ខេត្តបាត់ដំបង ៖ កងទ័ពក៏មានជំនឿលើវិស័យព្រះពុទ្ធសាសនាដែរ ព្រោះដូនតាខ្មែរបានបន្សល់ទុកមកនូវទីសក្ការៈវាលតេជះ ដែលសល់តែដើមពោធិ៍មួយដើមជាសាក្សីពីបុរាណកាលមក ដល់សព្វថ្ងៃនេះ ស្ថិតនៅក្នុងទីបញ្ជាការដ្ឋានយោធភូមិភាគទី៥ ក្នុងក្រុង-ខេត្តបាត់ដំបង ។
ទីសក្ការៈត្រូវបានរៀបចំកសាងឡើងដោយគំនិតផ្តួចផ្តើមពីលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ វេលាព្រឹកថ្ងៃទី២ ខែកុម្ភៈ ឆ្នាំ២០១៩ ដោយមានការចូលរួមពីមេបញ្ជាការរង នាយសេនាធិការរង មេបញ្ជាការកងពលតូចថ្មើរជើងលេខ៥២ នាយការិយាល័យ នាយទាហាន នាយទាហានរង និងពលទាហាន បានអញ្ជើញធ្វើពិធីបញ្ចុះគ្រឺះសីមានៅកន្លែងទីសក្ការៈ វាលតេជះ នៅបរិវេណកងអនុសេនាធំដឹកជញ្ជូន ក្នុងទីបញ្ជាការយោធភូមិភាគទី៥ ។
លោកឧត្តមសេនីយ៍ឯក ប៊ុន សេង បានបញ្ជាក់ថា ដើមពោធិ៍នេះបន្សល់ទុកមករាប់រយឆ្នាំមកហើយ ពីសម័យកាលមក ដែលកាលនោះមានផ្លូវលំមួយខ្សែមានប្រជាជន អាចធ្វើដំណើរដោយថ្មើរជើង និងបររទេះគោ ឬជិះសេះ ដំរី កាត់តាមនេះ ពីតំបន់ភូមិតាកុក សំរោងក្នុងវត្តនរា ឬតំបន់វាលព្រៃរនាមជាប់មាត់ទន្លេសាប ឆ្លងមកប្រាសាទបាសែតឃុំតាប៉ុន ឆ្លងកាត់ទីនេះឆ្ពោះទៅកន្លែងផ្សេងៗទៀតក្នុងឃុំអូរដំបង វត្តតាមឹម បន្តឆ្ពោះទៅដល់ប្រាសាទបាណន់ ហើយតែងតែចូលគោរពរោងអ្នកតាមួយនៅពីក្រោមដើមពោធិ៍នេះ តែសម័យក្រោយៗមក (សម័យសង្គមរាស្ត្រនិយម) មានការអភិវឌ្ឍត្រូវធ្វើព្រលានយន្តហោះក្នុងខេត្តបាត់ដំបង ឆ្លងកាត់ទីនេះ ទើបត្រូវកាត់ផ្តាច់ផ្លូវនេះមិនអាចឆ្លងកាត់ដូចសម័យមុនបាន តែរៀបចំមានផ្លូវថ្មីជាច្រើនខ្សែទៀតបានលឿន និងល្អជាងមុន ហើយក៏បាត់បង់ការចូលគោរពបូជាសុំសេចក្តីសុខ លុះក្រោយសម័យមានសង្គ្រាម ហើយបានបញ្ចប់សង្គ្រាមរួចមក ទីនេះគឺជាបរិវេណក្នុងទីបញ្ជាការរបស់យោធភូមិភាគទី៥ ដោយមានរបងជាប់ថ្នល់កៅស៊ូចូលក្នុងព្រលានយន្តហោះ ដោយត្រូវហាមឃាត់មិនឲ្យមានការចេញចូលដោយសេរីបានឡើយ ។
ដោយឃើញមានដើមពោធិ៍នៅសល់មួយដើម ទើបលោកឧត្តមសេនីយ៍ឯក បានសិក្សាស្រាវជ្រាវ ទើបបានដឹងប្រវត្តទីនេះគឺជាកន្លែងដែលកូនខ្មែរធ្លាប់គោរព បូជា បួងសួងសុំសេចក្តីសុខ និងក្តីប្រាថ្នាគ្រប់ៗគ្នា ហើយក៏បានរៀបចំកសាងបញ្ចុះគ្រឹះសីម៉ាពីថ្ងៃនេះទៅ ឲ្យបងប្អូនទាំងអស់ អាចចេញចូលគោរពបូជាបានទៅថ្ងៃខាងមុខទៀត ។
ក្នុងការកសាងនេះត្រូវរៀបចំជាមុនដោយចាក់ដីលុបទីកន្លែងឲ្យរាបស្មើ ក្រាលគ្រួស និងបេតុងបានចំណាយអស់ថវិកាចំនួន៨លាន៧សែន៥ម៉ឺនរៀល ហើយទីសក្ការៈត្រូវសាងសង់ដែលមានបណ្តោយ៤,១០ម៉ែត្រ ទទឹង១,៩៦ម៉ែត្រ កំពស់៣,២០ម៉ែត្រ អំពីថ្ម ក្រាលឥដ្ឋការ៉ូ ដំបូលឆ្អឹងដែក ប្រក់ក្បឿង ដែលក្នុងគំរោងចំណាយនៅមិនទាន់បានដឹងនៅឡើយ ព្រោះទើបចាប់ផ្តើមកសាងដោយមានលោកឧត្តមសេនីយ៍
ឯកប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ជាអ្នកដឹកនាំកសាង ពីពេលនេះទៅរហូតដល់រួចរាល់ ៕
ចែករំលែកព័តមាននេះ