រាជធានីភ្នំពេញ ៖ កោះសន្តិភាពបានចេញផ្សាយ១ឈុតរួចហើយ អំពីជ្រូកខ្វៃដែលនៅតែជាតម្រូវការខ្ពស់ក្នុងថ្ងៃសែនប្រពៃណីចិន ទោះបីឆ្នាំថ្មីនេះជាឆ្នាំកុរ(ជ្រូក)ក្តី ក៏អ្នករស់នៅរាជធានីភ្នំពេញដែលជាប់ សែ ស្រឡាយ ចិនមិនរួញរានឹងទិញជ្រូកខ្វៃយកទៅសែនព្រេនដល់ជីដូនជីតា ម៉ាកុង ដែលចែកឋានទៅបរ លោកនោះដែរ ។
ដោយឡែក កាលពីព្រឹកថ្ងៃទី៤ កុម្ភៈ ដែលជាថ្ងៃសែនបុណ្យចូលឆ្នាំចិន បានកត់សម្គាល់ឃើញថា ជ្រូកខ្វៃដែលលក់នៅផ្សារអូរឫស្សី ដាច់រហូតដល់ជិត៣.០០០ក្បាល ដែលអ្នកលក់សប្បាយកើបលុយ ចំណែកអ្នកទិញវិញទឹកភ្នែកទឹកសំបោរ ព្រោះទម្រាំទិញបានជ្រូកខ្វៃយកទៅសែន ត្រូវជួបឧបសគ្គ២ចំណុចចំពោះមុខគឺ ៖
ឧបសគ្គទី១-ត្រូវប្រជ្រៀតគ្នាចូលទិញ ធ្វើយ៉ាងណាឲ្យខាងតែបាន និងឧបសគ្គទី២-ម្នាក់ៗបែកញើសជោកខ្លួន និងស្រែកស្អកបំពង់ករឿងអ្នកលក់ឡើងថ្លៃកប់ពពក គឺជ្រូកខ្វៃ១ក្បាលដែលមានទម្ងន់ប្រមាណ១២គីឡូក្រាម ថ្លៃពី២០០ទៅ៣៥០ដុល្លារអាមេរិក ទើបទិញបាន ដែលនៅថ្ងៃធម្មតាថ្លៃត្រឹមតែ៣៥មឺុនរៀលប៉ុណ្ណោះ ប៉ុន្តែនេះជាឱកាសសម្រាប់អាជីវករលក់ជ្រូកខ្វៃ ពេលដល់រដូវបុណ្យទានម្តងៗ ។
លោក ហ៊ត វ៉ាន់ធី ប្រធានគណៈកម្មការផ្សារអូរឫស្សីបានងឲ្យដឹងថា ការស្រង់ស្ថិតិនៅព្រឹកថ្ងៃសែនចិននេះ ជ្រូកខ្វៃត្រូវបានអាជីវករនាំចូលមកលក់មានចំនួនជិត៣.០០០ក្បាល និងដាច់ស្ទើរតែអស់ទាំងស្រុង គ្រាន់តែថ្លៃបន្តិច ប៉ុន្តែអ្នកទិញយកទៅសែនហាក់ដូចជាគ្មានរួញរាទេ ពោលគឺជ្រូកខ្វៃឡើងថ្លៃ អ្នកទិញនៅតែទិញ ហើយសម្រុកទិញខ្លាំងនៅវេលាម៉ោងប្រមាន៩ទៅ១០ព្រឹក។ លោក ហ៊ត វ៉ាន់ធី បន្តថា បើទោះបីអ្នកលក់ជ្រូកខ្វៃដឹកជ្រូកខ្វៃទាំងរុឺម៉ក និងម៉ូតូចូលទៅលក់ និងអ្នកនៅភ្នំពេញក៏ពពាក់ពពូនគ្នាសម្រុកទិញជ្រូកខ្វៃយ៉ាងនេះក្តី ក៏សណ្តាប់ធ្នាប់សាធារណៈ ចរាចរណ៍ទៅមកជាធម្មតា គឺមិនធ្វើឲ្យប៉ះពាល់ដល់អ្នកដំណើរនោះទេ ។
ទោះជាយ៉ាងណាក្តី បានកត់សម្គាល់ឃើញទៀតថា អ្នកលក់ជ្រូកខ្វៃបានដាក់តូបលក់ជ្រូកខ្វៃពាសពេញលើផ្លូវខាងកើតផ្សារអូរឫស្សី និងចេញទៅលក់ដល់ផ្លូវហ្សាលដឺហ្គោល ហើយអ្នកខ្លះបានដាក់តាំងលក់ជ្រូកខ្វៃនៅជាប់អគារអតីតសាលារៀនឯកជនសិង្ហបុរី ក្បែរស្តុបរង្វង់មូលនាងគង្ហីងផងដែរ ។ ការបំបែកគ្នាលក់ជ្រូកខ្វៃនេះ ហាក់ដូចជាមានភាពងាយស្រួលចំពោះអ្នកទិញ ប៉ុន្តែមិនមានរបៀបរៀបរយបន្តិចសម្រាប់២ទៅ៣ម៉ោង នាពេលព្រឹកថ្ងៃចិនសែន ។
បានកត់សម្គាល់ទៀតថា ផ្សារអូរឫស្សីទាំងមូល ពេលព្រឹកថ្ងៃសែននេះតូបលក់ដូរមានចំនួន១.៣៧០តូបបានបិទ្វារស្ទើរទាំងស្រុង គឺមានលក់ដែរតែតិចតួចបំផុត ប៉ុន្តែនោះមិនមែនគណៈកម្មការផ្សារសម្រេចចិត្តបិទទេ មូលហេតុគឺអាជីវករមិនទៅលក់ ព្រោះជាប់រវល់សែនទាំងអស់គ្នា ៕
ចែករំលែកព័តមាននេះ