រាជធានីភ្នំពេញ៖ បន្ទាប់ពីអាជីពចម្រៀងលូតលាស់ខ្លាំងនៅដំណាក់កាលចុងក្រោយនេះ ជីវិតតារាចម្រៀងរ័ត្ន រចនា លេចត្រដែតឡើង ។ សម្រស់កាន់តែស្អាត ការងារកាន់តែកាក់កប និងជីវភាពកាន់តែឡូយឆាយជិះរថយន្តទំនើប ។ អ្វីៗល្អប្រសើរជាងមុនទាំងអស់ ប៉ុន្តែពេលនេះនាងបែរជាជួបរឿងមិនសូវសង្ឃឹមទៅវិញ ។ តើរឿងអ្វី ?
តារាចម្រៀងរ័ត្ន រចនា កំពុងរៀបគម្រោងចេញទៅច្រៀងនៅប្រទេស៣ព្រមគ្នា ។ ឱកាសថ្មីនេះបន្ទាប់ពីនាងបានចេញច្រៀងនៅប្រទេសកូរ៉េជាលើកដំបូងកាលពីពេល ថ្មីៗកន្លងមក ។ ប្រទេសចំនួន៣ដែលរ័ត្ន រចនា មានគម្រោងចេញទៅច្រៀងនោះប្រទេសអូស្ត្រាលី អាមេរិក និងបារាំង ។ ប្រទេសទាំង៣នោះត្រូវគេរំពឹងថានឹងធ្វើឲ្យតារាចម្រៀងរូបនេះអាចពង្រីកទីផ្សារកាន់តែធំ និងជាឱកាសក្នុងការក្តោបក្តាប់លុយដុល្លារបានក្រាស់ក្រែលផងដែរ ។
ទោះជាយ៉ាងណាក្តីតារាចម្រៀងដែលល្បីល្បាញតាមរយៈបទ«មេម៉ាយសប្បាយចិត្ត» រូបនេះបានលើកឡើងថា ការចេញច្រៀងក្រៅប្រទេសនេះគឺស្ថិតនៅជាគម្រោង ពោលវាមិនទាន់ប្រាកដច្បាស់លាស់ឡើយ ។ រ័ត្ន រចនា បានអះអាងថា «បីប្រទេសដែលនាងគម្រោងចេញច្រៀងនេះនាងខ្ញុំហាក់មិនទាន់មានសង្ឃឹមឡើយ ដោយសារការសម្ភាសចេញទៅសម្តែងនោះគឺមានភាពលំបាកខ្លាំង ។ ប្រសើនបើការសម្ភាសទទួលបានជោគជ័យនោះ ជាឱកាសដ៏ល្អមួយសម្រាប់រូបនាងខ្ញុំ ព្រោះនាងខ្ញុំអាចបញ្ចេញសមត្ថភាពច្រៀងឲ្យបងប្អូនខ្មែរនៅទីនោះបានស្តាប់ដោយផ្ទាល់ ខណៈពេលដែលវាក៏ជាក្តីប្រាថ្នារបស់នាងខ្ញុំពីមុនផងដែរ»។
បើតាមរ័ត្ន រចនា ប្រសិនបើនាងអាចជាប់ នោះ នាងអាចនឹងចេញទៅអូស្ត្រាលីនៅចុងខែមីនា បន្ទាប់មកទៅអាមេរិក និងបារាំងអំឡុងខែឧសភា ។ យ៉ាងណាក៏ដោយគម្រោងនេះនាងហាក់មិនមានសង្ឃឹមច្រើនឡើយ ដោយសារតែបណ្តាប្រទេសទាំងបីនោះ គឺពិបាកណាស់ក្នុងការសម្ភាសចេញទៅសម្តែង ខណៈពេលដែលនាងមិនសូវមានបទពិសោធន៍ផងនោះ ។
បើទោះបីជាមិនទាន់មានឱកាសបានចេញសម្តែងនៅក្រៅប្រទេសច្រើនក៏ដោយ ប៉ុន្តែរ័ត្ន រចនា ត្រូវបានគេមើលឃើញថា បច្ចុប្បន្ននាងកំពុងតែមានទីផ្សារ និងកាក់កបខ្លាំងជាមួយនឹងការកើបប្រាក់ពីការច្រៀងនៅក្នុងស្រុកផងដែរ។ ជា រឿយៗគេបានឃើញវត្តមានរបស់នាងចូលរួមច្រៀងនៅតាមបណ្តាលោងការទាំងនៅរាជធានីភ្នំពេញ និងតាមបណ្តាលខេត្ត ផ្សេងៗស្ទើរមិនដាច់រយៈ ។ ថ្មីៗនេះនាងទើបតែរាសីឡើង គឺទីញរថយន្តហាយឡែនឌឺថ្មីមួយគ្រឿងជិះយ៉ាងសង្ហា ។
ការផ្សាយផ្ទាល់តាមហ្វេសប៊ុកសម្រាប់ពិធីប្រគំតន្ត្រីមួយនៅខេត្តស្វាយរៀង បានផ្លាស់ប្តូរជីវិតតារាចម្រៀងរ័ត្ន រចនា ដែលប្រកបអាជីពជាអ្នកច្រៀងអស់ជាច្រើនឆ្នាំ ។ ពេលនោះនាងច្រៀងបទ «មេម៉ាយសប្បាយចិត្ត» របស់អ្នកស្រីប៉ែន រ៉ន ។
រចនា កើតនៅភ្នំពេញ មានឪពុកម្តាយជាអ្នកស្វាយរៀង បានប្រឡូកក្នុងវិស័យចម្រៀងតាំងពីក្មេង ពោលគឺជិត២០ឆ្នាំទៅហើយ ដោយមិនគិតថាអាចក្លាយជាតារាចម្រៀងល្បីល្បាញនោះឡើយ ៕
ចែករំលែកព័តមាននេះ