ខេត្តបន្ទាយមានជ័យ ៖ គោយយន្តកន្ត្រៃដឹកឈើមួយគ្រឿងបានចេញពីព្រៃ ស្រាប់តែជាន់ត្រូវមីនតោនដែលសល់កាលពីសម័យសង្គ្រាមផ្ទុះលាន់យ៉ាងកក្រើក បណ្តាលជនរងគ្រោះស្លាប់ម្នាក់ និងរបួសម្នាក់ បង្កឱ្យមានការភ្ញាក់ផ្អើលកាលពីម៉ោង១២និង៣០នាទីថ្ងៃត្រង់ ថ្ងៃទី២៥ ខែមករា ឆ្នាំ២០១៩ ស្ថិតនៅព្រៃក្បែរភូមិស្រឡៅជ្រុះ ឃុំទួលពង្រ ស្រុកម៉ាឡៃ។
ជនរងគ្រោះដែលស្លាប់មានឈ្មោះ ឆាម ឆង ភេទប្រុស អាយុ២៣ឆ្នាំ និងអ្នករបួសធ្ងន់ម្នាក់ទៀតមានឈ្មោះ ទៀក សុខ ភេទប្រុស អាយុ២៣ឆ្នាំ ជនរងគ្រោះទាំង២នាក់រស់នៅភូមិរស្មីសាមគ្គី សង្កាត់និមិត្ត ក្រុងប៉ោយប៉ែត។
បើតាមមន្ត្រីនគរបាលស្រុកម៉ាឡៃប្រាប់ថា នៅពេលដែលជនរងគ្រោះជួបគ្រោះថ្នាក់ដោយគ្រាប់មីនតោននោះ គឺជនរងគ្រោះបើកគោយន្តកន្ត្រៃដឹកឈើពេញជិត១០កំណាត់មានប្រវែង៣ទៅ៤ម៉ែត្រ ដោយដឹកចេញពីព្រៃលុះដល់ចំណុចអូរត្រង់ដឺ រ៉ឺម៉ក់គោយន្តខាងក្រោយជាន់ត្រូវមីនតោន ស្រាប់តែផ្ទុះក្រឡាប់បណ្តាលឱ្យជនរងគ្រោះអង្គុយខាងក្រោយស្លាប់ភ្លាមៗនៅនឹងកន្លែងកើតហេតុ ចំណែកអ្នកបើកគោយន្តបានរបួសធ្ងន់ និងគោយន្តរងការខូចខាតខ្ទេចរ៉ឺម៉កខាងក្រោយ។
មន្ត្រីនគរបាលរូបនោះបញ្ជាក់ថា ក្រោយពេលកើតហេតុ ជនរងគ្រោះរងរបួសធ្ងន់ត្រូវបានសាច់ញាតិរួមដំណើរដឹកទៅសង្គ្រោះបន្ទាន់ទៅមន្ទីពេទ្យ ចំណែកជនរងគ្រោះដែលស្លាប់ត្រូវសាច់ញាតិនាំយកទៅធ្វើបុណ្យតាមប្រពៃណី។
គួររំលឹកថា ចំណុចកើតហេតុខាងលើនេះ គឺជាតំបន់សមរភូមិក្តៅរវាងទ័ពព្រៃ និងរដ្ឋាភិបាលនាសម័យសង្គ្រាម ហើយមីនដែលដាក់នៅសម័យសង្គ្រាម ហើយតំបន់នោះមិនទាន់បានដោះមីនអស់នៅឡើយទេ៕
ចែករំលែកព័តមាននេះ