រាជធានីភ្នំពេញ ៖ ក្រុមហ៊ុនរបស់ប្រទេសចិនមួយមានគម្រោងសាងសង់បំពង់បង្ហូរប្រេង ឬឧស្ម័នពីខេត្តព្រះសីហនុមកកាន់រាជធានីភ្នំពេញ ។ នេះបើតាមប្រធានក្រុមប្រឹក្សាភិបាលរបស់ក្រុមហ៊ុនចិនមួយនេះ ។
ក្នុងជំនួបទ្វេរភាគីជាមួយសម្តេច តេជោ ហ៊ុន សែន នាយករដ្ឋមន្ត្រីនៃកម្ពុជា នាព្រឹកថ្ងៃទី២១មករា ឆ្នាំ២០១៩ លោក ស៊ូ យីនពាវ (Shu Yinbiao) ប្រធានក្រុមប្រឹក្សាភិបាលនៃក្រុមហ៊ុន ហួរណេងគ្រុប ដែលជាក្រុមហ៊ុនសាងសង់វារីអគ្គិសនីសេសាន្តក្រោម២ នៅខេត្តស្ទឹងត្រែងបានបញ្ជាក់ជូនសម្តេចតេជោ ថា ក្រុមហ៊ុនលោកមានគម្រោងសិក្សា និងវិនិយោគផលិតថាមពលអគ្គិសនីដើរដោយពន្លឺព្រះអាទិត្យផងដែរ ។
ក្នុងឱកាសនោះសម្តេចតេជោ ហ៊ុន សែន បានកោតសរសើរ និងលើកទឹកចិត្តដល់ក្រុមហ៊ុន ដែលកំពុងបណ្តាក់ទុនវិនិយោគនៅក្នុងកម្ពុជា ។ សម្តេចតេជោបានអនុញ្ញាតឲ្យក្រុមហ៊ុនធ្វើការសិក្សាស្រាវជ្រាវ ដើម្បីបណ្តាក់ទុនវិនិយោគ ពិសេសការផលិតថាមពលស្អាតនៅកម្ពុជា ។ ក្រុមហ៊ុនក៏មានគម្រោងសាងសង់បំពង់បង្ហូរប្រេង ឬឧស្ម័ន ពីខេត្តព្រះសីហនុមកកាន់រាជធានី ភ្នំពេញជាមួយ និងគម្រោងនៃការសាងសង់ផ្លូវល្បឿនលឿនផងដែរ ៕
ចែករំលែកព័តមាននេះ