអ្នកស្រាវជ្រាវនិងអ្នកជំនាញការជាង៣៥០នាក់ ដឹកនាំដោយមជ្ឈមណ្ឌលINTERNATIONAL CENTRE FOR INTEGRADTED MOUTAIN DEVELOPMENT ជាអង្គការអន្តររដ្ឋាភិបាលមួយមានទីតាំង នៅទីក្រុងកដ្ឋមណ្ឌូរដ្ឋធានីនេប៉ាល់។
ក្នុងសេចក្ដីប្រកាសមួយលោកPHILIPPUS WESTERអ្នកទទួលខុសត្រូវនៃការធ្វើរបាយការណ៍នោះនិយាយថា វាជាវិបត្តិបរិយាកាសដែលយើងពុំធ្លាប់ដែលឮនិយាយ។ លោកបន្តថាទោះបីប្រជាជាតិទាំងឡាយនៃភពផែនដី បានព្រមព្រៀងគ្នាទប់ការកើនកំដៅផែនដី ត្រឹមកម្រិតបូក១,៥អង្សាសេ បើប្រៀបធៀបទៅនឹងសករាជមុនឧស្សាហកម្ម រហូតដល់ឆ្នាំ២១០០ ដោយផ្អែកលើកិច្ចព្រមព្រៀងក្រុងប៉ារីស ឆ្នាំ២០១៥ស្ដីពីបរិយាកាសក្ដី នោះតំបន់ជួរភ្នំ HINDOU KOUCH-HIMALAYA ក៏នៅតែបាត់បង់២ភាក៣នៃទឹកកកដែរ។ ការរលាយទឹកកកពិតជានាំមកនូវផលវិបាកនានា សម្រាប់មនុស្ស២៥០លាននាក់នៃតំបន់ជួរភ្នំនោះនិងមនុស្ស១,៦៥ពាន់លាននាក់ នៃតំបន់ឯទៀតៗដែលរស់នៅតាមបណ្ដាមាត់ទន្លេទាំងឡាយនៅពីក្រោម។
របាយការណ៍បន្តថា ការកើនកំដៅបរិយាកាសនឹងប្រែក្លាយកំពូលភ្នំទាំងឡាយ ដែលមានទឹកកកជាប់ជាប្រចាំ លាតសន្ធឹងកាត់ប្រទេស៨ ទៅជាកំពូលភ្នំត្រងោល។ ផលវិបាកសម្រាប់ប្រជាជនតំបន់ គឹការបំពុលបរិយាកាសធ្ងន់ធ្ងរ នាំទៅរកការកើនឡើងនៃព្រឹត្តិការណ៍បរិយាកាសដែលអាក្រក់ៗ៕
ចែករំលែកព័តមាននេះ