លោក សុខ ឥសាន ៖ សម រង្ស៊ីប្រើល្បិចថោកទាប ដើម្បីកេងចំណេញនយោបាយរហូត
- ភ្នំពេញ
រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា លោក សម រង្ស៊ី…
រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា លោក សម រង្ស៊ី តែងតែប្រើល្បិចថោកទាប ដើម្បីកេងចំណេញនយោបាយពីអ្នកគាំទ្ររហូត។
អ្នកនាំពាក្យគណបក្សកាន់អំណាចបានបញ្ជាក់ឲ្យដឹងនៅថ្ងៃទី២០ ខែមករា ឆ្នាំ២០១៩ យ៉ាងដូច្នេះថា «តាំងពីដើមមកទណ្ឌិត សម រង្ស៊ី តែងតែប្រើដៃរបស់អ្នកដទៃ ដើម្បីផលប្រយោជន៍ខ្លួន ។
ជាក់ស្តែងទណ្ឌិតសម រង្ស៊ី តែងតែញុះញង់ និងបោកបញ្ឆោតអ្នកដទៃឲ្យចូលរួមធ្វើ បាតុកម្មផ្សេ ងៗ តែពេលដល់ថ្ងៃធ្វើបាតុកម្មគេមិនដែលឃើញមុខរបស់ទណ្ឌិត សម រង្ស៊ីទាល់តែសោះ ។ នេះជាវិធីបោកប្រាស់ និងប្រើបាតដៃអ្នកដទៃ ដើម្បីផលប្រយោជន៍ខ្លួនឯង»។
ជាមួយគ្នានោះដែរ លោក សុខ ឥសាន ក៏បានលើកឡើងថា នៅពេលមានផលវិបាក គឺអ្នកដទៃទទួល តែបើមានផលចំណេញ គឺសម រង្ស៊ី ជាអ្នកទទួល។ ឥឡូវនេះ នៅសហរដ្ឋអាមេរិក ទណ្ឌិត សម រង្ស៊ី កំពុងបំផុស និងញុះញង់កៀងគរ និងប្រមែប្រមូលបងប្អូនខ្មែរនៅក្រៅប្រទេសឲ្យមកធ្វើបាតុកម្មប្រឆាំងនឹងរាជរដ្ឋាភិបាលកម្ពុជា និងអំពាវនាវឲ្យបរទេសបង្កើនដាក់គំនាបថែមមកលើរាជរដ្ឋាភិបាលកម្ពុជា ។
លោកបន្តថា ទោះបីមិនសូវមានមនុស្សមកចូលរួមច្រើនយ៉ាងណា ក៏គេមិនសង្កេតឃើញវត្តមានទណ្ឌិត សម រង្ស៊ី នៅជាមួយបាតុករដែរ ។ នេះបង្ហាញពីភាពមិនទទួលខុសត្រូវរបស់ទណ្ឌិត សម រង្ស៊ី និងគឺជាទម្លាប់អាក្រក់របស់ទណ្ឌិត សម រង្ស៊ី ដែលតែងតែប្រើល្បិចបោកឲ្យបងប្អូនមកហើយ ចំណែកខ្លួនឯងគេចមុខបាត់ ។
លោកបញ្ជាក់ថា ៖ «បញ្ហានេះ តែងកើតឡើងជារឿយៗ តែមានអ្នកចាញ់បោកនៅតែចាញ់បោកដដែល មិនរាងចាលសោះ សុទ្ធតែអ្នកចេះ និងជាបញ្ញាវ័ន្តទៀត តែនៅចាញ់បោកទណ្ឌិត សម រង្ស៊ីដដែលជាដដែល គួរតែភ្ញាក់រលឹកហើយ នៅចាញ់បោកដល់ណាទៀត ជិតអស់ស្រូវពូជហើយ »៕
ចែករំលែកព័តមាននេះ