រាជធានីភ្នំពេញ ៖ ក្រសួងព័ត៌មានបានប្រាប់ពីនីតិវិធីនៃការបើកដំណើរការឡើងវិញនូវការិយាល័យតំណាងវិទ្យុសំឡេងសហរដ្ឋអាមេរិក (VOA) និងវិទ្យុអាស៊ីសេរី (RFA) នៅកម្ពុជា ។ នេះបើតាមរដ្ឋមន្ត្រីក្រសួងព័ត៌មាន ។
យោងតាមលិខិតរបស់លោក ខៀវ កាញារីទ្ធ ចេញផ្សាយនៅថ្ងៃទ២៥ មករា នេះបានផ្ញើជូនលោក ប្រាក់ សុខុន ឧបកនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងអគ្គនាយកពន្ធដារយ៉ាងដូច្នេះថា«សេចក្តីថ្លែងការណ៍របស់រាជរដ្ឋាភិបាលកាលពីថ្ងៃទី៣ខែធ្នូ ឆ្នាំ២០១៨ បានបង្ហាញនូវការប្តេជ្ញាចិត្ងយ៉ាងមោះមុតរបស់រាជរដ្ឋាភិបាលកម្ពុជាក្នុងការលើតម្កើងនូវសិទ្ធិ សេរីភាពព័ត៌មាន សេរីភាពនៃការបញ្ចេញមតិស្របតាមរដ្ឋធម្មនុញ្ញ និងច្បាប់ដែលមានធរមាន ហើយបានបញ្ជាក់យ៉ាងច្បាស់ថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិកបានផ្តួចផ្តើមគំនិតបិទការិយាល័យតំណាងរបស់ខ្លួនដោយខ្លួនឯង។
ដូច្នេះវិទ្យុទាំងពីរនេះក៏មានសេរីភាព បើកការរិយាល័យតំណាងរបស់ខ្លួននៅកម្ពុជាឡើងវិញបានដែរ ។ លិខិតបន្តថា ចំពោះបញ្ហានេះក្រសួងព័ត៌មានសូមបញ្ជាក់ដូចជា វិទ្យុសំឡេងសហរដ្ឋអាមេរិក និងវិទ្យុអាស៊ីសេរី កន្លងមកបានធ្វើសកម្មភាពផ្សព្វផ្សាយព័ត៌មាន និងបើកការរិយាល័យរបស់ខ្លួន នៅក្នុងព្រះរាជាណាចក្រកម្ពុជាអស់រយៈពេលពេលជាយូរឆ្នាំមកហើយ ដោយពុំបានចុះបញ្ជីនៅក្រសួងព័ត៌មាន និងពុំបានយកចិត្តទុកដាក់នូវការអនុវត្តកាតព្វកិច្ចចុះបញ្ជីពន្ធដាស្របតាមច្បាប់ និងបទបញ្ញត្តិស្តីពីពន្ធដារនោះទេ ហើយក្រោមមកវិទ្យុទាំងពីរនេះបានសម្រេច បិទការរិយាល័យ តំណាងរបស់ខ្លួននៅរាជធានីភ្នំពេញដោយខ្លួនឯងហើយពុំបានជូនដំណើងដល់អាជ្ញាធរមានសមត្ថកិច្ចទៀតផង ។
លិខិតបន្ថែមថា ចំពោះករណីស្នើសុំបើកការិយាល័យតំណាងវិទ្យុសំឡេងសហរដ្ឋអាមេរិកនិងអាស៊ីសេរី អគ្គនាយករដ្ឋពន្ធដា បានស្នើមកក្រសួងមុនផ្តល់អាជ្ញាប័ណ្ណឬផ្តល់ការអនុញ្ញាតឲនយចុះបញ្ជីស្របច្បាប់ដល់ការិយាល័យវិទ្យុសំឡេងសហរដ្ឋអាមេរិក និងវិទ្យុអាស៊ីសេរីនេះគួរភ្ជាប់នូវលក្ខខណ្ឌនៃការគោរពកាតព្វកិច្ចសាររពើពន្ធជាមុនសិន ៕
ចែករំលែកព័តមាននេះ