ខេត្តកំពង់ឆ្នាំង ៖ រថយន្តយ៉ាងហោចណាស់ចំនួន៦គ្រឿងបានបុកបន្តកន្ទុយគ្នាលើផ្លូវជាតិ ខណៈដែលរថយន្តខាងមុខជួបឧបសគ្គជាន់ហ្វ្រាំងដោយបង្ខំ បង្កឱ្យមានការភ្ញាក់ផ្អើលកាលពីម៉ោង១០និង៣០នាទីព្រឹក ថ្ងៃទី១៩ ខែមករា ឆ្នាំ២០១៩ លើផ្លូវជាតិលេខ៥ ត្រង់ចំណុចភូមិស្ពករាជ…
ខេត្តកំពង់ឆ្នាំង ៖ រថយន្តយ៉ាងហោចណាស់ចំនួន៦គ្រឿងបានបុកបន្តកន្ទុយគ្នាលើផ្លូវជាតិ ខណៈដែលរថយន្តខាងមុខជួបឧបសគ្គជាន់ហ្វ្រាំងដោយបង្ខំ បង្កឱ្យមានការភ្ញាក់ផ្អើលកាលពីម៉ោង១០និង៣០នាទីព្រឹក ថ្ងៃទី១៩ ខែមករា ឆ្នាំ២០១៩ លើផ្លូវជាតិលេខ៥ ត្រង់ចំណុចភូមិស្ពករាជ ឃុំអណ្ដូងស្នាយ ស្រុករលាប្អៀរ យ៉ាងនេះក្តីមិននរណារងគ្រោះក្នុងហេតុការណ៍គ្រោះថ្នាក់ចរាចរណ៍នោះទេ គ្រាន់តែខូចខាតរថយន្តស្រាល និងធ្ងន់តែប៉ុណ្ណោះ ។
សមត្ថកិច្ចនគរបាលចរាចរណ៍នៅកន្លែងកើតហេតុបានឱ្យដឹងថា រថយន្តអាចច្រើនជាង៦គ្រឿង ដែលជួបគ្រោះថ្នាក់ចរាចរណ៍ ហើយរថយន្តខ្លះក្រោយកើតហេតុរងការខូចខាតតិចតួចបានចាកចេញពីកន្លែងកើតហេតុ មុនពេលសមត្ថកិច្ចនគរបាលទៅដល់ ជាពិសេសរថយន្តដែលមិនស្គាល់ម៉ាកនៅមុខគេបង្អស់។
ប្រភពដដែលបន្តថា តាមការពិនិត្យជាក់ស្តែង រថយន្តដែលនៅសល់នៅកន្លែងកើតហេតុ មានរថយន្ត ប្រភេទ mini ម៉ាក Mira ពាក់ស្លាកលេខ បាត់ដំបង 2A.6312 រងការខូចខាតបន្តិចបន្តួចនៅផ្នែកខាងក្រោយ,រថយន្តទួរីស ពណ៌ទឹកប្រាក់ ពាក់ស្លាកលេខភ្នំពេញ 2AF.2243 រងការខូចខាតផ្នែកខាងក្រោយតិចតួច, រថយន្តកាមរីគូថប៉ោង ពណ៌សំបកឪឡឹក ពាក់ស្លាកលេខ ឆ 6414 ភព.2 រងការខូចខាតធ្ងន់ផ្នែកខាងមុខ, រថយន្តម៉ាក ISUZU ពាក់ស្លាកលេខចង្កូតស្តាំ PP. 0507 រងការខូចខាតស្រាល, រថយន្តម៉ាក ស្តារិច ពាក់ស្លាកលេខ បន្ទាយមានជ័យ 2B.5353 រងការខូចខាតស្រាលផ្នែកខាងមុខ និងរថយន្តម៉ាកហាយឡិនឌឺ ពណ៌ស ពាក់ស្លាកលេខ ភ្នំពេញ 2AQ.0929 រងការខូចខាតផ្នែកខាងមុខយ៉ាងដំណំ ។
ក្រោយពេលកើតហេតុសមត្ថកិច្ចបានទៅដល់ និងបានសម្រួលចរាចរណ៍ ចំណែកភាគីរថយន្តបានសម្រួលគ្នា បន្ទាប់មករថយន្តពីរគ្រឿង គឺរថយន្ត Mira និងរថយន្តទួរីស ដែលខូចខាតតិចតួចខ្ជិលវែងឆ្ងាយ ក៏បើកចេញទៅ ដូច្នេះនៅសល់រថយន្ត៤គ្រឿង ក្នុង២គ្រឿងខូចខាតខ្លាំងបានជជែកតថ្លៃគ្នា រឿងចេញសំណង ដែលម្នាក់ៗដណ្តើមត្រូវរៀងខ្លួន។
ប៉ុន្តែរយៈជាងមួយម៉ោង នៅពេលមិនត្រូវគ្នា សមត្ថកិច្ចរៀបចំយករថយន្តទាំងនោះមកកន្លែង ទើបការជជែកត្រូវគ្នា ហើយក៏បើកចេញរៀងៗខ្លួន នៅសល់តែរថយន្តហាយឡិនឌឺ ១ប៉ុណ្ណោះ ព្រោះត្រូវសណ្តោងដោយសារបែកធុងទឹក ។
សមត្ថកិច្ចនគរបាលបានបញ្ជាក់ថា គ្រោះថ្នាក់ចរាចរណ៍ខាងលើ គឺបណ្តាលមកពីបើកបរខ្វះការប្រុងប្រយ័ត្ន បើកបរកៀកគ្នាពេក លុះខាងមុខមានឧបសគ្គជាន់ហ្វ្រាំងដោយបង្ខំ ក៏ជ្រុលបុកបន្តគ្នាបែបនេះ៕
ចែករំលែកព័តមាននេះ