ប្រទេសវេណេស៊ុយអេឡា ៖ សហរដ្ឋអាមេរិកបន្តបង្កើនការគាបសង្កត់លើរបបលោកនីកូឡាស់ម៉ាឌូរ៉ូ ដោយប្រកាសនាថ្ងៃទី២៨មករា ពីទណ្ឌកម្មប្រឆាំងក្រុមហ៊ុនប្រេងជាតិវេណេស៊ុយអេឡា និងដោយអំពាវនាវដល់កងទ័ពប្រទេសនេះ ឲ្យយល់ព្រមផ្ទេរដោយសន្តិវិធី នូវអំណាចឲ្យដល់មេដឹកនាំប្រឆាំង លោកJUAN GUAIDO។
សម្ដេចប៉ាបហ្វ្រង់ស្វ័របារម្ភពីថ្លុកឈាមមួយ ក្នុងប្រទេសនេះ ដោយបើយោងតាមអង្គការក្រៅរដ្ឋាភិបាលទាំងឡាយថា បាតុកម្មរបស់ពួកប្រឆាំង មកទល់ពេលនេះបណ្ដាលឲ្យមនុស្សស្លាប់យ៉ាងតិច៣៥នាក់រួចហើយ។
៥ថ្ងៃក្រោយពីទទួលស្គាល់ប្រធានសភាជាប្រធានាធិបតីស្ដីទី ប្រទេសនៅអាមេរិកខាងត្បូងនោះ ធ្លាក់កាន់តែជ្រៅក្នុងវិបត្តិធ្ងន់ធ្ងរបំផុតមួយ នាំឲ្យមានការបារម្ភ ពីរលកនៃអំពើហិង្សា រួចសេតវិមានពេលនេះឈានទៅ វាយប្រហារក្រុមហ៊ុនប្រេងជាតិPDVSA ដោយចោទថា ជាអ្នកនាំឲ្យមានអំពើពុករលួយ។ ក្រសួងរតនាគារអាមេរិកថា ទណ្ឌកម្មហាមឃាត់ក្រុមហ៊ុនPDVSA មិនឲ្យធ្វើពាណិជ្ជកម្មជាមួយ បណ្ដាក្រុមហ៊ុនអាមេរិកនិងផ្អឹបទុកទ្រព្យសម្បត្តិ របស់ក្រុមហ៊ុននោះនៅឯបរទេស ដោយមានទិសដៅរារាំងការពង្វាងយកថវិកាថែមទៀត ពីសំណាក់លោកម៉ាឌូរ៉ូ ។
ចំណែកទីប្រឹក្សាសន្តិសុខជាតិនៃសេតវិមាន លោកJOHN BOLTON ស្នើដល់កងទ័ពវេណេស៊ុយអេឡានិងកងកម្លាំងសន្តិសុខ ឲ្យព្រមទទួលយក ការផ្ទេរអំណាចដោយសន្តិវិធី តាមបែបប្រជាធិបតេយ្យនិងរដ្ឋធម្មនុញ្ញ។
ចំពោះWIKILEAKSបានធ្វើការវិភាគដោយប្រៀបប្រដូច សភាពការណ៍បច្ចុប្បន្ននៅវេណេស៊ុយអេឡា ទៅនឹងវិបត្តិលីប៊ីកាលពីឆ្នាំ២០១១ ក្រោយការប្រកាសរបស់ប្រធានាធិបតិអាមេរិកលោកដូណាល់ត្រាំ គាំទ្រលោកJUAN GUAIDO។ WIKILEAKSតាមTWITTERសរសេរថា កាលពីឆ្នាំ២០១១ លោកអូបាម៉ា ពេលឃើញលោកកាដាហ្វីផលិតប្រេងបានដល់ទៅ១,៦លានធុងក្នុង១ថ្ងៃ ខិតខំរកវិធីសាស្ត្រផ្សេងៗផួលរំលំរបបលោក។ ជាលទ្ធផលបណ្ដាវិធីសាស្ត្ររបស់អាមេរិក គឺធ្វើឲ្យមានការច្របូកច្របល់ ការស្លាប់ការសាយភាយអាវុធ រហូតដល់សីុរីនិងម៉ាលី។ ការកកើតនៃភេរវកម្ម ជនភៀសខ្លួន BREXIT។ល។
ក្រោមលោកត្រាំឆ្នាំ២០១៩ គឹចង់ផ្ដួលរំលំលោកម៉ាឌូរ៉ូ ដែលផលិតប្រេងបាន១,៤លានធុងក្នុងមួយថ្ងៃ ដែលត្រូវតែកម្ចាត់។ ក្រោយការប្រកាសរបស់លោកត្រាំទទួលស្កាល់លោកJUAN GUAIDO ៣៧%នៃអ្នកលេងអីុនធើរណេតយល់ថា វេណេស៊ុយអាឡានឹងក្លាយជាលីប៊ីរបស់លោកត្រាំ៕
ចែករំលែកព័តមាននេះ