ខេត្តស្វាយរៀង ៖ មានហេតុការណ៍ភ្នាក់ផ្អើលទាំងព្រឹក ខណៈដែលអាជីវករកំពុងអង្គុយលក់ទូរស័ព្ទដៃក្នុងតូបផ្សារវាលយន្ត ស្រាប់តែមានជនមិនស្គាល់មុខបានលបពួនបាញ់ចំពាមកៅស៊ូចំនួន២គ្រាប់ (ជាមួយគ្រាប់ឃ្លីដែក) សំដៅទៅលើតូបលក់ទូរស័ព្ទដែលមានស្លាកយីហោដារ៉ាបណ្តាលឲ្យធ្លុះធ្លាយទូកញ្ចក់តាំងដាក់ទូរស័ព្ទតែមិនបង្កគ្រោះថ្នាក់ដល់អ្នកលក់ឡើយ ។
ហេតុការណ៍នេះបានកើតឡើងកាលពីវេលាម៉ោង០៦និង៤០នាទីព្រឹក ថ្ងៃទី១៦ ខែមករា ឆ្នាំ២០១៩ នៅត្រង់ចំណុចមុខផ្សារវាលយន្ត ស្ថិតក្នុងភូមិវាលយន្ត សង្កាត់ស្វាយរៀង ក្រុងស្វាយរៀង ។
បើតាមសមត្ថកិច្ចនគបាលក្រុងស្វាយរៀងបានឲ្យដឹងថា មានករណីបាញ់គ្រាប់ឃ្លីដែកចេញពីជនសង្ស័យមិនស្គាល់អត្តសញ្ញាណបានធ្វើសកម្មភាពបាញ់ចំពាមកៅស៊ូគ្រាប់ឃ្លីដែកចំនួនពីរគ្រាប់ ទៅលើតូបលក់ទូរស័ព្ទមួយកន្លែង បណ្តាលឲ្យត្រូវចំទូតាំងលក់ទូរស័ព្ទមួយគ្រាប់ធ្លុះកញ្ចក់ និងត្រូវជញ្ជាំងតូបមួយគ្រាប់ ក៏ប៉ុន្តែមិនបង្កឲ្យមានគ្រោះថ្នាក់ដល់មនុស្សទេ ។
សមត្ថកិច្ចបានបន្តទៀតថា ម្ចាស់តូបឈ្មោះ យោគ ចាន់ដាវី ភេទស្រី អាយុ៣៣ឆ្នាំ មុខរបរលក់ទូរស័ព្ទ រស់នៅភូមិវាលយន្ត សង្កាត់ស្វាយរៀង ក្រុងស្វាយរៀង។
បើតាមសម្តីម្ចាស់តូបលក់ទូរស័ព្ទដែលមានហីហោ ដារ៉ា បានប្រាប់អោយដឹងថា រាល់ព្រឹកគាត់ក្រោកពីព្រលឹម ដើម្បីរៀបចំឥវ៉ាន់ទូរស័ព្ទសម្រាប់លក់ដូចសព្វមួយដង តែថ្ងៃនេះគាត់ចាប់ផ្តើមរៀបបានតែបន្តិចក៏លឺសូរសម្លេងប្រាវៗចំនួនពីរដង ចំទូខាងលិចផ្ទួនៗគ្នាតែម្តង ស្រាប់តែឃើញធ្លុះកញ្ចក់ទូរតាំងទូរស័ព្ទមួយគ្រាប់ និងត្រូវជញ្ជាំងតូប១គ្រាប់ សំណាងហើយដែលរូបគាត់កំពុងអោនយកទូរស័ព្ទ បើគាត់យកទូរស័ព្ទទៅដាក់តាំងកន្លែងដែលបាញ់នោះអាចគ្រោះថ្នាក់បាន ។
ម្ចាស់តូបលក់ទូរស័ព្ទខាងលើបានឲ្យដឹងទៀតថា រូបគាត់មិនដែលមានទំនាស់ជាមួយអ្នកណាឡើយ ក្នុងការប្រកបរបរលក់ទូរស័ព្ទនេះ ហើយការបាញ់មកតូបគាត់ក៏មិនដឹងមូលហេតុយ៉ាងណានោះដែរ ។ ទោះបីយ៉ាងម្ចាស់តូបលក់ទូរសព្ទ័ខាងលើអំពាវនាវដល់សមត្ថកិច្ចសូមជួយស្រាវជ្រាវចាប់ជនសង្ស័យមកផ្តន្ទាទោសទៅតាមច្បាប់ឲ្យខាងតែបាន ៕
ចែករំលែកព័តមាននេះ