រាជធានីភ្នំពេញ ៖ ជនជាតិចិនប្រុសស្រីមួយក្រុមស្រវឹងស្រា បើករថយន្តលឿនដូចហោះជ្រុលទៅបុកចំបង្គោលប៉ាណូស្លាកយីហោហាងជប៉ុន បណ្តាលឲ្យដួលរលំរាបដល់ដី ហើយជ្រុលទៅបុកម៉ូតូចំនួនបីគ្រឿងទៀត ដែលចតមុខហាង បណ្តាលអោយរងការខូចខាតខ្ទាតទៅបុកចំកញ្ចក់ទ្វាហាង បណ្តាលអោយបែកខ្ទេច តែសំណាងល្អមិនបង្កអោយនរណាម្នាក់រងរបួសឡើយ ដែលហេតុការណ៍នេះបានកើតឡើង កាលពីវេលាម៉ោង១២និង៥០នាទីរំលងអធ្រាត្រឈានចូលថ្ងៃទី៥ ខែកុម្ភៈនេះ នៅជាប់នឹងគល់ស្ពានឥន្ទនូកោះពេជ្រ ផ្លូវ៣៣៨កែងនឹងផ្លូវសបិតចំនុចហាង (coffee & restaurant) ជនជាតិជប៉ុន ស្ថិតនៅសង្កាត់ទន្លេបាសាក់ ខណ្ឌចំការមន។
រថយន្តបង្កម៉ាក Fordtuner ពណ៌ខ្មៅ ពាក់ស្លាកលេខភ្នំពេញ 2AR- 0920 បើកបរ និងរួមដំណើរដោយជនជាតិចិនមានគ្នា៤នាក់ ប្រុស២នាក់ និងស្រី២នាក់ ចំណែករថយន្តបង្កខូចខាតមួយកំណាត់មុខស្ទើរតែទាំងស្រុង ។
ប្រភពព័ត៌មានពីសន្តិសុខដែលយាមនៅជិតនឹងកន្លែងកើតហេតុបានប្រាប់អោយដឹងថា មុនកើតហេតុ គឺរូបគាត់ឃើញរថយន្តបង្កនោះបើកតាមបណ្ដោយផ្លូវសបិតក្នុងទិសដៅពីជើងទៅត្បូង ក្នុងល្បឿនយ៉ាងលឿនមកដល់កន្លែងកើតហេតុបម្រុងបួងចង្កូតបត់ស្តាំ តែបួងមិនទាន់ក៏ជ្រុលទៅបុកនឹងបង្កស្លាកយីហោហាងជប៉ុន បណ្តាលបាក់ដួលរលំរាបដល់ដី ហើយជ្រុលទៅបុកម៉ូតូចំនួន៣គ្រឿង ដែលចតទុកមុខហាងរួមមាន១ MSX ទី២ម៉ាក yamaha FINO និងទី៣ជាម៉ូតូប្រើអាគុយ បណ្តាលអោយខូចខាត ហើយខ្ទាតម៉ូតូនោះទៅបុកនឹងកញ្ចក់ទ្វារហាងបែករងការខូចខាតបន្ថែមទៀត ។
ចំណែករថយន្តបង្កខ្ទេចមួយកំណាត់មុខ ភ្លាមៗបានបើកថយក្រោយបន្តិចក៏ចេញពីក្នុងរថយន្តមកចាំទទួលខុសត្រូវជាមួយម្ចាស់ហាង សំណាងល្អមិនបានបង្កអោយនរណាម្នាក់រងរបួសឡើយ ។
ក្រោយកើតហេតុសមត្ថកិច្ចមូលដ្ឋានក៏ចុះទៅដល់កន្លែងកើតហេតុដោយអោយភាគីទាំងពីរសម្របសម្រួលគ្នាសិន ខាងម្ចាស់ហាងរងគ្រោះទាមទារសំណងការខូចខាតជាទឹកប្រាក់ចំនួន៣៥០០ដុល្លារ តែខាងរថយន្តបង្កព្រមសងតែ៣០០០ដុល្លារប៉ុណ្ណោះ ម្ចាស់ហាងមិនព្រមការចចារគ្នាមិនត្រូវក៏ប្រគល់ទៅខាងកម្លាំងសមត្ថកិច្ចជំនាញចរាចរណ៍ធ្វើការវាស់វែង និងយកស្ទូចយករថយន្តរួមទាំងម៉ូតូទៅទៅរក្សាទុកបណ្តោះអាសន្ននៅការិយាល័យនគរបាលចរាចរណ៍ផ្លូវគោកនៃស្នងការដ្ឋានរាជធានីភ្នំពេញ រង់ចាំដោះស្រាយគ្នាម្តងទៀត នៅពេលក្រោយតាមផ្លូវច្បាប់ ៕
ចែករំលែកព័តមាននេះ