រាជធានីភ្នំពេញ ៖ ទណ្ឌិតម្នាក់បានជាប់ពន្ធនាគារព្រៃ.សរយៈពេលជិត១ឆ្នាំកន្លងមកហើយ និងនៅសល់រយៈពេលត្រឹមតែជាង២០ថ្ងៃទៀតប៉ុណ្ណោះ ត្រូវរួចទោសបានវិលត្រឡប់ទៅផ្ទះវិញ ចំណែកខាងអនុរក្សពន្ធនាគារក៏បានបន្ធូរកម្រិតវិន័យឲ្យដើរសេរីនៅក្នុងបរិវេណទីធ្លាពន្ធនាគារផងដែរ ហើយខណៈអនុរក្សប្រើឲ្យទៅជួយលើកបន្លែ ស្រាប់តែជននេះមានឱកាសរត់គេចខ្លួនបាត់ដោយសុវត្ថិភាពតែម្ដង។
ហេតុការណ៍នោះបានកើតឡើងកាលពី ម៉ោង១១ព្រឹក ថ្ងៃទី៣១ ខែមករា ឆ្នាំ២០១៩ នៅមណ្ឌលកែប្រែ (ម១) ពន្ធនាគារព្រៃ.ស ស្ថិតនៅក្នុងភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ។
តាមប្រភពព័ត៌មានមួយបានឲ្យដឹងថា ឈ្មោះ សែម ម៉ៅ ភេទប្រុស អាយុប្រហែលជាង៣០ឆ្នាំ ត្រូវនគរបាលចាប់ខ្លួនបញ្ជូនទៅកាន់សាលាដំបូងរាជធានីភ្នំពេញ និងក្រោយមកត្រូវតុលាការចោទប្រកាន់ពីបទលួច ហើយចេញដីកាឃុំខ្លួនកាលពីថ្ងៃទី២៧ ខែកុម្ភៈ ឆ្នាំ២០១៨ កន្លងមកនេះនៅពន្ធនាគារព្រៃ.ស។ ជននេះត្រូវជាប់ពន្ធនាគាររយៈពេល១ឆ្នាំ ហើយនៅសល់តែត្រឹមរយៈពេល២៧ថ្ងៃទៀតប៉ុណ្ណោះ និងត្រូវរួចទោសបានចេញពីពន្ធនាគារវិលត្រឡប់ទៅផ្ទះវិញហើយ។
ប្រភពដដែលបន្តទៀតថា ដោយសារតែជននេះជិតដល់ថ្ងៃរួចទោសនោះ ទើបមានការបន្ធូរបន្ថយនូវវិន័យដែលអាចឲ្យជននេះដើរហើរធ្វើការងារពលកម្មផ្សេងៗនៅទីធ្លាពន្ធនាគារ ក្រៅពីអគារឃុំឃាំងបានក្រោមការឃ្លាំមើលពីសំណាក់អនុរក្សពន្ធនាគារ។ ដោយឡែកនៅព្រឹកថ្ងៃទី៣១ ខែមករា ឆ្នាំ២០១៩មេះ ទណ្ឌិតរូបនេះត្រូវបានអនុញ្ញាតឲ្យចេញមកជួយលើកបន្លែនៅក្រៅអគារឃុំឃាំង ។ ខណៈមន្ត្រីអនុរក្សពន្ធធនាគារព្រៃ.សភ្លេចខ្លួនតែបន្តិច ស្រាប់តែជននេះលួចរត់គេចខ្លួនបាត់ដោយសុវត្ថិភាព។
ប្រភពខាងលើបានបន្តទៀតថា ខណៈនោះបង្កឲ្យមានការភ្ញាក់ផ្អើលយ៉ាងខ្លាំង ហើយក្រុមមន្ត្រីអនុរក្សពន្ធនាគារក៏បានតាមរកគ្រប់កន្លែង ប៉ុន្តែរកមិនឃើញសោះ ទើបពេលនោះបានទំនាក់ទំនងទៅកាន់ខាងអធិការដ្ឋាននគរបាលខណ្ឌដង្កោ និងខណ្ឌពោធិ៍សែនជ័យ ឲ្យជួយឃ្លាំមើលអ្នកទោសដូចមានភិនភាគខាងលើ ដើម្បីចាប់ខ្លួននាំយកទៅឃុំបន្តទៀត៕
ចែករំលែកព័តមាននេះ