រាជធានីភ្នំពេញ ៖ វិនិយោគិនអឺរ៉ុបក្នុងវិស័យធនាគារដែលកំពុងធ្វើប្រតិបត្តិការអាជីវកម្មនៅក្នុងប្រទេសកម្ពុជា បានបង្ហាញពីទំនុកចិត្តមកលើរាជរដ្ឋាភិបាលកម្ពុជា ដោយគ្រោងនឹងបន្ថែមការវិនិយោគរបស់ខ្លួន ដើម្បីជួយដល់វិស័យសហគ្រាសខ្នាតតូច និងមធ្យកម្ពុជា ដែលកំពុងមានសកា្ដនុពល និងជាវិស័យមួយសំខាន់ ក្នុងការរួមចំណែកជំរុញកំណើនសេដ្ឋកិច្ច និងប្រាក់ចំណូលប្រជាជន ។
នៅក្នុងជំនួបរវាងវិនិយោគិនអឺរ៉ុបមួយក្រុម និងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីពេលថ្មីៗនេះ លោក អូលីវីយ៉ែ ក្លែន អគ្គនាយកធនាគារ ប្រេដ ប៊ែង ដែលកំពុងវិនិយោគនៅកម្ពុជា បានឲ្យដឹងថា នៅក្នុងឆ្នាំ២០១៨កន្លងទៅ ធនាគាររបស់លោកនៅកម្ពុជាបានផ្ដល់កម្ចីដល់ជាង១០០លានដុល្លារអាមេរិកដល់វិស័យឯកជន ដែលក្នុងនោះជាង៨០ភាគរយ គឺជាកម្មសិទ្ធិរបស់ជនជាតិខ្មែរ ហើយធនាគារនេះក៏មានផែនការពង្រីកសាខាបន្ថែមនៅក្នុងប្រទេសកម្ពុជា ដើម្បីចូលរួមអភិវឌ្ឍន៍វិស័យ សហគ្រាសខ្នាតតូច និងមធ្យម នៅក្នុងប្រទេសកម្ពុជា ដោយធនាគារ ក៏បានស្នើសុំយោបល់ពីរដ្ឋមន្ត្រីផ្ទាល់ដើម្បីពីសក្ដាពុលមួយចំនួន ។
លោកបានបន្តទៀតថា ប្រទេសកម្ពុជា គឺជាប្រទេសប្រកបដោយថាមពល ដែលមានការផ្លាស់ប្តូរយ៉ាងឆាប់រហ័ស ហេតុដូច្នេះហើយ យើងត្រូវតែមានសមត្ថភាពវិវត្តន៍ទៅមុខឲ្យបានលឿនផងដែរ ។ នៅក្នុងក្របខ័ណ្ឌនេះហើយ បានជាចាប់តាំងពីការបើកដំណើរការជាផ្លូវការ នៅក្នុងប្រទេសកម្ពុជារួចមក ធនាគារបានដាក់ចេញ និងអនុវត្តនូវផលិតផល និងសេវាកម្មជាច្រើនសម្រាប់អតិថិជនគ្រប់ប្រភេទរបស់ខ្លួនមិនថាជាលក្ខណៈបុគ្គល សហគ្រាសខ្នាតតូច និងមធ្យម ឬ ក៏សហគ្រាសធំនោះទេ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានមានប្រសាសន៍ថា ក្នុងពេលសក្ដានុពលអភិវឌ្ឍន៍នៅកម្ពុជាកំពុងតែមានភាពល្អប្រសើរបែបនេះ សូមវិនិយោគិនអឺរ៉ុបជាច្រើនចូលមកវិនិយោគបន្ថែម ជាពិសេសវិស័យធនាគារ ដើម្បីចូលរួមអភិវឌ្ឍន៍វិស័យធនាគារ និងវិស័យ SME ដែលត្រូវបានចាត់ទុកជាក្បាលម៉ាស៊ីនដ៏សំខាន់នៃកំណើនសេដ្ឋកិច្ច និងបានពន្យល់អំពីគោលនយោបាយគាំពារវិនិយោគ និងគោលនយោបាយអភិវឌ្ឍន៍ឧស្សាហកម្មរបស់រាជរដ្ឋាភិបាលកម្ពុជា ។
លោកបានមានប្រសាសន៍ អំពីគម្រោងជំរុញទីផ្សារសម្រាប់កសិកម្មខ្នាតតូច ដែលផ្តោតសំខាន់លើការអភិវឌ្ឍខ្សែសង្វាក់តម្លៃផលិតផលស្រូវ ដំឡូងមី បន្លែ មាន់ស្រែ និងសូត្រប្រណីតដើម្បីលើកស្ទួយជីវភាពប្រជាកសិករក្រីក្រ និងបានស្នើធនាគារជួយគាំទ្រគម្រោងនេះ តាមរយៈការផ្តល់សេវាពិគ្រោះយោបល់ និងវគ្គបណ្តុះបណ្តាលផ្សេងៗ ទាក់ទងនឹងការអភិវឌ្ឍសហគ្រិនភាព ព្រមទាំងប្រាក់កម្ចី ដែលមានការប្រាក់ទាប ដល់សមាគមកសិករ ដើម្បីពង្រីកមុខរបរ ដោយផ្អែកលើប្រតិបត្តិការដែលមានកិច្ចធានា ។
យោងតាមប្រសាសន៍លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា បានឲ្យដឹងថា ក្នុងបរិបទនៃការរីកចម្រើននៃវិស័យសេដ្ឋកិច្ច និងហិរញ្ញវត្ថុ ធនាគារជាតិនៃកម្ពុជា ក្នុងនាមជាអាជ្ញាធរនិងអាណាព្យាបាល នៅតែបន្តពង្រឹងក្របខ័ណ្ឌច្បាប់ និងបទប្បញ្ញត្តិនានាដែលមានស្រាប់ និងបង្កើនបទប្បញ្ញតិ្តថ្មីៗដែលចាំឲ្យស្របតាមស្តង់ដាអន្តរជាតិ ព្រមទាំងពង្រឹងការត្រួតពិនិត្យ និងកិច្ចការការពារអតិថិជន ដើម្បីទទួលបានជំនឿទុកចិត្តពីសាធារណជនមកលើប្រព័ន្ធធនាគារ ។
លោកជំទាវបញ្ជាក់ថា គិតត្រឹមត្រីមាសទី៣ ឆ្នាំ២០១៨កន្លងទៅនេះ ទ្រព្យសកម្មរបស់ប្រព័ន្ធធនាគារ បានកើនឡើងដល់៣១ពាន់លានដុល្លារអាមេរិក ឥណទាបានកើនឡើងដល់១៧ពាន់លានដុល្លារអាមេរិក ដើមទុនក៏បានកើនឡើង១៣,៨ពាន់លានដុល្លារអាមេរិក ខណៈប្រាក់បញ្ជើបានកើនឡើងដល់ប្រមាណ១៩ពាន់លានដុល្លារអាមេរិក ៕
ចែករំលែកព័តមាននេះ